Showimaot Respect Long Narawan

BIBLE talem iumi for “honorim evri difren kaen man” and “for no tokdaonem eniwan.” (1 Pet. 2:17; Titus 3:2) Tru nao, evri man wea iumi meetim, “God wakem ‘long wei wea olsem hem.’” (Jas. 3:9) Each man hem samwan wea Christ dae for hem. (John 3:16) And evriwan fit for herem gud nius mekem olketa savve duim samting followim datwan and sev. (2 Pet. 3:9) Samfala pipol garem fasin or position wea mekem olketa fit for kasem spesol respect.

Wanem nao reason why samfala pipol maet tingse olketa no need for showimaot kaen respect wea Bible encouragem? Kastom bilong ples maet disaedem hu nao fit for kasem honor followim famili laen, color skin, sapos hem man or woman, health, age, haomas material samting man garem, or position long community. Raverave fasin wea kamap big tumas midolwan olketa bigman long gavman hem spoelem respect bilong pipol for olketa wea garem paoa. Long samfala kantri, pipol barava no satisfae witim living, samfala mas waka for staka hour for kasem olketa main need nomoa, and pipol wea stap raonem olketa no showimaot respect. Olketa young wan kasem hevi from olketa nara young wan wea trae pullim olketa for joinim wei for againstim olketa teacher and olketa wea garem paoa. Olketa program long television wea showim olketa pikinini wea bossim and laek winim parents, hem affectim tingting bilong planti. Iumi mas trae hard for no letem tingting bilong world olsem for changem wei wea iumi respectim nara pipol. Bat, taem iumi honorim pipol, hem mekem hem moa isi for storyim olketa difren idea witim olketa.

Wei wea Showimaot Respect. Man wea duim waka saed long religion mas showimaot respect saed long wei for werem kaleko wea fitim and for garem gudfala fasin. Lukluk and fasin wea fitim hem difren long olketa difren ples. Samfala tingse hem no showimaot respect for story long narafala man taem iu werem hat or iu garem hand insaed poket. Long narafala ples, maet pipol acceptim kaen lukluk and fasin olsem. For stap klia long wei for mekem pipol feel nogud, tingim feeling bilong pipol long ples wea iu stap. For duim olsem savve helpem iu for missim eniting wea maet stopem iu for sharem gud nius long gudfala wei.

Fitim iumi for tingim sem samting taem iumi story long nara man, especially olketa wea olo. Long planti ples, pipol tingse olketa young wan no showimaot respect sapos olketa kolem full-grown man long first nem bilong hem. Long samfala ples full-grown man tu mas no iusim first nem taem hem story long wanfala stranger. And tu, planti languis garem plural wei for talem “iu” or samfala nara wei for showimaot respect for samwan wea moa old or wea garem paoa.

Showimaot Iu Luksavve Witim Respect. Long olketa smol community pipol expectim iu for showimaot iu luksavve long nara man taem iu meetim hem long road or iu kam insaed wanfala haos. Iu duim diswan long wei for talem hello, for smile, muvim hed, or maet for apim eye bilong iu. Pipol tingse iu no showimaot respect sapos iu no duim samting olsem taem iu meetim nara man.

Bat samfala maet feel iu no really interest nomata iu showimaot iu luksavve long olketa. Why nao olsem? Bikos olketa luksavve iu no tingim olketa wanwan. Samfala pipol judgem narawan saed long physical samting. Planti taem pipol barava stap klia long olketa wea disable or garem health problem. Bat, Word bilong God showim iumi hao for showimaot love and respect taem iumi deal witim kaen man olsem. (Matt. 8:2, 3) Evriwan long iumi kasem samfala nogud samting from sin bilong Adam. Waswe, bae iu feel olsem pipol respectim iu sapos olketa tingim nomoa wik point bilong iu? Or waswe, iu laekem pipol for luksavve long olketa gudfala fasin bilong iu?

For showimaot respect hem minim tu for luksavve long hedship. Long samfala ples iu mas story witim hed bilong famili bifor iu witness long olketa narawan long datfala famili. Nomata assignment bilong iumi for preach and teach hem from Jehovah, iumi luksavve hao God markem parents for trainim, givim discipline, and leadim pikinini bilong olketa. (Eph. 6:1-4) Dastawe, taem iu go long wanfala haos, hem fitim for story firstaem long parents bifor iu barava story gud witim pikinini.

