Chapter Sixtin
“Garem Barava Strongfala Love for Each Other”
1. Planti taem, wanem nao mekem olketa niu wan wea kam long meeting bilong Olketa Jehovah’s Witness sapraes?
TAEM pipol firstaem kam long olketa meeting bilong Olketa Jehovah’s Witness, planti taem olketa sapraes long love wea olketa lukim long there. Olketa lukim welkam wea evriwan showim and gudfala wei for kaban tugeta. Pipol wea kam long olketa convention bilong iumi lukim disfala love tu. Wanfala man for reportim nius raet olsem abaotem wanfala convention: ‘No eniwan tekem drug or alcohol. No eniwan singaot big or shout. No eniwan pushpush. No eniwan forcem narawan. No eniwan swear or tok nogud. No eniwan talem dirty mekfani or toktok. No eniwan smoke. No eniwan steal. No eniwan torowem emti tin long grass. Hem barava difren.’ Evri samting hia showimaot love, kaen love wea “no duim fasin wea no fitim, hem no luk aotem samting bilong hemseleva nomoa.”—1 Corinthians 13:4-8.
2. (a) Gogo, wanem nao shud showaot klia saed long wei wea iumi showimaot love? (b) For followim Christ, wanem kaen love nao iumi need for mekem grow?
2 Love for brata nao hem mark wea showimaot olketa trufala Christian. (John 13:35) Taem iumi grow long spiritual wei, iumi lane for showimaot love long wei wea moa big. Aposol Paul prea for love wea olketa Christian brata bilong hem showimaot for “kamap moa big.” (Philippians 1:9) Aposol John sei love bilong iumi shud garem wei for sakrifaesim seleva. Hem raet: “Thru long diswan iumi savve long love, bikos datwan [Son bilong God] hem givim soul bilong hem for iumi; and dastawe iumi mas givim soul bilong iumi for olketa brata bilong iumi.” (1 John 3:16; John 15:12, 13) Waswe, bae iumi really givim laef bilong iumi for olketa brata bilong iumi? Nomata long planti taem iumi no need for duim datwan, haomas samting nao iumi duim for helpem olketa, nomata long taem wea no isi for iumi?
3. (a) Long wanem wei nao maet iumi showimaot love bilong iumi long wei wea moa big? (b) Why nao hem important tumas for garem strongfala love for each other?
3 For join witim samting iumi duim wea showimaot spirit for sakrifaesim seleva, iumi need for garem trufala loving feeling for olketa brata bilong iumi. Word bilong God encouragem iumi: “Witim love for olketa brata, garem feeling for each other.” (Romans 12:10) Iumi evriwan feel olsem for samfala pipol. Bat waswe, iumi savve lane for garem loving feeling olsem for samfala moa? Taem end bilong disfala old system kam klosap tumas, hem important for iumi kamap moa klos long olketa Christian brata and sista. Bible sei: “End bilong evri samting hem kam klosap nao. . . . Winim evri samting, garem barava strongfala love for each other, bikos love hem kavarem planti sin.”—1 Peter 4:7, 8.
Taem Olketa Problem Kamap
4. (a) Why nao olketa problem savve kamap midolwan long olketa insaed kongregeson? (b) Nomata iumi maet no evritaem garem feeling for duim, wanem gud samting nao savve kamaot sapos iumi followim kaonsel bilong Bible?
4 Tru, from iumi no perfect, samfala taem bae iumi duim samting wea mekem narawan feel nogud. Olketa brata bilong iumi tu maet sin againstim iumi long samfala difren wei. (1 John 1:8) Sapos samting olsem kasem iu, wanem nao iu shud duim? Scripture hem givim instruction wea iu needim. Bat samting wea scripture talem maet no fitim samting wea iumi wea no perfect garem feeling for duim. (Romans 7:21-23) Nomata olsem, wei wea iumi barava strong for followim kaonsel bilong Bible bae showimaot pruv hao iumi laekem tumas for mekem Jehovah hapi. Wei for duim olsem bae mekem love wea iumi garem for narawan kamap moa deep tu.
