“Winim Evri Samting, Garem Barava Strongfala Love”
“End bilong evri samting hem kam klosap nao. . . . Winim evri samting, garem barava strongfala love for each other.”—1 PETER 4:7, 8.
JESUS savve hao olketa last hour wea hem stap witim olketa aposol hem barava important. Hem savve wanem bae kasem olketa. Olketa garem bigfala waka for duim, bat pipol bae heitim and persecutim olketa olsem olketa duim long hem. (John 15:18-20) Long datfala last naet wea olketa stap tugeta, planti taem hem remindim olketa abaotem need for “lovem each other.”—John 13:34, 35; 15:12, 13, 17.
2 Aposol Peter, wea stap long datfala naet minim why nao samting Jesus talem hem important. Staka year bihaen, no longtaem bifor Jerusalem hem distroe, Peter raet and strongim why love hem important. Hem kaonselem olketa Christian olsem: “End bilong evri samting hem kam klosap nao. . . . Winim evri samting, garem barava strongfala love for each other.” (1 Peter 4:7, 8) Toktok bilong Peter barava important for pipol wea laef long taem bilong “olketa last day” bilong disfala world. (2 Timothy 3:1) Wanem nao “barava strongfala love” minim? Why nao hem important for iumi garem kaen love olsem for narawan? And hao nao iumi savve showimaot iumi garem diskaen love?
“Barava Strongfala Love”—Hem Wanem?
3 Staka tingse love hem feeling wea mas kamap seleva. Bat Peter no storyim enikaen love nomoa, hem storyim love wea winim evri narawan. Long 1 Peter 4:8 datfala word “love” hem transleison bilong Greek word a·gaʹpe. Disfala word minim love wea no selfish, wea followim principle. Olsem wanfala buk hem sei: “Man fit for showim agape love enitaem, from diskaen love hem no wanfala feeling nomoa bat hem samting wea man savve disaed for showimaot wea bae leadim hem for duim samting.” From iumi born witim feeling for selfish, iumi needim olketa samting for remindim iumi for showim love long each other long wei wea followim olketa principle bilong God.—Genesis 8:21; Romans 5:12.
4 Diswan no minim iumi lovem each other bikos hem samting wea iumi mas duim. A·gaʹpe hem no minim iumi no garem feeling. Peter sei iumi mas “garem barava strongfala [wea minim, “for mekem moa big”] love for each other.”a (Kingdom Interlinear) Nomata olsem, man mas waka hard for garem diskaen love. Saed long datfala Greek word wea olketa transleitim olsem “barava strongfala,” wanfala savveman sei: “Hem mekem man for tingim wanfala sportsman taem hem iusim lalas strong bilong olketa masol for kasem end bilong wanfala resis.”
5 So, wei wea iumi showimaot love hem mas no long wei wea fitim iumiseleva, or for samfala pipol nomoa. Christian love minim iumi mas “mekem moa big” heart bilong iumi, for showimaot love nomata long taem wea datwan maet hard. (2 Corinthians 6:11-13) Hem klia, diskaen love hem samting iumi need for mekem grow and waka hard for garem, olsem sportsman mas training and waka hard for kamap moabeta. Hem important tumas for iumi garem kaen love olsem for each other. Why nao olsem? For thrifala reason.
Why nao Iumi Shud Lovem Each Other?
6 First reason hem “bikos love kam from God.” (1 John 4:7) Jehovah, datwan wea disfala fasin kam from, lovem iumi firstaem. Aposol John sei: “Thru long diswan love bilong God hem showaot long iumi, bikos God sendem only-born Son bilong hem long world mekem iumi savve kasem laef thru long hem.” (1 John 4:9) God “sendem” Son bilong hem long wei wea hem kamap man, duim ministry, and dae long torture stake—evriting hia hem for mekem “iumi savve kasem laef.” Wanem nao iumi shud duim from God showimaot love long barava nambawan wei olsem? John hem sei: “Sapos diswan nao wei wea God lovem iumi, then iumi wanwan garem responsibility for lovem each other.” (1 John 4:11) Lukim hao John hem sei, “Sapos diswan nao wei wea God lovem iumi”—hem no sei iu bat hem sei iumi. Point barava klia: Sapos God lovem olketa brata bilong iumi, then iumi tu shud lovem olketa.
7 Mek-tu reason, hem barava important for iumi barava lovem each other distaem mekem iumi savve helpem olketa brata bilong iumi wea garem need bikos “end bilong evri samting hem kam klosap.” (1 Peter 4:7) Iumi stap long “nogud taem wea hard for deal witim.” (2 Timothy 3:1) Living bilong world, olketa natural disaster, and wei for againstim iumi mekem iumi kasem olketa hard taem. Long olketa hard taem olsem, iumi need for kam moa klos long each other. Barava strongfala love bae mekem iumi garem wan mind wea strong and muvim iumi for “kea for narawan.”—1 Corinthians 12:25, 26.
