Wei for Safa Klosap Finis Nao!

Maet enitaem long laef bilong iu, iu garem kwestin olsem, ‘Why nao staka pipol safa tumas?’ For plande thousand year, olketa man barava safa from olketa war, poor living, olketa disaster, criminal fasin, fasin wea no followim justice, sik, and dae. Long wan handred year wea go pas, pipol barava safa winim enitaem bifor. Waswe, enitaem wei for safa bae finis?

Ia, hem bae finis, and datwan hem barava klosap nao! Word bilong God, Bible, hem sei: “Wicked wan bae finis . . . Bat olketa wea garem kwaet fasin bae kasem earth olsem present, and olketa bae kasem nambawan hapi long bigfala peace.” For haomas year nao bae olketa olsem? “Olketa wea raeteous bae kasem earth olsem present, and olketa bae stap olowe long hem.”—Psalm 37:10, 11, 29.

Bihaen God aotem wicked fasin and wei for safa, earth bae kamap wanfala paradaes. Then pipol bae laef for olowe, and olketa bae hapi and garem perfect health. Word bilong God hem sei: “[God] bae aotem krae from eye bilong olketa, and dae bae nomoa, sorre and singaot and pain bae nomoa tu.”—Revelation 21:4.

Long datfala niu world, olketa wea dae finis tu bae laef bak mekem olketa savve enjoyim olketa blessing hia. Bible hem sei: “Wanfala resurrection bae kamap for olketa wea raeteous and olketa wea no raeteous.” (Acts 24:15) Dastawe Jesus fit for talem wanfala criminal wea repent, and wea showimaot faith long hem: “Iu bae stap witim mi long Paradaes.”—Luke 23:43.

Why Nao Wei for Safa Hem Kamap?

Taem iumi tingim hao God laekem olketa man for garem nambawan future, hem mekem iumi laek for savve, why nao hem letem wei for safa hem kamap? Why nao hem letem diswan gohed for longfala taem finis?

Taem God creatim Adam and Eve, Hem givim long tufala wanfala perfect body and mind. Hem putim tufala insaed wanfala paradaes garden and givim naesfala waka for olketa duim. Bible hem sei: “God lukim evri samting hem wakem and, lukim! hem gud tumas.” (Genesis 1:31) Sapos tufala obeyim God, bae olketa garem olketa pikinini wea perfect, and full earth bae kamap wanfala paradaes, wea pipol savve laef for olowe long trufala peace and hapi.

God wakem Adam and Eve long wei wea tufala free for chusim wanem olketa laekem. Hem no laekem olketa for olsem wanfala trak wea no garem eni tingting and wea followim nomoa steer bilong draeva. Bat, for olketa gohed hapi, olketa mas iusim long stretfala wei, freedom wea olketa garem for disaedem samting, wea minim for obeyim olketa law bilong God. God hem sei: “Mi, Jehovah, mi nao God bilong iufala, Datwan wea teachim iufala for kasem gud samting for iufala seleva, Datwan wea mekem iufala followim road wea iufala mas wakabaot long hem.” (Isaiah 48:17) For iusim rong disfala freedom for disaedem samting bae lead go long bigfala trabol bikos God no creatim man witim savve wea hem needim for independent from God and win. Bible hem sei: “Olketa wei bilong man hem no for hemseleva chusim. Man wea wakabaot no garem right for chusim seleva gogo bilong hem.”—Jeremiah 10:23.

Sorre nao, first parents bilong iumi tingse olketa savve win sapos olketa chus for independent from God. Bat taem olketa rejectim rul bilong God, hem aotem from olketa wei wea hem keepim olketa perfect. So tufala start for kamap olo and gogo olketa dae. From iumi olketa pikinini bilong olketa, iumi kasem tu wei for no perfect and dae.—Romans 5:12.

Main Kwestin—Hu Nao Garem Right for Rul?

Why nao God no distroem Adam and Eve and start moa witim nara man and woman? Bikos Satan kwestinim sapos God garem right for rul. Kwestin hia nao, Hu nao garem right for rul, and hu nao rul long stretfala wei? Taem iumi tingim datwan, waswe, laef bilong olketa man savve kamap moabeta sapos God no rulim olketa? Wei wea God markem inaf taem for olketa man traem wei for barava independent from rul bilong hem, bae showimaot sapos laef bilong pipol bae moabeta taem olketa duim datwan or nomoa. God markem inaf taem for olketa man savve traem olketa difren kaen wei for rul, wei bilong living, economy, and religion bilong olketa seleva.

Wanem nao kamaot from diswan? Long plande thousand year wea go pas, wei for safa hem kamap moa and moa big. Long wan handred year wea go pas, olketa man safa winim enitaem bifor. Long World War II plande million pipol dae. Winim 100 million pipol dae long olketa war. Evriwea long world, pipol duim criminal fasin and raf fasin. Staka million pipol iusim olketa nogud drug. Olketa sik saed long sex gohed for affectim moa and moa pipol. Plande million pipol dae evri year from bigfala hangre and sik. Olketa famili and fasin bilong pipol brekdaon evriwea long world. No eni gavman bilong man fit for stretem olketa problem hia. No eni gavman savve finisim wei for olo, sik, and dae.

Living bilong olketa man distaem hem barava olsem wanem Bible talem abaotem taem bilong iumi. Word bilong God showimaot hao distaem, hem “olketa last day” bilong disfala wicked world, wea iumi bae kasem “nogud taem wea hard for deal witim.” And olsem Bible talem, ‘olketa wicked man and man for laea barava gohed for moa worse.’—2 Timothy 3:1-5, 13.

Klosap Nao Wei for Safa Bae Finis

Evri samting hia pruvim hao iumi klosap long end bilong disfala wei wea man trae for rulim hemseleva wea mekem iumi kasem staka sorre samting. Hem barava klia hao wei for man rulim hemseleva and no stap anda long God, bae nating savve win. Rul bilong God nomoa savve mekem iumi garem peace, hapi, perfect health, and laef olowe. So wei wea Jehovah letem wicked fasin and wei for safa gohed hem klosap for finis. Klosap nao God bae distroem evri nogud samting long disfala world.

Profesi long Bible hem sei: “Long taem bilong olketa king hia [olketa gavman bilong man wea stap distaem] God bilong heven bae startim wanfala kingdom [long heven] wea bae nating savve finis. . . . Diswan bae smasem and finisim evri kingdom hia [olketa gavman distaem], and hem nomoa bae stap for olowe.” (Daniel 2:44) Main teaching insaed Bible nao hem wei wea Kingdom bilong heven bae showimaot klia hao Jehovah nomoa garem right for rul. Taem hem storyim wanfala important part bilong saen bilong “olketa last day,” Jesus hem sei: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.”—Matthew 24:14.

Taem end hem kam, hu nao bae laef? Bible hem sei: “Olketa wea raeteous bae stap long earth, and olketa wea no garem blame bae stap long hem. Bat olketa wicked pipol, olketa bae finis evribit from earth.” (Proverbs 2:21, 22) Olketa wea raeteous nao hem olketa wea lanem will bilong Jehovah and duim datwan. Jesus Christ hem sei: “For kasem laef olowe, olketa mas kasem savve abaotem iu, datfala only tru God, and abaotem datwan wea iu sendem kam, Jesus Christ.” (John 17:3) Tru nao, ‘world gogo for finis, bat man wea duim will bilong God bae stap for olowe.’—1 John 2:17.

Sapos mifala no markem difren, evri scripture hia kam from New World Translation of the Holy Scriptures—With References.