Chapter Nine
Paoa Bilong Resurrection Hope
1. Sapos nomoa eni resurrection hope stap, wanem future nao olketa wea dae finis garem?
WASWE, eniwan wea iu lovem hem dae finis? Sapos no eni resurrection stap, no eni hope stap for lukim olketa moa. Olketa bae stap olowe olsem wanem Bible storyim: “Olketa wea dae finis, olketa nating savve long eni samting, . . . from nomoa eni waka or plan or savve or wisdom stap long Sheol [grev], ples wea iu bae go long hem.”—Ecclesiastes 9:5, 10.
2. Wanem nambawan hope nao resurrection hem givim?
2 From mercy bilong hem, thru long resurrection, Jehovah openem nambawan chance for planti million pipol wea dae finis for laef bak and kasem laef olowe. Datwan minim iu savve garem hope wea muvim heart for wanday iu bae lukim moa olketa wea iu lovem wea dae finis insaed niu world bilong God.—Mark 5:35, 41, 42; Acts 9:36-41.
3. (a) Wanem nao olketa wei wea resurrection hem garem important part for mekem purpose bilong Jehovah fulfill? (b) Long wanem taem nao resurrection hope hem barava strongim iumi?
3 Bikos long resurrection, iumi no need for garem nogud wei for fraet long dae. Long wei wea bae no spoelem olketa faithful servant for olowe, Jehovah savve letem Satan killim dae olketa for trae pruvim laea toktok wea hem sei “evri samting wea man garem bae hem givim for saed long soul bilong hem.” (Job 2:4) Jesus hem faithful long God go kasem taem hem dae, dastawe God resurrectim hem for laef long heven. So, Jesus savve tekem go price bilong sakrifaes bilong perfect laef bilong hem olsem man front long throne bilong Dadi bilong hem long heven, wea fit for sevem laef bilong iumi. Thru long resurrection, olketa bilong “smol flock,” wea bae rul witim Christ, garem hope for stap witim hem insaed datfala Kingdom long heven. (Luke 12:32) For nara pipol, hope hem stap for resurrect for kasem laef olowe insaed paradaes earth. (Psalm 37:11, 29) Evri Christian faendem hao datfala resurrection hope hem givim olketa strong ‘winim wanem olketa garem,’ taem olketa kasem test wea mekem olketa feisim dae.—2 Corinthians 4:7.
Why Hem Important Tumas Long Christian Faith
4. (a) Long wanem wei nao resurrection hem wanfala “firstfala teaching”? (b) Hao nao pipol long world ting long resurrection?
4 Olsem Hebrews 6:1, 2 hem talem, resurrection hem wanfala “firstfala teaching.” Hem part long faondeson bilong faith wea iumi needim for kamap mature Christian. (1 Corinthians 15:16-19) Bat, teaching bilong Bible abaotem resurrection hem samting wea pipol long world faendem hard for acceptim. From olketa no garem spiritual tingting, planti pipol ting long laef distaem olsem hem nomoa only laef. So, olketa garem living wea aftarem hapi. Olketa narawan followim olketa religion—wea part and no part bilong Christendom—wea ting olketa garem soul wea no savve dae. Bat datfala biliv hem no agree witim teaching bilong Bible abaotem resurrection, bikos no eni need stap for resurrection sapos olketa man garem soul wea no savve dae. Wei for trae for mekem tufala idea hia join tugeta savve mekem man konfius and no givim hem hope. Hao nao iumi savve helpem olketa wea garem honest heart wea want for herem truth?
5. (a) Bifor man fit for tinghae long resurrection, wanem nao hem need for savve? (b) Wanem scripture nao iu bae iusim for explainim soul? and olketa wea dae finis? (c) Wanem nao iumi savve duim sapos samwan iusim wanfala Bible transleison wea luk olsem hem haedem truth?
5 Bifor pipol olsem fit for luksavve hao resurrection hem wanfala nambawan arrangement, olketa need for garem stretfala savve abaotem soul and olketa wea dae. Planti taem, wei for showim samfala scripture hem inaf for mekem diswan klia long man wea hangre for truth bilong Bible. (Genesis 2:7; Psalm 146:3, 4; Ezekiel 18:4) Bat, samfala Bible transleison distaem haedem truth abaotem soul. So maet iumi need for lukluk long olketa toktok wea stap insaed firstfala languis wea olketa raetem Bible.