8 Mek-thri, iumi need for lovem each other bikos iumi no laek “givim eni chance long Devil” for spoelem iumi. (Ephesians 4:27) Satan kwiktaem for iusim wei wea olketa brata bilong iumi no perfect—olketa wik point, rong samting and mistek bilong olketa—olsem olketa samting for mekem iumi foldaon. Waswe, bae toktok wea no tingim feeling bilong man or wei wea brata no showimaot kaenfala fasin mekem iumi lusim kongregeson? (Proverbs 12:18) Bae iumi no duim olsem sapos iumi garem strongfala love for each other! Diskaen love helpem iumi for keepim peace and for servem God “tugeta witim wan mind.”—Zephaniah 3:9.
Hao for Showimaot Iu Lovem Nara Pipol
9 Wei for showimaot love mas start insaed famili. Jesus talem hao pipol bae luksavve long olketa tru disaepol bilong hem from olketa bae garem love for each other. (John 13:34, 35) Love mas showaot no long kongregeson nomoa bat insaed famili tu—midolwan hasband and waef and midolwan parents and olketa pikinini. Hem no inaf for garem nomoa love for olketa insaed famili, iumi need for showimaot datwan long olketa wei wea bae helpem man.
10 Hao nao hasband and waef savve showimaot love for each other? Hasband wea barava lovem waef showimaot hao hem barava tinghae long hem thru long toktok and samting hem duim—long pablik and taem tufala seleva nomoa stap. Hem respectim hem and tinghae long tingting and feeling bilong hem. (1 Peter 3:7) Hem putim interest bilong waef first long interest bilong hemseleva, and hem duim best bilong hem for provaedem olketa need bilong hem long material wei, spiritual saed, and saed long feeling. (Ephesians 5:25, 28) Waef wea barava lovem hasband bae showim “bigfala respect” long hem, nomata long taem hasband no duim samting wea hem laekem. (Ephesians 5:22, 33) Hem sapotim and stap anda long hem, no askem samting wea no fitim, bat waka tugeta witim hem for keepim olketa spiritual samting olsem first samting long laef bilong olketa.—Genesis 2:18; Matthew 6:33.
11 Parents, hao nao iu savve showimaot iu lovem olketa pikinini bilong iufala? Wei wea iu willing for waka hard for provaedem material samting showimaot iu lovem olketa. (1 Timothy 5:8) Bat olketa pikinini no needim nomoa kaikai, kaleko and haos. Olketa needim spiritual training for mekem olketa growap for lovem and servem tru God. (Proverbs 22:6) Diswan minim for markem taem for famili studyim Bible, share long ministry, and attendim olketa Christian meeting. (Deuteronomy 6:4-7) Hem bigfala sakrifaes for evritaem duim olketa samting hia, especially long olketa hardfala taem distaem. Wei for tingim and waka hard for lukaftarem spiritual need bilong olketa pikinini showimaot iu lovem olketa from iu barava interest for olketa kasem laef olowe.—John 17:3.
12 Hem barava important tu for parents showim love long wei for tingim feeling bilong olketa pikinini. Olketa pikinini isi for feel wikdaon, from olketa young olketa need for savve iu lovem olketa. Talem olketa iu lovem olketa, and showimaot diswan thru long samting iu duim, from olketa samting olsem showimaot iu lovem olketa and olketa important long iu. Talem loving toktok for praisem olketa, from diswan mekem olketa savve iu lukim and tinghae long samting olketa duim. Givim discipline witim love, bikos wei for stretem olketa bae mekem olketa savve iu interest long wanem kaen man nao olketa bae kamap. (Ephesians 6:4) Evri gudfala wei olsem for showimaot love bae help for mekem famili hapi, barava klos, and fit for againstim olketa hevi bilong olketa last day.
13 Love muvim iumi for no tingim mistek bilong nara pipol. Tingim hao taem Peter kaonselem olketa wea readim leta bilong hem for “garem barava strongfala love for each other,” hem talem reason why diswan important: “Bikos love kavarem planti sin.” (1 Peter 4:8) For “kavarem” olketa sin hem no minim wei for “haedem” olketa big sin. Hem stret for iumi reportim olketa big sin long olketa wea garem responsibility insaed kongregeson for deal witim datwan. (Leviticus 5:1; Proverbs 29:24) Hem no showimaot love—and no followim Bible—for letem pipol wea duim nogud sin for gohed spoelem pipol wea no duim eniting rong.—1 Corinthians 5:9-13.
14 Staka taem, olketa mistek and rong bilong olketa brata hem smol nomoa. Iumi evriwan savve tok rong or duim rong samting samfala taem, wea mekem narawan feel nogud and sorre tu. (James 3:2) Waswe, iumi shud kwiktaem storyim long nara pipol olketa wik point bilong narawan? For duim olsem bae kosim wei for raoa nomoa midolwan olketa brata long kongregeson. (Ephesians 4:1-3) Sapos iumi followim wei bilong love, iumi bae no “talemaot rong” bilong brata bilong iumi. (Psalm 50:20) Olsem wei wea paint kavarem olketa ples long wall wea no luk gud, love kavarem rong samting wea narawan duim.—Proverbs 17:9.
