Wanem Iumi Lanem From Mary

Waswe, iu enitaem feel olsem iu no savve wanem for duim taem wanfala problem or hevi wea iu no tingim hem kasem iu? Waswe, iu taed tumas bikos iu mas stragol for kasem inaf selen evritaem? Maet iu wanfala long staka million pipol wea konfius and fraet bikos olketa mas ranawe from ples wea olketa stap. And iumi evriwan kasem finis datkaen feeling for sorre taem samwan wea iumi lovem hem dae.

WASWE, iu savve tu hao Mary, mami bilong Jesus kasem olketa trabol olsem? Bat Mary winim olketa problem wea hem kasem! Wanem nao iumi savve lanem from Mary?

Pipol evriwea long world savve long Mary. Datwan hem barava fitim bikos Mary duim spesol samting for mekem plan bilong God kamap tru. And staka million pipol nao mekhae long hem. Catholic Church mekhae long Mary olsem Mami wea olketa barava lovem and wea olketa fit for followim faith, hope, and kaenfala wei bilong hem. Staka pipol bilivim hao Mary nao mekem wei for olketa savve fren witim God.

Wanem nao tingting bilong iu abaotem mami bilong Jesus? And main samting, wanem nao tingting bilong God abaotem Mary?

Wanfala Spesol Waka

Mary hem gele bilong Heli, and hem kam from tribe bilong Judah long Israel. Firstfala story long Bible abaotem Mary, hem barava spesol. Wanfala angel visitim Mary and talem olsem: “Jehovah hem barava hapi long iu Mary, and hem blessim iu.” Firstaem Mary konfius and “hem ting raonem wanem nao diswan hem minim.” So datfala angel talem hao God chusim hem for duim wanfala spesol waka for bonem Son bilong God and lukaftarem.​—⁠Luke 1:​26-​33.

Disfala young gele wea no marit garem bigfala waka for duim! Hao nao tingting bilong hem abaotem datwan? Mary maet tingse no eniwan nao bae bilivim story bilong hem. From hem babule, maet Joseph no laekem hem nao, or maet staka pipol tok spoelem Mary tu. (Deuteronomy 22:​20-​24) Mary willing tumas for duim datfala big waka.

Strongfala faith wea Mary garem nao mekem hem for followim wanem Jehovah talem. Mary savve hao God bae lukaftarem hem. Mary talem olsem: “Mi wanfala wakaman bilong Jehovah! Samting wea iu talem for mi mas olsem nao.” Mary willing nomoa for feisim olketa hard taem hia bikos hem tinghae long spesol waka wea hem bae duim for mekhae long nem bilong God.​—⁠Luke 1:​38.

Taem Mary talem Joseph hao hem babule, Joseph no laek for maritim Mary nao. Tufala evriwan mas barava feel nogud tumas long datfala taem. Bible no talem hao long nao datfala hard taem gohed. Bat Mary and Joseph mas feel gud tumas taem angel bilong Jehovah kam for lukim Joseph. Datfala angel talem stret hao wei wea Mary hem babule hem barava spesol and hem talem Joseph for maritim Mary.​—⁠Matthew 1:⁠19-​24.

Hardfala Taem

Staka woman wea babule savve redi firstaem bifor olketa bornem baby bilong olketa, and maet Mary olsem tu. Diswan hem firstfala pikinini bilong hem. Bat samfala samting happen wea lelebet spoelem olketa plan bilong hem. Caesar Augustus mekem wanfala law for evriwan go long hom ples bilong olketa for wanfala census. Taem Mary klosap bornem pikinini, Joseph tekem hem long wanfala gogo wea 150 kilometer farawe, maet long wanfala donkey! Mary lukaotem kwaet ples for bornem pikinini bilong hem, bat ples bilong olketa animal nomoa hem emti bikos evri ples long Bethlehem fulap nao. Hem mas hard tumas for Mary bornem pikinini long ples olsem. Maet hem shame and fraet tu.

Long datfala hard taem long laef bilong Mary, maet hem talem Jehovah evri samting wea kasem hem, and trustim hao Jehovah nao bae lukaftarem hem and baby bilong hem. Gogo, samfala man for lukaftarem sheepsheep kam wea barava laek for lukim datfala baby. Olketa man hia talem samting wea olketa angel talem abaotem disfala pikinini, hao “hem Christ, wea hem nao Lord.” And Bible talem hao, “Mary hem no forgetim olketa toktok hia, and hem ting raonem wanem nao olketa samting hia minim.” Hem ting raonem olketa toktok hia and datwan strongim hem.​—⁠Luke 2:​11, 16-​19.

