Waka Hard for Kasem Heart

FOR join witim wei for witness long pipol, iu need for trae for kasem heart bilong olketa. Planti taem Bible storyim hao heart hem difren from fasin wea showaot long aotsaed. Tokpiksa heart hem piksarem really fasin bilong man—feeling bilong hem, evri samting hem ting abaotem, reason hem ting olsem, and hao nao datwan affectim samting wea hem duim. Datfala tokpiksa heart nao ples wea seed bilong truth hem grow. (Matt. 13:19) And wei for obeyim God mas kam from heart.—Prov. 3:1; Rom. 6:17.

For mekem teaching bilong iu kasem heart, tingim thrifala goal hia: (1) Luksavve long wanem samting hem affectim finis heart bilong man wea iu story witim. (2) Strongim olketa gudfala fasin olsem love and fasin for fraet long God. (3) Encouragem hem for ting raonem wanem nao really muvim hem, mekem hem luksavve hao for mekem Jehovah hapi evribit.

Iusim Fasin for Luksavve. Planti difren reason stap why pipol no acceptim truth yet. Taem iu conductim wanfala hom Bible study, maet iu need for aotem rong tingting and provaedem tru information for changem rong idea wea student garem, or just givim samfala pruv. Askem iuseleva: ‘Waswe, disfala man luksavve hao evri man garem spiritual need? Haomas samting nao hem bilivim finis? Wanem nao hem no bilivim? Why nao hem disaed olsem? Waswe, hem needim help for winim olketa feeling wea savve stopem hem for acceptim olketa responsibility wea man kasem taem hem savve long truth?’

Planti taem hem hard for faendaot why nao pipol bilivim samting. Proverbs 20:5 sei: “Kaonsel wea stap long heart bilong man hem olsem deep wata, bat man wea garem fasin for luksavve bae pullim kamaot datwan.” Fasin for luksavve hem wei wea man savve minim samting wea no showaot klia. For duim olsem hem needim wei for lukluk gud and fasin for kea.

Pipol no just story thru long toktok nomoa. Wanfala subject maet mekem feis or saond bilong voice bilong student for change. Sapos iu wanfala dadi or mami, iu luksavve hao sapos fasin bilong pikinini hem change maet datwan showimaot hao niu samting affectim laef bilong hem. No ting nating long olketa saen olsem. Hem showimaot lelebet wanem nao insaed heart.

Olketa gudfala kwestin savve helpem iu for pullim kamaot wanem nao insaed heart bilong samwan. Maet iu askem hem: “Hao nao feeling bilong iu abaotem . . . ?” “Wanem nao mekem iu biliv hao . . . ?” “Wanem nao bae iu duim sapos . . . ?” Bat careful for no mekem man feel nogud from iu askem staka kwestin tumas. Long wei wea tingim feeling bilong hem maet iu askem hem firstaem, “Waswe, hem olraet for mi askem iu . . . ?” For faendaot wanem nao insaed heart hem no isi and hem tek-taem. Planti taem iu mas buildimap feeling for trust bifor wanfala man bae willing for talemaot olketa deep feeling bilong hem. And nomata long taem olsem iu mas careful, nogud kaen kwestin wea iu askem mekem hem feel olsem iu poke nose long bisnis bilong hem.—1 Pet. 4:15.

Iu needim fasin for luksavve tu for kontrolem feeling bilong iu taem man talem samting. Remember, goal bilong iu hem for minim pipol, mekem iu savve chusim information from Bible wea savve muvim olketa. Kwiktaem daonem eni feeling for talem olketa hao tingting bilong olketa hem rong. Bat, trae for luksavve long feeling wea no showaot long olketa word wea hem talem. Then bae iu savve wanem for duim; and from student bilong iu hem luksavve iu minim hem, bae hem moa willing for ting strong long samting wea iu talem.—Prov. 16:23.

Long samfala wei, iu savve muvim man wanwan nomata taem iu story long wanfala big grup. Sapos iu lukluk long audience, lukim lukluk long feis bilong olketa, and askem olketa kwestin for olketa ting raonem, bae iu luksavve long feeling bilong olketa abaotem samting wea iu talem. Sapos iu savve gud long audience bilong iu, showimaot iu luksavve long living bilong olketa. Tingim tingting bilong kongregeson taem iu story witim olketa from Word bilong God.—Gal. 6:18.