15 Love bae mekem iumi helpem pipol wea barava garem need. Taem olketa samting insaed long last day gohed for kakamap nogud, long samfala taem olketa brata savve needim material or physical help. (1 John 3:17, 18) Olsem example, waswe, eni member long kongregeson garem hard taem saed long selen or lusim waka bilong hem? Sapos olsem, maet iumi savve givim help long material wei, fitim wanem iumi savve givim. (Proverbs 3:27, 28; James 2:14-17) Waswe, need kamap for fixim samfala samting long haos bilong wanfala olo widow? Maet iumi savve duim samting for fixim datwan.—James 1:27.
16 Wei for showim love long nara pipol hem no for olketa wea stap klosap nomoa long iumi. Long samfala taem maet iumi herem report abaotem olketa servant bilong God long olketa nara kantri wea insaed long trabol bikos long cyclone, earthquake, raoa midolwan pipol. Olketa maet barava needim kaikai, kaleko, and olketa nara samting. Iumi givim help nomata olketa garem difren kala skin or bilong difren tribe. Iumi “garem love for full sekson bilong olketa brata.” (1 Peter 2:17) So, olsem olketa kongregeson long first century, iumi willing for sapotim relief waka wea olketa organizem for givim help. (Acts 11:27-30; Romans 15:26) Taem iumi showim love long olketa difren wei hia, iumi strongim love wea mekem iumi garem wan mind insaed olketa last day distaem.—Colossians 3:14.
17 Love muvim iumi for sharem gud nius bilong Kingdom bilong God witim nara pipol. Tingim example bilong Jesus. Why nao hem preach and teach? Hem “barava feel sorre” long olketa pipol bikos olketa poor long spiritual wei. (Mark 6:34) Olketa giaman shepherd bilong religion no lukaftarem olketa and leadim olketa rong, wea olketa nao shud teachim olketa tru spiritual samting and givim hope long olketa. From bigfala love and fasin for kea nao muvim hem, Jesus comfortim pipol witim “gud nius bilong kingdom bilong God.”—Luke 4:16-21, 43.
18 Distaem tu staka pipol no kasem eni spiritual help, olketa go olobaot and no garem eni hope. Olsem Jesus, sapos iumi tingim and luksavve long spiritual need bilong pipol wea no savve yet long tru God, love and fasin for kea bae muvim iumi for sharem gud nius bilong Kingdom bilong God witim olketa. (Matthew 6:9, 10; 24:14) From shortfala taem nomoa hem stap, hem moa important winim enitaem bifor for preachim disfala message for sevem laef.—1 Timothy 4:16.
“End Bilong Evri Samting Hem Klosap Nao”
19 Tingim, bifor Peter talem kaonsel for lovem each other hem sei: “End bilong evri samting hem klosap nao.” (1 Peter 4:7) Klosap nao niu world bilong raeteous fasin bilong God bae changem disfala wicked world. (2 Peter 3:13) Distaem hem no taem for isisi. Jesus warnim iumi finis: “Lukluk gud long iufala seleva, nogud heart bilong iufala kamap hevi from iufala ova tumas for kaikai and drink and from wari bilong living, and seknomoa datfala day kasem iufala kwiktaem olsem wanfala trap.”—Luke 21:34, 35.
20 So iumi mas “gohed for luk aot,” evritaem tingim hao iumi stap insaed olketa last day. (Matthew 24:42) Iumi mas protectim iumiseleva againstim olketa temptation bilong Satan wea savve pullim tingting bilong iumi. Iumi mas no letem disfala world wea no garem love for stopem iumi for showimaot love long nara pipol. Winim evri samting, iumi laek barava kam klos long tru God, Jehovah, wea klosap nao Messiah Kingdom bilong hem bae fulfillim nambawan purpose bilong hem for earth.—Revelation 21:4, 5.
[Footnote]
a Long 1 Peter 4:8, samfala nara Bible transleison sei iumi mas lovem each other long “honest wei,” “wei wea deep tumas,” or “witim strong.”
OLKETA STUDY KWESTIN
• Wanem last kaonsel nao Jesus talem long olketa disaepol and wanem nao showimaot Peter minim why nao diswan hem important? (Par. 1-2)
• Wanem nao “strongfala love”? (Par. 3-5)
• Why nao iumi shud lovem each other? (Par. 6-8)
• Wanem nao iu savve duim for showimaot iu lovem nara pipol? (Par. 9-18)
• Why nao distaem hem no taem for isisi, and wanem nao iumi shud disaed strong for duim? (Par. 19-20)
[Piksa long page 29]
Famili wea barava klos fit for winim olketa hevi bilong olketa last day
[Piksa long page 30]
Love muvim iumi for helpem pipol wea barava garem need
[Piksa long page 31]
Iu showimaot love taem iu sharem gud nius bilong Kingdom witim nara pipol