5. Sapos samwan mekem iu feel nogud, why nao iu shud no pei bak?
5 Taem pipol feel nogud, samfala taem olketa luk aotem wei for pei bak long datwan wea mekem olketa feel nogud. Bat datwan hem mekem problem kamap moa worse. Sapos need stap for pei bak, iumi shud leavim datwan long God. (Proverbs 24:29; Romans 12:17-21) Maet samfala narawan trae for stap klia long datwan wea mekem olketa feel nogud. Bat iumi shud no duim datwan long olketa wea iumi worship witim, bikos wei wea God acceptim worship bilong iumi wanwan hem depend tu long wei wea iumi lovem olketa brata bilong iumi. (1 John 4:20) Dastawe Paul raet olsem: “Go ahed for patient witim each other and willing for forgivim each other sapos eniwan garem reason for komplen againstim narawan. Olsem Jehovah hem willing for forgivim iufala, iufala mas duim olsem tu.” (Colossians 3:13) Waswe, iu savve duim datwan?
6. (a) Haomas taem nao iumi shud forgivim brata bilong iumi? (b) Wei for luksavve long wanem nao bae helpem iumi for deal witim wanfala sin againstim iumi?
6 Waswe sapos samwan planti taem sin againstim iumi bat hem no duim bigfala sin wea mekem hem fit for disfellowship from kongregeson? For olketa smol sin olsem, aposol Peter tingse man mas forgive “go kasem sevenfala taem.” Bat Jesus sei: “No, Go kasem sevenfala taem, bat, Go kasem seventi-seven taem.” Hem mekhae long wei wea kaon bilong iumi long God hem big fogud sapos iumi markem witim kaon wea eni man maet garem long iumi. (Matthew 18:21-35) Long planti wei iumi sin againstim God evriday—taem iumi duim selfish samting, talem or tingim samting, or fail for duim samting—and maet iumi no luksavve iumi sin. (Romans 3:23) Nomata olsem, God go ahed for showimaot mercy long iumi. (Psalm 103:10-14; 130:3, 4) Hem askem iumi for deal long sem wei witim each other. (Matthew 6:14, 15; Ephesians 4:1-3) Taem olsem iumi bae showimaot love wea “no keepim record bilong rong wea samwan duim.”—1 Corinthians 13:4, 5; 1 Peter 3:8, 9.
7. Wanem nao iumi shud duim sapos wanfala brata garem nogud feeling againstim iumi?
7 Samfala taem nomata iumi no garem nogud feeling long brata bilong iumi, iumi savve hem nao garem nogud feeling long iumi. Iumi savve chus for ‘kavarem witim love,’ olsem 1 Peter 4:8 hem talem. Or iumi savve duim samting firstaem for story witim hem and trae for mek peace witim hem.—Matthew 5:23, 24.
8. Sapos narafala brata duim samting wea mekem iumi feel nogud, wanem nao iumi savve duim?
8 Maet wanfala brata hem duim samting wea mekem no iu nomoa feel nogud bat olketa narawan tu. Waswe, bae hem gud for story witim hem? Maet. Sapos iuseleva storyim datfala problem long hem long kaenfala wei, diswan maet mekem gudfala samting kamap. Bat firstaem, iu mas askem iuseleva: ‘Waswe, hem really duim samting wea againstim Scripture? Or waswe, problem hem kamap bikos mi garem difren kaen living and training taem mi smol?’ Mas careful for no putim olketa standard bilong iuseleva and then judgem nara pipol followim olketa standard hia. (James 4:11, 12) Jehovah no teksaed taem hem acceptim pipol from evri difren kaen living and hem patient witim olketa taem olketa grow long spiritual wei.
9. (a) Hu nao mas stretem olketa wea duim bigfala rong insaed long kongregeson? (b) Wanem taem nao datwan wea samwan sin againstim garem responsibility for duim samting firstaem, and wanem nao goal bilong hem?
9 Sapos wanfala insaed kongregeson hem duim barava bigfala rong, olsem dirty fasin, olketa mas kwiktaem lukluk long datwan. Hu nao bae duim? Olketa elder. (James 5:14, 15) Bat, sapos samwan duim sin againstim narawan, maet long saed long bisnis or nogud toktok, then datwan wea hem sin againstim shud firstaem trae for go lukim hem nomoa firstaem. (Matthew 18:15) Sapos datwan no stretem problem, hem need for duim samfala samting moa, olsem Matthew 18:16, 17 talem. Love for brata bilong iumi wea duim rong and feeling for want for ‘kasem [hem] bak’ olsem brata bae helpem iumi for duim diswan long wei wea kasem heart bilong hem.—Proverbs 16:23.
