Resurrection Hope Hem Garem Paoa
“Mi lusim evri samting . . . mekem mi fit for savve long [Jesus Christ] and paoa bilong resurrection bilong hem.”—PHILIPPIANS 3:8-10.
1, 2. (a) Planti year go, hao nao wanfala bigman bilong church storyim resurrection? (b) Hao nao resurrection bae kamap?
LONG olketa year bilong 1890, nius hem reportim wanfala sermon wea difren wea wanfala bigman bilong church hem givim long Brooklyn, New York, U.S.A. Datfala man hem sei long resurrection bae olketa hipimap moa and givim bak laef long evri bon and meat wea part long body bilong man, nomata hem dae long fire or accident, or animal kaikaim or hem kamap graon moa. Datfala man for preach sei long wanfala 24-hour day, air bae kamap dark from olketa hand, leg, finger, bon, masol, and skin bilong planti million man wea dae finis. Olketa part hia bae lukaotem olketa nara part bilong sem body. Then olketa soul bae kam from heven and hell for stap insaed olketa body hia wea resurrect.
2 Resurrection thru long wei for joinim moa olketa part long body hem no fitim stretfala tingting, and olketa man no garem soul wea kanduit dae. (Ecclesiastes 9:5, 10; Ezekiel 18:4) Jehovah, God bilong resurrection, no need for joinim moa olketa part bilong body bilong man. Hem savve wakem niu body for olketa wea resurrect. Jehovah givim paoa long Son bilong hem, Jesus Christ, for resurrectim olketa wea dae, witim chance for laef olowe. (John 5:26) Dastawe Jesus sei: “Mi nao resurrection and laef. Man wea showimaot faith long mi, nomata hem dae, bae hem laef bak moa.” (John 11:25, 26) Datwan hem promis wea mekem heart hapi! Hem strongim iumi for stand strong long olketa test and feisim dae tu olsem faithful Witness bilong Jehovah.
3. Why nao Paul need for defendim resurrection?
3 Resurrection hem no agree witim idea hao olketa man garem soul wea kanduit dae—tingting wea Greek savveman, Plato, hem garem. So, wanem nao happen taem aposol Paul witness abaotem Jesus long olketa Greek savveman long Areopagus long Athens, and sei God nao resurrectim hem? Scripture sei: “Taem olketa herem abaot resurrection bilong olketa wea dae finis, samfala start for mekfani.” (Acts 17:29-34) Planti wea lukim Jesus Christ bihaen hem resurrect olketa laef yet and, nomata nara pipol tokspoelem olketa, olketa talemaot hao hem resurrect from dae. Bat olketa giaman teacher insaed kongregeson long Corinth denyim resurrection. So Paul barava defendim disfala Christian teaching long 1 Corinthians chapter 15. Wei for studyim gud olketa point wea hem talem barava pruvim evribit datwan hem tru and paoa bilong resurrection hope.
Strongfala Pruv Long Resurrection Bilong Jesus
4. Paul hem sei hu nao olketa eye witness long resurrection bilong Jesus?
4 Lukim hao Paul hem startim story bilong hem. (1 Corinthians 15:1-11) Sapos olketa bilong Corinth no missim goal bilong wei for biliv, olketa bae hol strong long gud nius bilong salvation. Christ dae for sin bilong iumi, olketa berem hem, and hem laef bak. Tru nao, Jesus wea resurrect finis showim hemseleva long Cephas (Peter), “then long twelvfala.” (John 20:19-23) Samting olsem 500 pipol nao lukim hem, maet taem hem talem disfala komand: ‘Go mek disaepol.’ (Matthew 28:19, 20) James lukim hem, olsem evri faithful aposol tu. (Acts 1:6-11) Klosap long Damascus, Jesus showim hemseleva long Saul “olsem wanfala wea born bifor hem redy”—hem olsem hem resurrect finis for laef olsem spirit. (Acts 9:1-9) Olketa bilong Corinth kamap pipol wea biliv bikos Paul preach long olketa, and olketa acceptim gud nius.
