Iusim Gud Olketa Samting Pipol Lukim

WHY nao hem gud for iusim samting pipol lukim taem iu teach? Hem savve mekem teaching bilong iu moabeta. Jehovah God and Jesus Christ iusim samting pipol lukim, and iumi savve lane from tufala. Taem iumi joinim samting pipol lukim witim samting iumi talem, audience kasem information long tufala wei. Diswan savve help for keepim interest bilong audience and for strongim samting long mind bilong olketa. Hao nao iu savve iusim samting pipol lukim taem iu storyim gud nius? Hao nao iu savve mek sure iu iusim olketa long gudfala wei?

Wei wea Olketa Nambawan Teacher Iusim Samting Pipol Lukim. Jehovah iusim olketa samting wea pipol lukim, wea bae hard for olketa forgetim, for teachim samfala important leson. Wan naet hem tekem Abraham aotsaed and hem sei: “Luk go ap, plis, long heven and kaontem olketa star, sapos iu fit for kaontem olketa. . . . Seed bilong iu bae kamap olsem.” (Gen. 15:5) Nomata datfala promis hem luk olsem hard tumas long tingting bilong man, hem barava muvim Abraham and hem showimaot faith long Jehovah. Long narataem, Jehovah sendem Jeremiah long haos bilong man wea wakem clay pot for hem go insaed and lukluk taem man hia sheipim clay. Hem leson wea hard for forgetim wea showimaot paoa bilong Creator ovarem olketa man! (Jer. 18:1-6) And Jonah bae nating forgetim leson bilong mercy wea Jehovah teachim hem thru long datfala botol-gourd plant. (Jonah 4:6-11) Jehovah talem olketa profet bilong hem tu for actim olketa profesi message and long semtaem iusim samfala samting wea hem markem. (1 Ki. 11:29-32; Jer. 27:1-8; Ezek. 4:1-17) Olketa part bilong tabernacle and temple helpem iumi for minim olketa really samting wea stap long heven. (Heb. 9:9, 23, 24) God iusim planti vision tu for givim important information.—Ezek. 1:4-28; 8:2-18; Acts 10:9-16; 16:9, 10; Rev. 1:1.

Hao nao Jesus iusim samting wea pipol lukim? Taem olketa Pharisee and sekson bilong olketa follower bilong Herod trae for trapim hem thru long toktok bilong hem, Jesus ask for wanfala denarius and point go long piksa bilong Caesar long datfala selen. Then hem explainim hao olketa mas peim bak olketa samting bilong Caesar long Caesar bat peim bak olketa samting bilong God long God. (Matt. 22:19-21) For teachim leson hao iumi mas honorim God witim evri samting bilong iumi, Jesus hem point go long wanfala poor widow woman long temple wea contribution bilong hem—tufala smol selen—hem only samting wea hem garem for living bilong hem. (Luke 21:1-4) Narataem hem iusim wanfala smol pikinini olsem example bilong hambol fasin and man wea no aftarem hae position. (Matt. 18:2-6) And tu, hemseleva showimaot mining bilong hambol fasin taem hem wasim leg bilong olketa disaepol bilong hem.—John 13:14.

Olketa Wei for Iusim Samting Pipol Lukim. Iumi no savve story thru long olketa vision olsem Jehovah hem duim. Bat planti piksa for muvim tingting bilong pipol stap insaed olketa pablikeson bilong Olketa Jehovah’s Witness. Iusim olketa for helpem pipol wea interest for lukim long mind bilong olketa datfala Paradaes earth wea Word bilong God promisim. Taem iu duim wanfala hom Bible study, iu savve askem student for lukim wanfala piksa wea join witim study and askem hem for storyim samting hem lukim. Hem interesting hao taem Jehovah givim samfala vision long profet Amos, hem askem hem: “Wanem nao iu lukim, Amos?” (Amos 7:7, 8; 8:1, 2) Iu savve askem semkaen kwestin taem iu helpem pipol for lane from olketa piksa.

For raetem or iusim wanfala chart wea garem olketa date wea showim wanem taem olketa important samting hem happen, hem savve helpem pipol for minim olketa profesi olsem “sevenfala taem” bilong Daniel 4:16 and “seventi week” bilong Daniel 9:24. Kaen chart olsem stap insaed planti study buk bilong iumi.

