Hem Willing for Waka for Jehovah

1, 2. (a) Wat nao datfala stranger talem lo Mary? (b) Wat nao Mary mas disaedem, and hao nao datwan affectim laef blo hem?

IMAGINIM eye blo Mary barava open big taem hem seke lo wanfala visitor wea arrive lo haos blo hem. Visitor hia no ask for lukim dadi or mami blo hem. Hem kam for lukim hem! Mary sure datfala man hem no from Nazareth. Lo olketa smol taon, hem isi tumas for luksavve sapos difren man hem arrive. No enitaem bifor, Mary herem eniwan story olsem lo hem: “Jehovah hem barava hapi long iu Mary, and hem blessim iu.”—Readim Luke 1:26-28.

² Bible introducem Mary lo iumi, hem dota blo Heli, from taon blo Nazareth lo Galilee. Story blo Mary hem start lo taem wea hem mas mekem olketa big disison. Hem engage for maritim Joseph, wanfala carpenter. Hem no wanfala rich man bat hem man wea garem strong faith lo God. So Mary savve finis hao hem bae garem wanfala simpol laef and waka hard for sapotim hasband blo hem Joseph, and tufala bae garem wanfala famili. Bat, hem seke tumas taem disfala visitor kam for talem hem bae hem kasem wanfala assignment from God, wea hem wanfala responsibility wea bae changem laef blo hem for olowe.

3, 4. For iumi savve gud lo Mary, wat nao iumi need for savve, and wat nao samfala samting wea iumi no need for interest lo hem?

³ Staka pipol sapraes for savve dat Bible no storyim staka samting abaotem Mary. Hem givim lelebet information nomoa abaotem baekgraon blo hem, wei blo hem, and no storyim eniting abaotem lukluk blo hem. Nomata olsem, wat Bible talem abaotem hem barava showimaot hu nao hem.

⁴ For iumi savve gud lo Mary, iumi no need for tingim olketa samting wea olketa religion storyim abaotem hem. So iumi no need for interest lo lukluk blo hem wea pipol paintim, karvem, or lo olketa image. Iumi no need for interest tu lo olketa title wea olketa religion givim lo disfala hambol woman olsem, “Mami blo God” and “Queen blo Heven.” Iumi need for focus nomoa lo wat Bible really talem. Bible storyim olketa nambawan wei blo hem wea showimaot faith blo hem and hao iumi savve followim example blo hem.

Visit From Wanfala Angel

5. (a) Wat nao iumi savve lanem from Mary taem Gabriel first story lo hem? (b) Wanem important leson nao iumi savve lanem from Mary?

⁵ Visitor blo Mary hem no wanfala man, hem angel Gabriel. Taem hem sei lo Mary, “Jehovah hem barava hapi long iu,” datwan mekem Mary for “wari and hem konfius” and hem ting datwan hem no normal wei for startim story witim samwan. (Luke 1:29) Wat nao angel hia minim? Mary no expectim eniwan for tinghae lo hem. Bat disfala angel hem story abaotem wei wea Jehovah God tinghae lo Mary. Datwan hem important lo Mary. Nomata olsem, hem no praod and expectim God for hapi lo hem. Sapos iumi laekem Jehovah for hapi lo iumi, iumi shud no praod and tingse Hem hapi finis lo iumi. Bae iumi lane moa abaotem disfala important leson wea Mary savve gud lo hem. God againstim pipol wea praod bat hem lovem and sapotim olketa wea hambol.—Jas. 4:6.

6. Wanem privilege nao angel givim lo Mary?

⁶ Mary bae barava need for gohed hambol, from hem kasem wanfala barava big privilege from datfala angel. Angel hia explainim hao hem bae garem wanfala pikinini wea bae kamap barava important man for evriwan. Gabriel sei: “Jehovah God bae mekem hem King olsem dadi bilong hem, David, and bae hem King ovarem pipol bilong Jacob for olowe, and Kingdom bilong hem bae no savve finis.” (Luke 1:32, 33) Mary savve lo datfala promis wea God mekem witim David winim wan thousand year bifor. Hem sei wanfala from laen blo David bae rul for olowe. (2 Sam. 7:12, 13) So son blo hem nao bae kamap datfala Messiah wea pipol blo God bin hope for hem staka year finis!