Mekem Olketa Gudfala Feeling Kamap. Bihaen iu kasem lelebet savve abaotem biliv bilong wanfala man, samting wea hem no bilivim, and why nao olsem, iu savve build antap long datwan. Bihaen hem resurrect, Jesus kasem heart bilong olketa disaepol bilong hem taem hem “barava minim gud olketa Scripture” long olketa abaotem samting wea just happen. (Luke 24:32) Iu tu shud barava trae for showim hao samting wea kasem wanfala man, samting hem barava wantem, and samting hem lukim long Word bilong God join tugeta. Bae hem muvim heart bilong student long gudfala wei taem hem luksavve: “Diswan nao TRUTH!”

Taem iu mekhae long gudfala fasin, love, kaeness wea man no fit for kasem, and hao olketa wei bilong Jehovah stret, iu helpem olketa student for buildimap love for God. Sapos iu tek-taem for storyim long olketa wea lisin olketa gudfala fasin wea olketa wanwan garem wea God hem lukim, iu helpem olketa for biliv hao olketa fit for fren witim hem. Iu savve duim diswan long wei for story raonem olketa scripture olsem Psalm 139:1-3, Luke 21:1-4, and John 6:44 and for helpem olketa for tinghae long bigfala love bilong Jehovah for olketa faithful servant bilong hem. (Rom. 8:38, 39) Minim hao Jehovah no lukim olketa mistek bilong iumi nomoa bat hem lukim full laef bilong iumi, strong bilong iumi for klinfala worship, love wea iumi garem for nem bilong hem. (2 Chron. 19:2, 3; Heb. 6:10) Hem rememberim tu evri smol samting abaotem iumi, and long spesol wei, bae hem givim bak laef long “evriwan wea stap long olketa memory grev.” (John 5:28, 29; Luke 12:6, 7) From God wakem olketa man long image bilong hem, planti taem wei for storyim olketa fasin bilong hem savve muvim heart bilong man.—Gen. 1:27.

Hem savve affectim heart bilong man tu taem hem lane for garem sem tingting olsem Jehovah abaotem nara pipol. From Jehovah hem kea for iumi wanwan, hem stret for sei hem showimaot semkaen interest long narawan nomata wanem kaen living, kantri, or tribe hem kam from. (Acts 10:34, 35) Taem wanfala man hem minim gud diswan, hem garem strongfala faondeson from Bible for aotem from heart bilong hem fasin for heitim and judgem pipol. Diswan bae mekem hem fit for stap long peace witim nara pipol taem hem lane for duim will bilong God.

Fasin for fraet long God hem nara feeling wea iu shud helpem olketa narawan for garem. (Ps. 111:10; Rev. 14:6, 7) Kaen deepfala respect, or wei for fraet long God olsem, savve muvim man for duim samting wea hem maet no fit for duim long strong bilong hemseleva. Thru long wei for storyim olketa nambawan waka bilong Jehovah and barava spesol loving kaeness bilong hem, iu savve helpem olketa narawan for mekem grow feeling for fraet for mekem hem no hapi.—Ps. 66:5; Jer. 32:40.

Mek sure olketa wea lisin long iu minim hao fasin bilong olketa hem important long Jehovah. Hem garem feeling, and wei wea iumi followim direction bilong hem or nomoa savve mekem hem hapi or sorre. (Ps. 78:40-42) Showim pipol hao fasin bilong olketa seleva savve affectim ansa wea God savve givim for wei wea Satan tokdaonem hem.—Prov. 27:11.

Helpem audience luksavve hao wei for keepim olketa mark bilong God savve givim gud samting long olketa. (Isa. 48:17) Wanfala wei for duim diswan hem for storyim olketa nogud samting saed long body and feeling wea man savve kasem taem hem rejectim wisdom bilong God, nomata for lelebet taem nomoa. Explainim hao sin mekem iumi stap farawe from God, stopem chance bilong nara pipol for lanem truth from iumi, and long samfala nara wei hem spoelem olketa. (1 Thess. 4:6) Helpem audience bilong iu for barava tinghae long olketa blessing wea olketa kasem finis from wei for followim olketa law bilong God. Mekem olketa tinghae moa long wei wea olketa raeteous wei bilong Jehovah mekem iumi missim staka problem. Taem man garem faith hao olketa wei bilong God nao wise, bae hem les for go againstim. (Ps. 119:104) Bae hem ting long wei for obey, no olsem wanfala hevi, bat wei for showimaot love long Jehovah.