Long famili Bible study bilong iu, for storyim olketa samting olsem tabernacle, temple long Jerusalem, and temple wea Ezekiel lukim long vision savve moa isi for minim sapos iu iusim wanfala piksa or map. Olketa stap insaed Insight on the Scriptures, appendix bilong New World Translation of the Holy Scriptures—With References, and insaed samfala Wastaoa magasin.

Taem iu readim Bible witim famili bilong iu, iusim gud olketa map. Lukim gogo bilong Abraham from Ur go kasem Haran and then long Bethel. Lukluk gud long road wea nation bilong Israel wakabaot followim taem olketa lusim Egypt and go long Promis Land. Faendem pis land wea each tribe bilong Israel kasem olsem present. Lukim bigfala area wea Solomon rul ovarem. Lukim road wea Elijah go long hem taem hem ranawe from Jezreel go kasem wilderness wea winim Beer-sheba bihaen Jezebel talem hem bae hem killim hem. (1 Ki. 18:46–19:4) Faendem olketa taon wea Jesus hem preach. Lukim olketa gogo bilong Paul, olsem buk bilong Acts storyim.

Hem gud for iusim samting olketa Bible student savve lukim taem iu helpem olketa for minim waka bilong kongregeson. Maet iu showim student bilong iu wanfala assembly program and explainim wanem kaen information iumi storyim long olketa assembly and convention. Planti wea go for lukluk long Kingdom Hall or wanfala branch office bilong Olketa Jehovah’s Witness barava sapraes. Hem gudfala wei for aotem eni rong idea abaotem waka bilong iumi and purpose bilong datwan. Taem iu leadim student for lukluk raonem Kingdom Hall, storyim wei wea hem difren from olketa nara ples for worship. Mekhae long wei wea hem simpol building wea man savve lanem samting. Showim olketa samting wea join witim pablik ministry bilong iumi—ples for kasem literature, olketa territory map, and olketa contribution box (wea difren evribit from kolekson).

Sapos iu garem olketa video wea olketa wakem anda long lead bilong Governing Body, iusim for buildimap trust long Bible, for mekem olketa student savve long waka bilong Olketa Jehovah’s Witness, and for encouragem pipol for live followim olketa Bible principle.

Iusim Samting Pipol Lukim for Olketa Bigfala Grup. Samting pipol lukim savve helpem olketa bigfala grup sapos iu preparem and iusim gud. Faithful and wise slave provaedem samfala difren kaen samting olsem for iumi iusim.

Planti taem olketa study article insaed Wastaoa garem olketa piksa wea study conductor savve iusim for strongim olketa important point. Olketa buk wea iumi iusim long Kongregeson Buk Study garem tu.

Maet hem luk olsem hem gud for iusim samting pipol savve lukim for teachim olketa point insaed samfala pablik tok aotlaen. Bat hem moabeta for mekhae long samting insaed long Bible, wea klosap evriwan long audience holem. Sapos samfala taem iu need for iusim wanfala piksa or raetem shortfala aotlaen for helpem audience kasem samfala main point bilong wanfala tok, chek firstaem for mek sure olketa wea sidaon bihaen bae lukim klia (or readim) datwan. Iumi shud iusim olketa samting olsem long samfala taem nomoa.

Iumi no iusim samting wea pipol savve lukim taem iumi toktok and teach for mekem olketa laflaf. Taem iumi iusim long wei wea fitim, hem shud strongim olketa important idea. Kaen samting olsem savve gud tumas sapos hem help for mekem samting iumi talem moa klia, moa isi for minim, or hem givim strongfala pruv hao samting iumi talem hem stret. Taem iu iusim gud olketa samting pipol lukim, diswan savve barava affectim pipol mekem olketa rememberim datfala point wea iu teachim for planti year.

Wei for herem and lukim samting, tufala evriwan important tumas long wei for lane. Remember hao tufala nambawan Teacher iusim tufala samting hia, and trae hard for followim example bilong tufala taem iu trae for helpem narawan.