10. Taem wanfala problem kamap, wanem nao bae helpem iumi for ting abaotem datwan long stretfala wei?
10 Taem wanfala problem kamap, nomata big or smol, bae iumi kasem help sapos iumi trae for minim tingting bilong Jehovah long datwan. Hem no appruvim eni sin, and gogo, olketa wea duim bigfala sin wea no repent bae hem aotem from organization bilong hem. Nomata olsem, iumi mas no forgetim hao iumi evriwan sin long olketa smol wei and needim long-safaring and mercy bilong hem. Jehovah showim example for iumi evriwan followim taem olketa narawan sin againstim iumi. Taem iumi showim mercy, iumi showimaot love bilong hem.—Ephesians 5:1, 2.
Luk Aotem Olketa Wei for “Kamap Moa Waed”
11. Why nao Paul encouragem olketa long Corinth for “kamap moa waed”?
11 Paul stap for planti month for buildimap kongregeson long Corinth, long Greece. Hem waka hard for helpem olketa brata long there, and hem lovem olketa. Bat samfala no garem loving feeling for hem. Olketa barava tok againstim hem. Hem encouragem olketa for “kamap moa waed” long wei for showimaot love. (2 Corinthians 6:11-13; 12:15) Iumi bae kasem gud samting sapos iumi lukluk long hao big nao wei wea iumi showimaot love long olketa and luk aotem olketa wei for kamap moa waed.—1 John 3:14.
12. Hao nao iumi savve mekem love bilong iumi for evriwan insaed kongregeson for grow?
12 Waswe, samfala stap insaed kongregeson wea iumi faendem hard for kamap moa klos long olketa? Sapos iumi traem best for no tingim olketa fasin wea iumi no mas laekem—olsem iumi hope olketa duim for saed bilong iumi—diswan savve help for mekem wei wea iumi fren witim olketa kamap moabeta. Feeling bilong iumi for olketa savve kamap moabeta sapos iumi lukluk long gudfala fasin bilong olketa and ting strong long olketa hia. Diswan bae mekem love wea iumi garem for olketa hem kamap moa big.—Luke 6:32, 33, 36.
13. Hao nao iumi savve kamap moa waed for showim love for olketa insaed kongregeson bilong iumi?
13 Hem tru, iumi no savve duim evriting for nara pipol. Maet iumi no savve sei hello long evriwan long each meeting. Maet iumi no savve invaetem evriwan taem iumi kaikai witim samfala fren long haos. Bat waswe, iumi savve kamap moa waed taem iumi iusim tu-thri minute for savve gud moa long samfala insaed kongregeson bilong iumi? Samfala taem maet iumi invaetem samwan wea iumi no savve gud long hem for waka witim iumi insaed long field ministry?
14. Taem iumi stap midolwan olketa Christian wea iumi nating meetim bifor, hao nao iumi savve showim strongfala love for each other?
14 Olketa Christian convention hem gudfala chance for mekem love bilong iumi kamap moa waed. Planti thousand maet stap. Iumi no savve meetim evriwan long olketa, bat iumi savve duim samting wea showaot iumi ting long olketa firstaem winim iumiseleva. Long taem bilong spell, iumi savve first wan for startim story witim samfala wea stap raonem iumi. Wanday, evriwan wea stap long earth bae olketa brata and sista, wea wan mind for worshipim trufala God and Dadi bilong iumi evriwan. Wei for savve long each other bae givim bigfala hapi! Strongfala love bae muvim iumi for want for duim datwan. Hem gud tumas for start for duim datwan distaem.
Review
• Taem problem kamap midolwan long olketa Christian, hao nao for stretem diswan, and why nao olsem?
• Taem iumi grow long spiritual wei, love bilong iumi tu mas grow long olketa wanem wei?
• Hao nao iumi savve showim strongfala love for samfala moa and no olketa klos fren nomoa?
[Piksa long page 148]
Christian love hem showaot long planti wei, olsem long olketa kongregeson meeting