Helpem Nara Pipol for Lukluk Gud. For go ahed for grow long spiritual wei, pipol need for luksavve long wanem nao insaed heart bilong olketa. Minim long olketa hao Bible savve helpem olketa for duim olsem.

Helpem olketa wea lisin for luksavve hao Bible hem no wanfala record bilong olketa komandment, kaonsel, history, and profesi nomoa. Hem showimaot tingting bilong God tu. James 1:22-25 markem Word bilong God witim wanfala mirror. From feeling bilong iumi abaotem message bilong Bible and wei wea Jehovah hem fulfillim purpose bilong hem, Bible hem showimaot wanem nao insaed heart bilong iumi. So hem showimaot hao God, wea “lukluk gud insaed long olketa heart,” hem ting long iumi. (Prov. 17:3) Encouragem olketa wea lisin long iu for evritaem tingim diswan. Encouragem olketa for ting raonem wanem nao God keepim for iumi insaed Bible record and olketa change wea olketa mas duim for mekem God moa hapi. Helpem olketa for ting long wei for readim Bible olsem wei for kasem tingting bilong Jehovah saed long “tingting and samting wea heart want for duim,” mekem olketa waka tugeta witim God for duim eni change wea olketa need for duim.—Heb. 4:12; Rom. 15:4.

Samfala Bible student maet laek for duim samting followim wanem olketa lanem; bat olketa wari abaotem wei wea nara pipol bae ting long olketa. Maet olketa stragol witim samting wea body wantem. Or olketa maet trae for tingim eni reason wea bae no mekem olketa feel guilty for servem God and long semtaem hol strong long samfala wei bilong disfala world. Storyim olketa danger wea savve kamaot from wei for no disaed strong. (1 Ki. 18:21) Encouragem olketa for prea long God for lukluk insaed and klinim heart bilong olketa.—Ps. 26:2; 139:23, 24.

Showim olketa hao Jehovah hem minim wei wea olketa stragol and hao Bible hem explainim diswan. (Rom. 7:22, 23) Helpem olketa for careful for no letem feeling bilong heart wea no perfect for bossim olketa.—Prov. 3:5, 6; 28:26; Jer. 17:9, 10.

Encouragem each wan for ting raonem wanem nao muvim hem for duim samting. Teachim hem for askem hemseleva: ‘Why nao mi laek for duim diswan? Waswe, bae datwan showim Jehovah hao mi barava tinghae long evri samting wea hem duim finis for mi?’ Waka for strongim biliv hao wei for fren witim Jehovah long wei wea hem appruvim hem barava moa spesol winim eni samting wea man savve garem.

Helpem audience bilong iu for minim wanem nao insaed long wei for servem Jehovah witim “full heart.” (Luke 10:27) Diswan minim olketa mas mekem evri feeling, samting olketa wantem, and samting wea muvim olketa, fitim olketa wei bilong Jehovah. So teachim olketa wea lisin long iu for ting raonem no samting olketa duim nomoa, bat hao olketa feel abaotem olketa mark bilong God and wanem nao muvim olketa for servem hem. (Ps. 37:4) Taem olketa student bilong iu luksavve long wanem samting olketa mas kamap moabeta long hem, encouragem olketa for prea long Jehovah: “Mekem heart bilong mi wan for fraet long nem bilong iu.”—Ps. 86:11.

Taem wanfala student hem fren gud witim Jehovah, bae hem obeyim God from faith bilong hem and no from encouragement bilong iu nomoa. Then, hemseleva bae “go ahed for mek sure long samting wea Lord hem acceptim.” (Eph. 5:10; Phil. 2:12) Wei for obey from heart olsem mekem Jehovah barava hapi.—Prov. 23:15.

No forget hao Jehovah nao wan wea judgem heart and pullim pipol for fren witim hem. (Prov. 21:2; John 6:44) Waka bilong iumi hem for waka tugeta witim hem. (1 Cor. 3:9) Hem olsem ‘God hem iusim iumi for barava askem pipol.’ (2 Cor. 5:20; Acts 16:14) Jehovah no forcem eniwan for acceptim truth, bat taem iumi iusim Bible, maet hem muvim olketa wea lisin for luksavve hao samting olketa herem hem ansarem olketa kwestin—or prea bilong olketa. Tingim diswan long evritaem iu garem chance for teachim narawan, and barava askem Jehovah for kaonsel and help bilong hem.—1 Chron. 29:18, 19; Eph. 1:16-18.