Wanem Nao Savve Mekem Famili Bilong Iu for Hapi?

1. Why nao arrangement bilong Jehovah for marit mekem famili hapi?

Gud nius hem kam from Jehovah, datfala hapi God wea laekem olketa famili for hapi. (1 Timothy 1:11) Hem nao startim marit. Wei wea hasband and waef respectim marit bilong tufala bae mekem tufala and olketa pikinini for feel sef and hapi.

Wanem nao tingting bilong God abaotem marit? Hem laekem man and woman wea marit for stap tugeta for olowe. Olketa Christian shud followim law bilong kantri for registerim marit. (Luke 2:1, 4, 5) Jehovah laekem hasband and waef for faithful long tufala. (Hebrew 13:4) Hem heitim wei for divorce. (Malachi 2:16) Bat olketa Christian savve divorce and marit moa sapos partner hem duim adultery.​—Readim Matthew 19:3-6, 9.

2. Wanem nao hasband and waef savve duim for stap gud tugeta?

Jehovah wakem man and woman for tufala helpem tufala long marit. (Genesis 2:18) Hasband wea hem hed long famili, hem nao main wan for provaedem material samting wea famili needim and for teachim olketa abaotem God. From hem lovem waef bilong hem, hem no tingim hemseleva. Hasband and waef shud lovem and respectim tufala. From hasband and waef no perfect, hem important for forgivim narawan mekem tufala hapi long marit bilong tufala.​—Readim Ephesus 4:31, 32; 5:22-25, 33; 1 Peter 3:7.

3. Waswe, iu savve separate from partner bilong iu sapos iutufala no hapi?

Sapos iu feisim samfala problem long marit bilong iu, iutufala evriwan shud waka hard for showimaot love long iutufala. (1 Corinth 13:4, 5) Bible no sei wei for separate bae helpem hasband and waef stretem olketa problem wea savve kamap long marit.​—Readim 1 Corinth 7:10-13.

4. Wanem nao God laekem iufala olketa pikinini for kasem?

Jehovah laekem iufala for hapi. Hem talem iufala best advaes long hao for hapi taem iufala young. Hem laekem iufala for obeyim dadi and mami bilong iufala wea wise and wea laef longtaem winim iufala. Datwan bae mekem iufala kasem gud samting. (Colossae 3:20) Jehovah laekem tu for iufala hapi from iufala duim wanem hem laekem and followim example bilong Son bilong hem.​—Readim Ecclesiastes 11:9–12:1; Matthew 19:13-15; 21:15, 16.

5. Dadi and mami, wanem nao iufala savve duim for helpem pikinini for hapi?

Iufala shud waka hard for provaedem kaikai, ples for stap, and kaleko for olketa pikinini. (1 Timothy 5:8) Bat for pikinini hem hapi, iufala mas teachim olketa tu for lovem God and for followim samting wea hem talem. (Ephesus 6:4) Taem iufala showimaot iufala lovem God, datwan savve barava affectim heart bilong pikinini. Olketa pikinini bae kasem gud samting sapos iufala trainim olketa followim wanem Bible talem.​—Readim Deuteronomy 6:4-7; 2 Timothy 3:15.

Taem iufala encouragem and praisem pikinini, datwan savve helpem olketa for hapi. Iufala mas stretem olketa tu, bikos datwan bae protectim olketa for no duim olketa samting wea savve mekem olketa for no hapi. (Proverbs 22:15) Bat iufala mas no raf taem iufala stretem olketa.​—Readim Colossae 3:21.

Olketa Jehovah’s Witness garem samfala buk wea savve barava helpem olketa dadi and mami and olketa pikinini. Olketa buk hia storyim wanem Bible hem talem.​—Readim Psalm 19:7, 11.