APPENDIX
Jesus Christ—Messiah wea God Promis for Sendem Kam
FOR helpem iumi luksavve long hu nao datfala Messiah wea Jehovah God sendem kam for sevem olketa man, Hem muvim olketa profet long Bible for provaedem information abaotem wei wea hem born, ministry bilong hem, and dae bilong hem. Evri Bible profesi hia fulfill long Jesus Christ. Olketa profesi hia barava fulfill evribit and givim staka information abaotem wei wea olketa bae fulfill. Olsem example, tingim tu-thri profesi wea storyim olketa samting wea join witim taem wea Messiah hem born and olketa year wea hem growap.
Profet Isaiah talem hao datfala Messiah bae born long laen bilong King David. (Isaiah 9:7) Samting wea Isaiah talem hem barava fulfill.—Matthew 1:1, 6-17.
Nara profet bilong God, Micah, talem hao disfala pikinini bae kamap wanfala ruler and hao hem bae born long “Bethlehem Ephrathah.” (Micah 5:2) Long taem wea Jesus hem born, tufala taon long Israel garem nem Bethlehem. Wanfala hem klosap long Nazareth long north part bilong kantri, and narawan hem klosap long Jerusalem long Judah. Firstaem, datfala Bethlehem wea stap klosap long Jerusalem garem nem Ephrathah. Datwan nao taon wea Jesus hem born long hem, barava olsem profesi hem talem!—Matthew 2:1.
Nara profesi long Bible talem hao God bae kolem kamaot datfala Son bilong hem “from Egypt.” Taem hem pikinini yet, olketa tekem Jesus go long Egypt. Datfala profesi fulfill taem olketa lusim Egypt bihaen Herod hem dae.—Hosea 11:1; Matthew 2:15.
Long chart wea garem title “Olketa Profesi Abaotem Messiah,” olketa scripture anda long heding “Profesi” talem information abaotem datfala Messiah. Plis markem olketa hia witim olketa scripture anda long heding “Wei wea Hem Fulfill.” Wei for duim olsem bae strongim go moa wei wea iu trustim samting wea Bible talem.
Taem iu readim olketa scripture hia, tingim hao samfala scripture hia olketa profesi wea olketa raetem plande handred year bifor Jesus hem born. Jesus hem sei: “Evri samting wea olketa raetem insaed long law bilong Moses and insaed long olketa Profet and olketa Psalm abaotem mi mas fulfill.” (Luke 24:44) So Bible barava showimaot klia hao olketa profesi hia fulfill evribit!