7. (a) Wat nao iumi lanem abaotem Mary from kwestin wea hem askem? (b) Wat nao young pipol distaem lanem from example blo Mary?

⁷ Datfala angel talem tu dat olketa bae kolem datfala pikinini “Son bilong Barava Haefala God.” Hao nao wanfala woman lo earth savve bornem son blo God? Really, hao nao Mary bae fit for garem pikinini? Hem engage lo Joseph, bat tufala no marit yet. Mary hem no hol bak for askem disfala kwestin: “Hao nao bae mi garem baby? No enitaem mi sleep witim eni man.” (Luke 1:34) Tingim hao Mary no feel shame for talem dat hem wanfala virgin. Hem showimaot hem barava tinghae lo wei wea hem virgin. Distaem, staka young pipol no tinghae lo wei for stap olsem wanfala virgin, and olketa savve tok spoelem olketa wea still virgin. Wei blo world hem barava change. Bat Jehovah, no savve change. (Mal. 3:6) Olsem lo taem blo Mary, Jehovah tinghae lo olketa wea followim olketa standard blo hem.—Readim Hebrew 13:4.

8. Nomata Mary hem no perfect, hao nao hem fit for garem pikinini wea perfect?

⁸ Nomata Mary hem wanfala faithful servant blo God, hem no perfect. Sapos olsem, hao nao bae hem fit for garem wanfala perfect pikinini, wea hem Son blo God? Angel Gabriel hem sei: “Holy spirit bae kam long iu and paoa bilong Barava Haefala God bae protectim iu. Dastawe datfala pikinini wea born bae hem holy and olketa bae kolem hem Son bilong God.” (Luke 1:35) Holy hem minim “klin or pure.” From olketa human being no perfect, taem olketa bornem olketa pikinini, olketa pikinini hia tu no perfect. Bat lo disfala situation, Jehovah duim wanfala spesol mirakol. Hem transferem laef blo Son blo hem lo heven go lo bele blo Mary, and then hem iusim paoa blo hem, or holy spirit, for kavarem Mary, for protectim pikinini hia for no kasem sin. Waswe, Mary bilivim samting angel hia talem? Wat nao hem duim?

Wat Mary Duim

9. (a) Why nao olketa wea daotem story blo Mary olketa rong? (b) Hao nao angel Gabriel strongim faith blo Mary?

⁹ Staka teacher blo Christendom and olketa narawan tu, daotem hao wanfala virgin savve bornem wanfala pikinini. Nomata olketa kasem big education, olketa no minim wanfala simpol truth. Olsem angel Gabriel sei, “eni samting wea God talem bae hem mas kamap tru.” (Luke 1:37) Mary bilivim toktok blo Gabriel bikos hem woman wea garem strong faith. Nomata olsem, for garem faith hem no just minim man bilivim samting nomoa. From Mary hem samwan wea ting raonem samting, hem needim tu pruv for faith blo hem. Angel Gabriel givim hem pruv wea strongim faith blo hem. Hem talem Mary abaotem relative blo hem Elizabeth, wea olo and wea evriwan savve hem hard for garem pikinini. God mekem mirakol and Elizabeth fit for garem pikinini!

10. Why nao iumi shud no tingse privilege wea Mary kasem hem isi nomoa?

¹⁰ So wat nao Mary duim? Hem kasem datfala assignment and hem kasem pruv dat God bae duim evri samting wea Gabriel talem bae happen. Iumi shud no tingse disfala privilege hem isi nomoa for hem duim. Wanfala samting wea hem need for ting raonem, hem wei wea hem engage witim Joseph. Hao, Joseph bae still willing for maritim hem taem hem faendaot dat hem babule? Nara samting, datfala assignment hem big responsibility. Hem bae karem insaed bele blo hem, laef blo barava important person lo full universe wea God lovem tumas, hem nao Son blo hem! Mary mas kea for hem taem hem baby and protectim hem from disfala wicked world. Datwan hem big responsibility!

11, 12. (a) Nomata samfala faithful man bifor garem strong faith, wat nao olketa duim taem olketa kasem challenging assignment from God? (b) Wat nao iumi lanem abaotem Mary from samting wea hem duim?