Waswe long iumi? Iumi tu savve kasem hard taem long laef bilong iumi. And Bible talem hao “taem and wei wea seknomoa samting hem happen” savve kasem iumi evriwan and mekem laef hard tumas for iumi. (Ecclesiastes 9:​11) Sapos datwan kasem iumi, waswe iumi kros nao and tok spoelem God? Bat hao sapos iumi trae for olsem Mary and trae for fren gud go moa witim Jehovah long wei for lane abaotem hem from Bible, and ting raonem wanem iumi lanem? Wei for duim olsem bae strongim iumi go moa for winim olketa hard taem.

Poor and No Eni Ples for Stap

Mary kasem olketa nara hard taem tu, olsem wei for poor and wei for pipol ronem hem from hom ples bilong hem. Waswe, iu kasem olketa hard taem olsem? Wanfala report talem hao, “haf long pipol long world, wea klosap thri billion pipol, kasem lelebet selen nomoa long wanfala day,” and staka million pipol moa mas stragol for garem inaf selen nomata long olketa kantri wea luk olsem olketa rich. Waswe long iu? Hao, iu mas stragol evriday for provaedem kaikai, kaleko, and haos for famili bilong iu, mekem iu barava taed, and barava wikdaon samfala taem?

Bible showim hao Joseph and Mary tufala poor. Hao nao iumi savve? Wanfala long tu-thri samting wea Gospel bilong Matthew, Mark, Luke, and John storyim abaotem Joseph and Mary, hem hao 40-fala day bihaen Mary bornem pikinini, hem and Joseph go long temple for givim “tufala big kurukuru or tufala young wan.”a (Luke 2:​22-​24) Disfala sakrifaes hem for olketa wea poor tumas and no savve givim wanfala sheepsheep. Luk olsem Joseph and Mary stragol evritaem for garem inaf selen. Nomata olsem, famili bilong tufala hapi nomoa. Luk olsem tufala tinghae long olketa spiritual samting.​—⁠Deuteronomy 6:​6, 7.

No longtaem bihaen Jesus hem born, Mary kasem nara hard taem moa. Wanfala angel talem Joseph for tekem famili bilong hem and ranawe go long Egypt. (Matthew 2:​13-​15) Diswan hem mek-tu taem wea Mary mas ranawe from ples wea hem savve gud long hem, bat distaem hem mas go long wanfala difren kantri. Staka Jew stap long Egypt and maet Mary and Joseph go stap witim olketa wantok bilong olketa nomoa. Nomata olsem, maet man savve wari and konfius long staka samting taem hem stap long difren kantri. Waswe, iu and famili bilong iu nao samfala long staka million pipol wea mas go from hom ples bilong olketa mekem pikinini stap gud or for ranawe from danger? Sapos olsem, iu bae minim samfala hard taem wea Mary kasem long Egypt.

Gudfala Waef and Mami

Olketa Gospel no story tumas abaotem Mary. Nomata olsem, iumi savve hao Mary and Joseph garem samting olsem sixfala pikinini. Maet iu sapraes lelebet long datwan. Bat tingim wanem olketa Gospel talem.

Joseph barava tinghae long spesol waka wea Mary garem for bornem Son bilong God. From datwan, Joseph nating sleep witim Mary go kasem taem wea Jesus hem born. Matthew 1:​25 storyim hao Joseph “no sleep witim Mary go kasem taem hem bornem wanfala baby boy.” Disfala toktok “go kasem,” showim hao bihaen Jesus hem born, Joseph and Mary start for sleep tugeta olsem hasband and waef. Olketa Gospel storyim hao gogo, Mary and Joseph garem olketa gele and olketa boy. Olketa haf brata bilong Jesus nao hem James, Joseph, Simon, and Judas. And Mary garem tufala or maet samfala gele tu. (Matthew 13:​55, 56) Bat Mary no babule long mirakol wei witim olketa nara pikinini bilong hem.b

Mary barava tinghae long wei wea hem fren witim God. Law no talem for olketa woman go long Pasova, bat Mary savve gogo witim Joseph evri year long Jerusalem for datfala festival. (Luke 2:​41) For duim datwan hem minim, Mary mas wakabaot go and kam for samting olsem 300 kilometer witim famili bilong hem wea start for kamap staka! Luk olsem famili laekem tumas olketa gogo olsem.