5. Wanem nao olketa reason wea Paul givim long 1 Corinthians 15:12-19?
5 Lukim olketa reason wea Paul talem. (1 Corinthians 15:12-19) From olketa eyewitness sei Christ hem resurrect finis, hao nao pipol savve sei no eni resurrection stap? Sapos Jesus hem no resurrect from dae, preaching waka and faith bilong iumi hem iusles, and iumi pipol wea laea wea talem witness againstim God taem iumi sei hem resurrectim Christ. Sapos olketa wea dae finis no resurrect, ‘iumi stap long olketa sin bilong iumi yet,’ and olketa wea dae finis wea wan mind witim Christ olketa finis olowe. And tu, “sapos long disfala laef nomoa iumi hope long Christ, winim evri man pipol mas sorre long iumi.”
6. (a) Wanem nao Paul talem wea showimaot resurrection bilong Jesus hem barava happen? (b) Wanem nao “lastfala enemy,” and hao nao hem bae finis evribit?
6 Paul talemaot hao resurrection bilong Jesus hem barava happen. (1 Corinthians 15:20-28) Long sem wei wea Christ hem “firstfrut” bilong olketa wea sleep long dae, olketa narawan tu bae resurrect. From dae hem kamaot from wei wea datfala man Adam hem no obey, resurrection hem thru long wanfala man—Jesus. Olketa wea bilong hem bae resurrect long taem wea hem bae stap moa. Christ mekem “kamap olsem samting nating evri gavman and evri rul and paoa” wea againstim paramaunt rul bilong God and hem rul olsem King go kasem taem Jehovah putim evri enemy anda long leg bilong hem. Datfala “lastfala enemy”—dae wea iumi kasem from Adam—bae finis evribit thru long hae kost bilong sakrifaes bilong Jesus. Then Christ bae givim bak Kingdom go long God and Dadi bilong hem, putim hemseleva anda long “Datwan wea putim evri samting anda long hem, for mekem God mas kamap evri samting long evriwan.”
Waswe, Baptaes Hem for Olketa wea Dae Finis?
7. Hu nao “baptaes for kamap olketa wea bae dae,” and wanem nao diswan minim for olketa?
7 Olketa wea againstim resurrection herem disfala kwestin: “Wanem nao bae olketa duim wea baptaes for kamap olketa wea bae dae?” (1 Corinthians 15:29) Paul no minim olketa wea laef bae baptaes for saed long olketa wea dae finis, bikos evri disaepol bilong Jesus mas lane, biliv, and baptaes for hemseleva. (Matthew 28:19, 20; Acts 2:41) Olketa anointed Christian “baptaes for kamap olketa wea bae dae” long wei for go insaed wanfala wei bilong laef wea lead go for dae and resurrection. Kaen baptism hia hem start taem spirit bilong God putim hope for laef long heven insaed long olketa and hem finis taem olketa resurrect from dae witim laef wea kanduit dae long heven.—Romans 6:3-5; 8:16, 17; 1 Corinthians 6:14.
8. Olketa Christian savve sure long wanem nomata sapos Satan and olketa servant bilong hem killim olketa dae?
8 Olsem toktok bilong Paul showimaot, resurrection hope mekem olketa Christian fit for evriday feisim danger and dae taem olketa duim waka for preachim Kingdom. (1 Corinthians 15:30, 31) Olketa savve Jehovah bae resurrectim olketa sapos hem letem Satan and olketa servant bilong hem for killim olketa dae. Jehovah nomoa savve finisim evribit soul, or laef bilong olketa, long Gehenna, wea minim dae olowe.—Luke 12:5.