¹¹ Bible showimaot dat nomata samfala faithful man bifor wea garem strong faith, olketa hol bak for acceptim olketa challenging assignment from God. Moses sei hem no savve gud hao for story so hem no fit for spokesman blo God. (Ex. 4:10) Jeremiah hem sei hem “young tumas,” so hem no fit for duim waka wea God assignim lo hem. (Jer. 1:6) And Jonah ranawe from assignment blo hem! (Jonah 1:3) Waswe lo Mary?

¹² Toktok blo Mary hem simpol and showimaot hem hambol and obey, and hem nambawan example blo faith. Hem sei lo angel Gabriel: “Mi wanfala wakaman bilong Jehovah! Samting wea iu talem for mi mas olsem nao.” (Luke 1:38) Wanfala wakaman or slave gele hem duim eni waka wea masta blo hem laekem, laef blo hem stap lo hand blo masta blo hem. Hem nao hao Mary feel abaotem Masta blo hem, Jehovah. Hem feel sef from hem savve laef blo hem stap lo hand blo Jehovah, bikos Jehovah bae loyal lo olketa wea loyal lo hem, and Jehovah bae blessim hem taem hem duim best lo datfala challenging assignment.—Ps. 18:25.

13. If God askem iumi for duim samting wea maet no isi or barava hard, hao nao example blo Mary savve helpem iumi?

¹³ Samfala taem God askem iumi for duim samting wea maet no isi or barava hard for iumi duim. Nomata olsem, Bible givim iumi staka reason for trustim hem, and putim laef blo iumi lo hand blo hem, olsem Mary duim. (Prov. 3:5, 6) Hao, bae iumi trustim Hem? If iumi duim datwan, Jehovah bae rewardim iumi, and datwan bae mekem faith blo iumi lo hem for kamap moa strong.

Visitim Elizabeth

14, 15. (a) Hao nao Jehovah rewardim Mary taem hem visitim Elizabeth and Zechariah? (b) Wat nao iumi lanem abaotem Mary from toktok wea hem talem lo Luke 1:46-55?

¹⁴ Samting wea Gabriel talem lo Mary abaotem Elizabeth barava helpem Mary. Hem savve bae Elizabeth nao barava minim situation blo hem. Mary kwiktaem travel go lo olketa maunten lo area blo Judah, datfala trip maet tekem thri or fofala day. Taem Mary wakabaot go insaed haos blo Elizabeth and Zechariah datfala priest, Jehovah rewardim Mary witim samfala pruv moa for strongim faith blo hem. Taem Elizabeth herem Mary sei hello, semtaem hem feelim datfala baby hem hapi and jamp insaed bele blo hem. God givim holy spirit long Elizabeth and hem kolem Mary “mami bilong Lord bilong mi.” God hem showimaot lo Elizabeth dat son blo Mary bae kamap datfala Messiah, Lord blo hem. And tu, holy spirit muvim hem for praisem Mary bikos hem faithful for obey, and hem sei, bikos hem biliv bae hem “hapi.” (Luke 1:39-45) Yes, evri promis wea Jehovah talem for Mary bae kamap tru!

¹⁵ Then Mary hem toktok, and wat hem talem hem stap insaed lo Bible kam kasem distaem. (Readim Luke 1:46-55.) Diswan hem longest toktok blo Mary insaed Bible, and iumi savve lanem staka samting abaotem Mary from diswan. Toktok blo hem showimaot hem thankiu and tinghae, and hem praisem Jehovah bikos lo privilege wea hem kasem for kamap mami blo datfala Messiah. Hem showimaot strongfala faith wea hem garem bikos hem sei Jehovah savve daonem olketa wea garem paoa and wea praod, and Jehovah helpem olketa wea hambol and poor wea trae for servem hem. Hem showimaot tu dat Mary savve gud lo Bible. Hem talem samting olsem 20-fala difren toktok from olketa Hebrew Scripture!a

16, 17. (a) Hao nao Mary and son blo hem showimaot wanfala wei wea iumi need for followim? (b) Wei wea Mary visitim Elizabeth remindim iumi lo wanem blessing?

¹⁶ Hem showaot klia dat Mary hem barava ting raonem gud toktok blo God. Nomata olsem, hem gohed for hambol and letem olketa Scripture for story, winim wei for hem talem tingting blo hemseleva. Son blo hem wea gohed for grow insaed bele blo hem, bae gogo showimaot tu sem wei taem hem growap, bikos bihaen hem sei: “Samting wea mi teachim long pipol hem no bilong mi bat hem bilong God wea sendem mi kam.” (John 7:16) Hem gud for iumi askem iumiseleva: ‘Hao, mi garem sem wei for respectim and tinghae lo Word blo God? Or waswe, mi savve laek for talem nomoa own idea and teaching blo mi?’ Bat for Mary, wei blo hem showaot klia.