6. Hao nao iu savve helpem wanfala man for minim wanem nao soul?
6 New World Translation hem gud tumas for diswan bikos hem evritaem transleitim Hebrew word neʹphesh and sem word long Greek languis, psy·kheʹ olsem “soul.” Appendix bilong disfala transleison garem list bilong planti scripture wea olketa word hia stap. Planti nara Bible transleison no semsem bat maet transleitim sem word olsem “soul” and tu olsem “creature,” “person,” and “laef”; for “neʹphesh bilong mi,” olketa transleitim olsem “mi” and for “neʹphesh bilong iu” olketa transleitim olsem “iu.” Wei for markem olketa nara Bible transleison witim New World Translation bae helpem honest student for luksavve hao firstfala languis wea olketa raetem Bible iusim word “soul” for minim pipol and olketa animal. Bat no enitaem olketa word hia givim idea hao soul hem samting wea man no savve lukim or tasim wea savve lusim body taem man dae and hem go ahed for laef long nara ples.
7. Hao nao bae iu iusim Bible for explainim wanem nao happen long olketa insaed long Sheol? insaed long Hades? insaed long Gehenna?
7 Long sem wei tu New World Translation hem transleitim Hebrew word sheohlʹ olsem “Sheol” and Greek word haiʹdes olsem “Hades” and geʹen·na olsem “Gehenna.” “Sheol” hem garem sem mining olsem word “Hades.” (Psalm 16:10; Acts 2:27) Bible talemaot klia hao Sheol and Hades minim grev bilong olketa man and hem join witim dae, no laef. (Psalm 89:48; Revelation 20:13) Bible story tu abaotem hope for laef bak from grev thru long resurrection. (Job 14:13; Acts 2:31) Long narasaed, no eni hope for laef long future hem stap for olketa wea go long Gehenna, and soul hem no laef or savve long eni samting taem hem go long there.—Matthew 10:28.
8. Hao nao stretfala mining abaotem resurrection hem affectim tingting and akson bilong man?
8 Taem man minim gud olketa samting hia, then hem savve kasem help for minim hao nao resurrection savve affectim hem. Hem savve start for tinghae long love wea Jehovah showimaot taem hem provaedem nambawan samting olsem. Sorre bilong olketa wea lusim samwan wea olketa lovem savve katdaon lelebet taem olketa hapi for luk forward for stap witim olketa moa insaed niu world bilong God. Wei for minim olketa samting hia hem openem wei for iumi savve long mining bilong dae bilong Christ. Olketa Christian long first century luksavve hao resurrection bilong Jesus Christ hem important tumas long Christian faith and diswan openem wei for nara pipol resurrect. Olketa strong for preach abaotem resurrection bilong Jesus and hope wea datwan givim. Long sem wei tu, olketa distaem wea minim and tinghae long resurrection laek tumas for sharem disfala spesol truth witim nara pipol.—Acts 5:30-32; 10:42, 43.
Iusim ‘Key Bilong Hades’
9. Hao nao Jesus firstaem iusim “key bilong dae and bilong Hades”?
9 Evriwan wea bae rul witim Christ insaed Kingdom bilong hem long heven mas dae. Bat olketa savve gud long promis wea hem givim olketa taem hem sei: “Mi dae finis bifor, bat, lukim! Mi laef olowe and olowe, and mi garem olketa key bilong dae and bilong Hades.” (Revelation 1:18) Wanem nao hem minim? Hem point go long laef bilong hemseleva. Hem tu dae. Bat God no leavim hem long Hades. Long mek-thri day, Jehovah seleva mekem hem laef bak olsem wanfala spirit and givim hem wei for kanduit dae. (Acts 2:32, 33; 10:40) For join witim diswan, God givim hem “key bilong dae and bilong Hades” for aotem nara pipol from grev bilong man and from samting wea kamaot from sin bilong Adam. Bikos hem garem olketa key hia, Jesus fit for mekem olketa faithful follower bilong hem for laef bak from dae. Firstaem, hem resurrectim olketa anointed member bilong kongregeson bilong hem, and givim olketa spesol present bilong laef wea kanduit dae long heven, olsem Father bin givim long hem tu.—Romans 6:5; Philippians 3:20, 21.