Need for Lukaot
9. Sapos resurrection hope garem paoa for strongim iumi long living, wanem nao iumi mas stap klia long hem?
9 Resurrection hope strongim Paul. Taem hem long Ephesus, luk olsem olketa enemy bilong hem torowem hem insaed long stadium for faet witim olketa wild animal. (1 Corinthians 15:32) Sapos olsem, hem sev from datwan, olsem Daniel wea sev from olketa lion. (Daniel 6:16-22; Hebrews 11:32, 33) From hem hope long resurrection, Paul no garem tingting olsem olketa apostate bilong Judah long taem bilong Isaiah. Olketa sei: “Letem iumi kaikai and drink, bikos tumoro iumi bae dae.” (Isaiah 22:13, Septuagint) Sapos resurrection hope hem garem paoa for strongim iumi long living olsem Paul, iumi mas stap klia long olketa wea garem diskaen nogud tingting. Paul givim disfala warning: “No letem eniwan giamanim iu. Wei for kaban witim nogud pipol hem spoelem gudfala fasin.” (1 Corinthians 15:33) Tru nao, disfala principle hem fitim olketa difren part bilong living.
10. Hao nao resurrection hope bilong iumi savve stap laef?
10 Paul sei olsem long olketa wea daotem resurrection: “Wekap long kliafala tingting long raeteous wei and no duim sin, from samfala no garem savve bilong God. Mi tok long iufala for mekem iufala feel shame.” (1 Corinthians 15:34) Long disfala “taem bilong end,” iumi need for duim samting followim stretfala savve bilong God and Christ. (Daniel 12:4; John 17:3) Diswan bae mekem resurrection hope bilong iumi hem laef.
Resurrect Witim Wanem Kaen Body?
11. Hao nao Paul givim tokpiksa long resurrection bilong olketa anointed Christian?
11 Next samting, Paul ansarem samfala kwestin. (1 Corinthians 15:35-41) Maet wanfala man wea laek for mekem daot kamap abaotem resurrection ask olsem: “Hao nao olketa wea dae finis bae resurrect? Yes, olketa bae kam witim wanem kaen body?” Olsem Paul showimaot, wanfala seed wea man plantim long graon hem mas dae taem hem change for kamap wanfala niu plant. Olsem tu, man wea born long spirit mas dae. Long sem wei wea wanfala plant garem niu body taem hem kamaot from wanfala seed, body bilong anointed Christian wea resurrect hem difren tu from body bilong man. Nomata hem garem sem fasin and wei bilong laef olsem bifor hem dae, hem resurrect olsem wanfala niu man witim spirit body wea fit for stap long heven. Hem fitim for olketa wea resurrect long earth for laef bak witim body bilong man.
12. Wanem nao toktok “olketa body bilong heven” and “olketa body bilong earth” minim?
12 Olsem Paul talem, body bilong man hem difren from body bilong olketa animal. And tu, body bilong olketa animal difren from narawan. (Genesis 1:20-25) “Olketa body bilong heven” bilong olketa spirit man garem difren glory from “olketa body bilong earth” bilong man. Sun, moon, and olketa star tu garem difren glory. Bat olketa anointed wan wea resurrect garem glory wea barava moa big.
13. Olsem 1 Corinthians 15:42-44 hem talem, wanem nao olketa plantim and wanem nao laef bak?
13 Bihaen hem storyim wei wea olketa samting hia difren, Paul sei moa: “Olsem tu long resurrection bilong olketa wea dae finis.” (1 Corinthians 15:42-44) Hem sei: “Olketa plantim olsem samting wea savve rotten, hem laef bak olsem samting wea no savve rotten.” Long hia Paul maet minim olketa anointed olsem wanfala sekson. From olketa berem olsem samting wea savve rotten taem olketa dae, hem laef bak olsem samting wea no savve rotten, free from sin. Nomata world no givim honor long hem, hem resurrect for laef long heven and showaot klia witim glory bilong Christ. (Acts 5:41; Colossians 3:4) Taem hem dae olketa plantim olsem “physical body” and hem laef bak witim “spiritual body.” From diswan savve happen long olketa Christian wea born long spirit, iumi sure pipol savve laef bak long earth.
