Teach Long Wei wea Pipol Isi for Minim
1. Wanem nao wanfala important wei for teach gud?
1 Toktok wea pipol isi for minim, hem gudfala wei for teachim pipol. Wei for ting raonem hao Nambawan Teacher, Jesus hem teach, savve helpem iumi for kamap gud long “wei for teach.”—2 Tim. 4:2; John 13:13.
2. Wanem nao iumi savve duim for teach long wei wea pipol isi for minim, and wanem nao savve kamaot from diswan?
2 Story wea Pipol Isi for Minim: Jesus talem olketa nambawan trufala samting long Sermon long Maunten wea pipol isi for minim. (Matt., chap. 5-7) Olketa wea hipap for herem Jesus “barava sapraes nao long hao hem teach.” Olketa police wea go for kasholem Jesus talem disfala toktok: “Taem disfala man hem toktok, no eniwan hem fitim hem nao.” (Matt. 7:28, 29; John 7:46) Iumi no need for staelem hao iumi toktok, or iusim olketa toktok and tokpiksa wea hard for minim mekem man bilivim truth. Iumi savve iusim olketa toktok wea pipol isi for minim for pruvim olketa trufala teaching.
3. Why nao samfala laek for storyim staka samting tumas, and hao nao iumi savve stop for duim datwan?
3 Story Fitim: Jesus story fitim wanem pipol fit for herem long datfala taem. (John 16:12) Iumi mas trae for luksavve and story fitim pipol. Diswan hem barava tru taem iumi preach long olketa relative, olketa niu wan wea interest, and olketa pikinini. Iumi mas trae for no storyim staka samting tumas nomata sapos olketa barava laek for herem iumi. Olketa wea garem gudfala heart bae laek for gohed kasem savve abaotem trufala God Jehovah.—John 17:3; 1 Cor. 3:6.
4. Why nao hem gud for storyim nomoa olketa main point winim wei for storyim staka samting?
4 Storyim Olketa Main Point: Jesus no storyim staka samting wea mekem olketa teaching bilong hem hard for pipol minim. Taem hem sei: “Evriwan wea stap insaed long grev bae . . . laef bak,” hem savve hem no stretfala taem for hem storyim tufala hope bilong olketa wea bae laef bak. (John 5:28, 29) Taem iumi duim olketa Bible study, iumi shud storyim nomoa olketa main point and no storyim tumas olketa difren samting.
5. Wanem gud samting nao bae iumi kasem sapos iumi teach long wei wea pipol isi for minim?
5 Iumi barava hapi bikos Jehovah nao teachim iumi staka samting, bat long wei wea isi for minim. (Matt. 11:25) Sapos iumi gohed for teach long wei wea pipol isi for minim, iumi bae kasem staka gud samting and hapi long preaching bilong iumi.