Olketa olo garem savve abaotem laef wea iumi mas respectim. (Job 32:6, 7) For luksavve long diswan hem helpem wanfala young pioneer sista long Sri Lanka wea visitim wanfala olo man. Firstaem man hia hem againstim hem, and hem sei: “Hao nao wanfala young wan olsem iu savve teachim Bible long mi?” Bat sista hem ansa: “For tok stret, mi no kam for teachim iu bat from mi lanem samting wea mekem mi hapi tumas mi mas talem long narafala pipol.” Ansa bilong datfala pioneer wea showimaot respect hem mekem datfala man hem interest. Hem askem “Wanem nao iu lanem?” Sista hem ansa, “Mi lanem hao for stap laef for olowe.” Datfala olo man hem start for studyim Bible witim Olketa Jehovah’s Witness. Planti olo pipol bae hapi for kasem respect olsem, nomata olketa bae no askem pipol for showimaot diswan.

Bat samfala maet ova tumas for showimaot respect. Long olketa Pacific island and samfala nara ples, wei for iusim toktok bilong respect taem man hem go long wanfala vilij or long olketa chief savve help for mekwe for olketa Witness story long olketa chief and pipol wea stap anda long olketa. Bat, iumi no need for ososo and tu, hem no stret for iumi duim datwan. (Prov. 29:5) Olsem tu, wanfala languis maet garem samfala toktok bilong honor olsem part long grammar bilong hem, bat Christian respect no minim iumi mas ova tumas for iusim kaen toktok olsem.

Story Witim Respect. Bible encouragem iumi for minim hope wea iumi garem “witim kwaet fasin and bigfala respect.” (1 Pet. 3:15) So, nomata maet iumi savve kwiktaem for showimaot mistek long tingting bilong narafala man, waswe, hem wise for duim olsem long wei wea maet aotem respect bilong hem? Bae hem moabeta for lisin long patient wei, askem hem why nao hem feel olsem, and tingim feeling bilong hem taem iumi story gud witim hem from Bible.

Respect wea iumi showimaot taem iumi story long wanfala man shud showaot tu taem iumi story long audience from platform. Wanfala speaker wea respectim audience bae no tokdaonem olketa or showimaot tingting olsem: “Iufala savve followim disfala kaonsel sapos iufala barava want for duim.” For toktok long wei olsem hem mekem nara pipol feel wikdaon. Hem moabeta for tingim audience olsem wanfala grup pipol wea lovem Jehovah and want for servem hem! Long wei wea followim example bilong Jesus, iumi shud showimaot iumi minim pipol taem iumi deal witim olketa wea maet wik long spiritual wei, no garem savve olsem iumi, or wea slow for followim kaonsel bilong Bible.

Audience bae feelim wei wea speaker hem respectim olketa sapos hem showaot hao hemseleva tu need for followim Word bilong God long wei wea moa big. Dastawe, hem wise for stap klia long wei for iusim “iu” taem iu storyim wei for followim olketa scripture. Olsem example, lukim wei wea disfala kwestin “Waswe, iu duim evriting iu fit for duim?” hem difren from “Evriwan long iumi shud askem hemseleva: ‘Waswe, mi duim evriting mi fit for duim?’” Point bilong tufala kwestin hia hem semsem nomoa, bat first wan mekem hem luk olsem speaker hem tingse hem moabeta winim audience bilong hem. Mek-tu kwestin encouragem each man, and speaker tu, for tingim hemseleva and wanem nao muvim hem.

Stap klia long wei for talem fani samting from iu laek mekem audience laf nomoa. Diswan no honorim message bilong Bible. Hem tru, iumi shud hapi long service bilong iumi long God. Samfala part long information insaed assignment bilong iumi maet lelebet fani. Bat, for laf abaotem olketa serious samting no showimaot respect for audience and for God.

Bae hem gud tumas sapos wei, fasin, and toktok bilong iumi evritaem showimaot iumi ting long narafala pipol long wei wea Jehovah teachim iumi for ting long olketa.