14. Hao nao Paul showimaot wei wea Christ hem difren from Adam?
14 Next, Paul showimaot hao Christ hem difren from Adam. (1 Corinthians 15:45-49) Adam, datfala first man, “kamap wanfala living soul.” (Genesis 2:7) “Lastfala Adam”—Jesus—“kamap wanfala spirit wea givim laef.” Hem givim laef bilong hem olsem wanfala ransom sakrifaes, firstaem for olketa anointed follower bilong hem. (Mark 10:45) Olsem olketa man, sekson hia “garem image bilong datwan wea kam from dust,” bat taem olketa resurrect olketa kamap olsem lastfala Adam. Hem tru, sakrifaes bilong Jesus bae helpem evri man wea obey, insaed diswan olketa wea resurrect long earth.—1 John 2:1, 2.
15. Why nao olketa anointed Christian no resurrect witim physical body, and hao nao olketa resurrect long taem wea Jesus stap moa?
15 Taem olketa anointed Christian dae, olketa no laef bak witim physical body. (1 Corinthians 15:50-53) Body and blood wea savve rotten kanduit kasem wei for no rotten and go insaed Kingdom long heven. Samfala anointed wan no need for sleep longtaem long dae. From olketa finisim faithful laef bilong olketa long earth long datfala taem wea Jesus stap moa, olketa “bae change, kwiktaem, olsem taem eye open and sat.” Olketa bae stretawe resurrect for spirit laef wea no savve rotten and witim glory. Gogo, “waef” bilong Christ long heven bae kasem namba bilong 144,000.—Revelation 14:1; 19:7-9; 21:9; 1 Thessalonians 4:15-17.
Winim Dae!
16. Olsem Paul and olketa profet bifor talem, wanem nao bae happen long dae wea man kasem from Adam wea sin?
16 Paul hapi for sei dae bae finis for olowe. (1 Corinthians 15:54-57) Taem samting wea savve rotten and savve dae hem change for no savve rotten and no savve dae, olketa toktok hia bae fulfill: “Dae hem finis evribit.” “Dae, wea nao win bilong iu? Dae, wea nao kill bilong iu?” (Isaiah 25:8; Hosea 13:14) Kill wea mekem dae kamap hem sin, and samting wea strongim sin nao hem Law, wea judgem olketa man for mas dae. Bat from sakrifaes and resurrection bilong Jesus, dae wea man kasem from Adam wea sin hem no win nao.—Romans 5:12; 6:23.
17. Hao nao toktok long 1 Corinthians 15:58 hem fitim distaem?
17 “So, olketa brata wea mi lovem,” Paul hem sei, “stand strong, no seksek, garem planti samting for duim insaed long waka bilong Lord, from iufala savve waka bilong iufala hem no hard waka nating long saed long Lord.” (1 Corinthians 15:58) Olketa toktok hia fitim anointed remnant distaem and “nara sheep” bilong Jesus nomata sapos olketa dae long olketa last day bilong distaem. (John 10:16) Hard waka bilong olketa olsem man for talemaot Kingdom hem no iusles, bikos olketa bae resurrect. So, olsem olketa servant bilong Jehovah, letem iumi busy long waka bilong Lord taem iumi weitim day wea iumi savve singaot witim hapi: “Dae, wea nao win bilong iu?”
Resurrection Hope Fulfill!
18. Hao strong nao hope bilong Paul long resurrection?
18 Toktok bilong Paul long 1 Corinthians chapter 15 showimaot klia hao resurrection hope garem paoa long laef bilong hem. Hem barava sure Jesus laef bak from dae and olketa nara pipol tu bae laef bak from grev bilong olketa man. Waswe, iu garem strongfala biliv olsem? Paul tingim olketa samting wea mekem hemseleva hapi olsem “olketa rabis samting nomoa” and hem willing for “lusim evri samting” mekem hem fit for ‘savve long Christ and paoa bilong resurrection bilong hem.’ Disfala aposol hem willing for kasem dae olsem Christ for garem hope for kasem “firstfala resurrection.” Datfala “firstfala resurrection” olketa 144,000 anointed follower bilong Jesus kasem tu. Tru nao, olketa laef bak for garem spirit laef long heven, bat “olketa narawan wea dae finis” bae resurrect long earth.— Philippians 3:8-11; Revelation 7:4; 20:5, 6.
19, 20. (a) Hu nao olketa insaed Bible wea bae laef bak long earth? (b) Resurrection bilong hu nao iu luk forward long hem?