¹⁷ Mary stap witim Elizabeth for thrifala month and for sure tufala barava encouragem each other. (Luke 1:56) Disfala story abaotem visit hia, hem remindim iumi hao wei for garem gud frens hem wanfala blessing. If iumi chusim olketa fren wea barava lovem God blo iumi Jehovah, datwan bae strongim spiritual saed blo iumi and bae iumi kam moa klos lo Jehovah. (Prov. 13:20) Gogo hem taem for Mary go bak hom. Wat nao bae happen taem Joseph savve abaotem situation blo hem?

Mary and Joseph

18. Wat nao Mary talem lo Joseph, and wat nao Joseph duim?

¹⁸ Luk olsem Mary no weit for kasem taem olketa luksavve hem babule. Hem storyim datwan lo Joseph. Maet bifor hem story lo Joseph, hem ting raonem wat nao disfala man wea lovem God bae duim taem hem herem datwan. Nomata olsem, hem storyim lo Joseph and explainim evri samting wea happen. Just imaginim hao Joseph hem feel, luk olsem hem wari tumas. Hem laek forgivim Mary, bat maet hem tingse Mary no faithful lo hem. Bible no talem wat nao hem tingim lo datfala taem. Bat Bible sei Joseph disaed for divorcem hem, bikos lo datfala taem, olketa ting lo olketa wea engage olsem olketa marit finis. Nomata olsem, hem no laek for mek shame lo hem and for pipol tok abaotem hem, so hem disaed for divorcem Mary lo wei wea olketa narawan no savve. (Matt. 1:18, 19) Masbi Mary hem sorre tumas taem hem lukim Joseph hem feel nogud lo disfala situation. Nomata olsem, Mary no feel nogud lo Joseph.

19. Hao nao Jehovah helpem Joseph for mekem best disison?

¹⁹ Jehovah helpem Joseph for mekem best disison. Lo wanfala dream, angel blo God talem hem dat wei wea Mary hem babule hem wanfala mirakol. Datwan mas mekem Joseph barava feel hapi. So hem duim sem samting wea Mary duim finis, wea hem nao for followim wat Jehovah laekem. Hem maritim Mary, and hem redi for duim datfala spesol responsibility for lukaftarem Son blo Jehovah.—Matt. 1:20-24.

20, 21. Wat nao olketa wea marit and olketa wea ting for marit savve lanem from Mary and Joseph?

²⁰ Olketa wea marit and olketa wea ting for marit savve lanem gud samting from disfala couple wea stap 2,000 years go finis. Taem Joseph lukim hao young waef blo hem duim gud waka blo hem olsem wanfala mami, hem hapi tumas dat angel blo Jehovah talem hem for maritim Mary. Joseph mas lanem hao hem important for depend lo Jehovah taem man mekem olketa important disison. (Ps. 37:5; Prov. 18:13) Hem evritaem careful and kaen taem hem mekem disison olsem hed blo famili.

²¹ And wat nao iumi savve lanem from wei wea Mary hem willing for maritim Joseph? Nomata Joseph no bilivim story blo hem lo firstaem, Mary willing for weit and letem hem for disaed, bikos Joseph nao bae hed blo famili. Datwan hem wanfala gud leson for Mary and olketa Christian woman distaem. And nara samting wea iumi lanem, situation wea kamap mekem Joseph and Mary for garem honest wei and gudfala wei for story.—Readim Proverbs 15:22.

22. Wat nao faondeson blo marit blo Joseph and Mary, and wanem nao bigfala waka wea tufala mas duim?

²² Datfala young couple garem best faondeson lo marit blo tufala. Tufala evriwan lovem Jehovah God winim eni nara samting, and tufala barava willing for duim responsibility for kamap parents. Olketa nambawan blessing nao bae olketa kasem bat olketa bae feisim samfala challenge tu. Tufala bae garem bigfala waka for lukaftarem Jesus, wea hem bae kamap nambawan man wea winim eni narawan lo full world.