10. Wanem taem nao resurrection bilong olketa anointed Christian wea faithful hem happen?
10 Wanem taem nao olketa anointed Christian wea faithful bae kasem resurrection long heven? Bible showimaot hao datwan hem start finis. Aposol Paul explainim hao olketa bae laef bak ‘insaed taem wea Christ stap moa,’ wea start long year 1914. (1 Corinthians 15:23) Taem olketa anointed wan wea faithful finisim laef bilong olketa long earth long disfala taem wea hem stap moa, olketa no need for weit long dae bikos Lord bilong olketa kam bak finis. Taem olketa dae, stretawe olketa laef bak olsem spirit, olketa “change, kwiktaem, olsem taem eye open and sat.” Olketa kasem bigfala hapi, from olketa gudfala waka bilong olketa “go witim olketa”!—1 Corinthians 15:51, 52; Revelation 14:13.
11. Wanem resurrection nao planti pipol bae fit for kasem, and wanem taem nao bae diswan start?
11 Bat resurrection bilong olketa wea bae rul long Kingdom for laef long heven hem no only resurrection. From Revelation 20:6 kolem diswan “firstfala resurrection,” diswan showaot narafala resurrection mas kamap bihaen. Olketa wea bae insaed long disfala mek-tu resurrection garem hapi hope for laef olowe insaed wanfala paradaes earth. Wanem taem nao datwan bae happen? Buk bilong Revelation showimaot hao datwan bae happen bihaen God bae aotem “earth and heven”—disfala wicked system, and evriwan wea rul insaed. End bilong disfala old system hem klosap tumas. Bihaen datwan, long taem wea God markem, resurrection long earth bae start.—Revelation 20:11, 12.
12. Hu nao bae insaed long olketa faithful wan wea bae resurrect for laef long earth, and why nao datwan hem nambawan hope?
12 Hu nao bae insaed long datfala resurrection long earth? Olketa faithful servant bilong Jehovah from taem bifor, olketa man and woman wea bikos long strongfala faith bilong olketa long resurrection olketa “no acceptim samfala ransom for kamap free.” Datwan minim olketa no willing for brekem faithful fasin long God mekem olketa savve missim raf wei for dae. Iumi bae hapi tumas for savve long olketa and herem from olketa seleva planti moa information abaotem olketa story insaed long Bible! Witim olketa wea bae resurrect long earth hem Abel, datfala firstfala faithful witness bilong Jehovah; Enoch and Noah, tufala wea no fraet for talemaot warning message bilong God bifor long Flood; Abraham and Sarah, wea welkamim olketa angel; Moses, wea kasem Law long Maunt Sinai; olketa strongfala profet olsem Jeremiah, wea lukim taem Jerusalem distroe long 607 B.C.E.; and John datfala Baptaesa, wea herem taem God seleva sei Jesus hem Son bilong Hem. And tu, planti loyal man and woman wea dae long olketa last day bilong disfala wicked system bae resurrect.—Hebrews 11:4-38; Matthew 11:11.
13, 14. (a) Wanem nao bae happen long Hades and olketa wea dae wea stap long there? (b) Hu nao bae insaed sekson wea resurrect, and why nao olsem?
13 No olketa faithful servant bilong God nomoa bae laef bak from dae, bat gogo nara pipol tu bae laef bak and no eniwan bae stap insaed long grev bilong olketa man. Haomas grev nao bae emti hem showaot long wei wea Jesus iusim ‘key bilong Hades.’ Diswan hem showaot long wanfala vision wea aposol John kasem, wea hem lukim olketa torowem Hades “insaed long lake bilong fire.” (Revelation 20:14) Wanem nao datwan hem minim? Datwan minim Hades, grev bilong olketa man, hem distroe evribit. Hem no stap nao, from no eniwan wea dae stap insaed, bikos Jesus no resurrectim evri faithful worshiper bilong Jehovah nomoa, bat from mercy bilong hem, hem mekem olketa wea no raeteous for laef bak tu. Word bilong God promisim iumi olsem: “Wanfala resurrection bae kamap for olketa wea raeteous and olketa wea no raeteous.”—Acts 24:15.