19 Disfala resurrection hope hem happen finis long nambawan wei for olketa anointed wan wea faithful go kasem dae. (Romans 8:18; 1 Thessalonians 4:15-18; Revelation 2:10) Olketa wea winim “datfala big trabol” bae lukim datfala resurrection hope hem happen long earth taem “sea givim go olketa wea dae insaed long hem, and dae and Hades givim go olketa wea dae insaed long olketa.” (Revelation 7:9, 13, 14; 20:13) Witim olketa wea bae laef bak long earth hem Job, wea lusim sevenfala son and thrifala dota bilong hem. Tingim hapi bilong hem for welkamim olketa moa—and olketa bae hapi tumas for savve olketa garem nara sevenfala brata and thrifala sista wea luk naes tumas!—Job 1:1, 2, 18, 19; 42:12-15.
20 Hem bae naes blessing taem Abraham and Sarah, Isaac and Rebekah—yes and planti moa, and tu “evri profet”—bae resurrect for laef long earth! (Luke 13:28) Wanfala long olketa profet hia nao Daniel, wea kasem promis for resurrect anda long Messiah rul. For samting olsem 2,500 year, Daniel hem rest insaed grev, bat thru long paoa bilong resurrection, klosap nao hem bae ‘standap for share bilong hem’ olsem wanfala “prince long full earth.” (Daniel 12:13; Psalm 45:16) Hem bae gud tumas for welkamim olketa bilong bifor wea faithful, dadi, mami, son and dota bilong iu, or olketa wea iu lovem, wea datfala enemy dae hem tekem!
21. Why nao iumi mas no delay for duim gudfala samting for olketa narawan?
21 Samfala fren and olketa wea iumi lovem servem God finis for planti year and olketa olo nao. Age bilong olketa mekem hem hard for feisim samfala challenge long laef. Hem loving samting for givim help wea iumi fit for givim long olketa long distaem! Then bae iumi no sorre bihaen and sei iumi no helpem olketa sapos olketa dae. (Ecclesiastes 9:11; 12:1-7; 1 Timothy 5:3, 8) Iumi savve sure Jehovah bae no forgetim olketa gudfala samting wea iumi duim for nara pipol, nomata wanem nao age or living bilong olketa. Paul raet olsem: “Sapos iumi garem taem wea hem fitim, letem iumi duim samting wea hem gud long evriwan, bat main wan nao long olketa wea garem sem faith olsem iumi.”—Galatians 6:10; Hebrews 6:10.
22. Go kasem taem wea resurrection hope hem fulfill, wanem nao iumi shud disaed strong for duim?
22 Jehovah hem “Dadi bilong olketa kaenfala mercy and God bilong evri comfort.” (2 Corinthians 1:3, 4) Word bilong hem comfortim iumi and helpem iumi for comfortim nara pipol tu witim strongfala resurrection hope. Go kasem taem wea iumi lukim datfala hope hem fulfill taem olketa wea dae laef bak long earth, letem iumi olsem Paul, wea garem faith long resurrection. Letem iumi barava followim Jesus, wea hope bilong hem long paoa bilong God for resurrectim hem kamap tru. Klosap nao olketa insaed long memory grev bae herem voice bilong Christ and kamaot. Letem diswan givim iumi comfort and hapi. Bat winim evri samting, letem iumi thankiu long Jehovah, wea mekem wei for winim dae hem kamap thru long Lord bilong iumi Jesus Christ!
Wanem Nao Ansa Bilong Iu?
• Olketa hu nao eye witness long resurrection bilong Jesus wea Paul storyim?
• Wanem nao “lastfala enemy,” and hao nao hem bae finis evribit?
• Long saed bilong olketa anointed Christian, wanem nao olketa plantim and wanem nao laef bak moa?
• Hu long olketa wea Bible storyim nao iu laek for meetim taem olketa resurrect for laef long earth?
[Piksa long page 16]
Aposol Paul strong for defendim resurrection
[Piksa long page 20]
Resurrection bilong Job, famili bilong hem, and planti moa bae givim barava bigfala hapi!