Teach Long Wei wea Bae Kasem Heart Bilong Pipol Long Ministry
1. Taem Jesus teachim olketa wea lisin long hem, hao nao datwan affectim olketa?
1 Jesus Christ hem savve hao for teach for kasem heart bilong olketa wea lisin long hem. Wanfala taem hem minim olketa Holy Raeting long olketa disaepol bilong hem, and datwan mekem olketa “hapi tumas.” (Luke 24:32) Wanem nao iumi savve duim for helpem pipol long ministry for laek followim wanem Bible talem?—Rome 6:17.
2. Taem iumi garem wei for luksavve, hao nao datwan savve helpem iumi taem iumi teachim pipol?
2 Garem Wei for Luksavve: Staka taem sapos iumi talem nomoa long pipol wanem hem stret and no stret, bae olketa no laek for duim datwan. And sapos iumi showim staka scripture for pruvim wanem olketa bilivim hem no stret, maet datwan mekem olketa for no laek lisin long iumi. Sapos iumi laek for helpem samwan, iumi mas luksavve why hem bilivim samting and why hem duim samfala samting. Wei for askem olketa gudfala kwestin bae helpem hem for talemaot tingting bilong hem. (Prov. 20:5) Datwan bae mekem iumi savve wanem scripture for iusim wea bae helpem hem. So iumi mas luksavve hao for helpem hem and patient witim hem. (Prov. 25:15) Hem gud for tingim, samfala bae kwiktaem for followim wanem olketa lanem bat olketa narawan no olsem. Gogo holy spirit bilong Jehovah nao bae helpem olketa for changem tingting and wei bilong olketa.—Mark 4:26-29.
3. Hao nao iumi savve helpem pipol wea iumi teachim for duim samting wea Jehovah hapi long hem?
3 Helpem Olketa for Duim Samting wea Jehovah Hapi Long Hem: Olketa scripture wea storyim olketa gud samting wea Jehovah duim and wei wea hem lovem iumi savve helpem pipol wea iumi teachim for duim wanem God hapi long hem. Iumi savve iusim olketa scripture olsem Psalm 139:1-4 or Luke 12:6, 7 for helpem olketa for luksavve God barava tingim iumi. Taem olketa luksavve Jehovah barava lovem iumi, datwan bae mekem olketa for lovem God and laek for worshipim hem. (Rome 5:6-8; 1 John 4:19) And tu, taem olketa savve wanem olketa duim hem affectim Jehovah, datwan bae helpem olketa for duim samting wea mekem Jehovah hapi and wea mekhae long hem.—Ps. 78:40, 41; Prov. 23:15.
4. Hao nao iumi savve helpem pipol for disaed seleva for duim wanem Jehovah laekem?
4 Jehovah no forcem eniwan for obeyim olketa law bilong hem. Bat hem helpem iumi for luksavve taem iumi followim wanem hem talem bae iumi kasem gud samting. (Isa. 48:17, 18) Iumi followim example bilong Jehovah taem iumi helpem pipol for disaed seleva for followim wanem olketa lanem. Taem olketa seleva luksavve hem nao stret samting for duim and olketa disaed for changem wei bilong olketa, olketa bae duim wanem olketa disaedem. (Rome 12:2) And tu, olketa bae barava fren gud witim Jehovah, “wea lukluk gud insaed long heart bilong olketa man.”—Prov. 17:3.