14 No eniwan long olketa hia wea no raeteous bae laef bak just for herem hao olketa kasem judgment finis for dae moa. Insaed long raeteous living wea bae kamap anda long Kingdom bilong God evriwea long earth, olketa bae kasem help for mekem living bilong olketa fitim olketa wei bilong Jehovah. Datfala vision hem showaot hao “scroll bilong laef” bae open moa. So, olketa bae garem chance for nem bilong olketa stap insaed long datwan. Olketa bae “judgem evriwan fitim samting wea olketa duim” bihaen olketa resurrect. (Revelation 20:12, 13) So, taem olketa kasem judgment, resurrection bilong olketa savve kamap “resurrection bilong laef” and no “resurrection bilong judgment” for dae.—John 5:28, 29.
15. (a) Hu nao bae no kasem resurrection? (b) Trufala savve abaotem resurrection shud affectim iumi long wanem wei?
15 Bat, no evriwan wea laef bifor and dae finis bae resurrect. Samfala duim sin wea no savve kasem forgiveness. Olketa olsem, no insaed long Hades, bat insaed long Gehenna, wea olketa finis for olowe. Insaed sekson hia nao pipol wea bae dae long “big trabol” wea klosap for happen. (Matthew 12:31, 32; 23:33; 24:21, 22; 25:41, 46; 2 Thessalonians 1:6-9) So, nomata Jehovah hem showimaot bigfala mercy for aotem olketa wea dae finis wea stap long Hades, resurrection hope no minim iumi garem reason for followim living wea no kea long distaem. No eni resurrection stap for olketa wea min for againstim sovereign rul bilong Jehovah. Disfala savve shud muvim iumi for showaot iumi barava tinghae long kaenfala fasin bilong God wea iumi no fit for kasem taem iumi followim living wea fitim will bilong hem.
Resurrection Hope Strongim Iumi
16. Hao nao resurrection hope savve givim bigfala strong?
16 Iumi wea barava biliv strong long resurrection hope fit for kasem bigfala strong from datwan. Long distaem, sapos iumi olo, iumi savve iumi kanduit go ahed for missim dae—nomata iumi iusim enikaen samting saed long medicine. (Ecclesiastes 8:8) Sapos iumi bin loyal for servem Jehovah and organization bilong hem, iumi savve luk go long future witim full trust. Iumi savve hao thru long resurrection, bae iumi enjoyim laef moa, long taem wea God markem. And datwan bae hem nambawan laef! Aposol Paul kolem datwan “really laef.”—1 Timothy 6:19; Hebrews 6:10-12.
17. Wanem nao savve helpem iumi for keepim faithful fasin long Jehovah?
17 Wei for savve wanfala resurrection bae kamap and hu nao bae duim datwan mekem iumi fit for garem strongfala faith. Diswan strongim iumi for loyal long God nomata iumi feisim danger for dae from olketa raf pipol wea persecutim iumi. For longtaem nao Satan iusim wei for fraet for dae olsem wei for mekem pipol olsem slave. Bat Jesus no garem wei for fraet olsem. Hem stap faithful long Jehovah go kasem taem hem dae. Thru long ransom sakrifaes bilong hem, Jesus provaedem wei for mekem narafala pipol kamap free from wei for fraet olsem.—Hebrews 2:14, 15.
18. Wanem nao helpem olketa servant bilong Jehovah for garem nambawan record olsem pipol wea keepim faithful fasin?
18 From faith wea olketa garem long present bilong sakrifaes bilong Christ and long resurrection, olketa servant bilong Jehovah garem nambawan record olsem pipol wea keepim faithful fasin. Taem olketa stap anda long hevi, olketa showaot olketa ‘no lovem soul bilong olketa seleva’ winim love bilong olketa for Jehovah. (Revelation 12:11) Olketa wise for no lusim olketa Christian principle long wei for trae for sevem laef bilong olketa distaem. (Luke 9:24, 25) Olketa savve sapos olketa lusim laef bilong olketa distaem from olketa loyal for saportim sovereign rul bilong Jehovah, bae hem givim olketa reward long wei for resurrectim olketa. Waswe, iu garem kaen faith olsem? Iu bae garem sapos iu really lovem Jehovah and iu barava tinghae long really mining bilong resurrection hope.
Review
• Why nao man mas garem savve abaotem soul and olketa wea dae, bifor hem savve tinghae long resurrection?
• Hu nao bae laef bak from dae, and hao nao savve hia shud affectim iumi?
• Hao nao resurrection hope hem strongim iumi?
[Piksa long page 84, 85]
Jehovah promis hao olketa wea raeteous and olketa wea no raeteous bae resurrect