Staka woman distaem followim nambawan wei bilong Mary. Olketa waka hard for duim evri waka wea Bible talem for olketa duim. Olketa mami hia evritaem showimaot wei for patient, no givap and hambol! Wei for ting raonem wei bilong Mary, hem helpem woman for gohed fren gud witim God and no duim nomoa wanem olketa seleva laekem. Olsem Mary, olketa luksavve hao wei for worshipim God tugeta witim hasband and pikinini hem savve strongim famili for waka tugeta.

Bihaen Joseph and Mary and maet samfala pikinini bilong tufala go bak from wanfala festival long Jerusalem, tufala luksavve hao Jesus wea hem 12 year hem no kam bak witim olketa. Tingim feeling bilong Mary taem hem lukaotem boy bilong hem for thrifala day hia. Gogo taem Mary and Joseph faendem Jesus insaed temple, Jesus sei olsem: “Iufala shud savve finis, mi mas stap long haos bilong Dadi bilong mi?” Bible sei moa hao Mary gohed “for ting raonem tu wanem nao olketa samting hia minim.” Datwan showim moa hao Mary hem tinghae long wanem God laekem. Hem barava ting raonem gud evri samting wea happen long Jesus. Staka year bihaen, Mary mas storyim datwan and olketa nara story abaotem Jesus long olketa wea raetem Gospel.​—⁠Luke 2:​41-​52.

No Givap Taem Iumi Safa and Taem Samwan Iumi Lovem Hem Dae

Wanem nao happen long Joseph, stepdadi bilong Jesus? Gospel storyim Joseph wanfala taem nomoa taem Jesus hem smol. Samfala sei diswan minim Joseph dae bifor Jesus start for preach.c Iumi no savve, bat luk olsem Mary hem wanfala widow taem Jesus klosap finisim waka bilong hem long earth. Taem Jesus klosap dae, hem askem aposol John nao for lukaftarem mami bilong hem. (John 19:​26, 27) Luk olsem Jesus bae no duim olsem sapos Joseph hem laef yet.

Joseph and Mary kasem staka hard taem tugeta! Olketa angel kam long tufala, tufala mas ranawe from wanfala rabis man, tu-thri taem tufala mas go from ples wea tufala stap, and mas lukaftarem big famili tu. Maet samfala evening tufala sidaon storyim Jesus, and tingim olketa samting wea bae kasem Jesus and wari sapos tufala teachim hem long stretfala wei. Then gogo, Mary stap seleva nao.

Waswe, hasband or waef bilong iu hem dae? Waswe, iu sorre yet from samwan wea iu lovem hem dae, nomata staka year go pas finis? From faith and savve wea Mary garem abaotem olketa wea bae laef bak, datwan nao strongim hem.d (John 5:​28, 29) Bat gudfala tingting olsem no finisim evri problem bilong Mary. Mary faendem hem hard for lukaftarem pikinini taem hasband no stap olsem staka mami distaem tu.

Hem stret for tingse Jesus nao lukaftarem famili bihaen Joseph hem dae. Taem olketa brata bilong Jesus start for big, olketa tu bae start for duim waka long famili. Taem Jesus “hem thirti year,” hem lusim famili and start for preach. (Luke 3:​23) Klosap evri mami and dadi savve hapi bat sorre taem bigfala boy or gele bilong olketa lusim famili. From olketa duim bigfala waka for lukaftarem pikinini, olketa savve sorre fogud taem pikinini lusim olketa. Waswe, eni pikinini bilong iu lusim famili for go duim wanem olketa laek duim? Waswe, iu tinghae long olketa pikinini, bat laekem olketa for stap klosap? Sapos olsem, iu bae savve minim feeling bilong Mary taem Jesus lusim famili.

Hard Taem wea Iu No Tingim

Maet Mary no tingse disfala hard taem bae kasem hem. Taem Jesus hem preach, staka pipol nao followim hem bat no olketa brata bilong hem. Bible storyim hao “olketa brata bilong Jesus talem diswan bikos olketa no bilivim Jesus hem Son bilong God.” (John 7:⁠5) Mary mas talem olketa finis datfala toktok bilong angel wea sei Jesus hem “Son bilong God.” (Luke 1:​35) Nomata olsem, James, Joseph, Simon, and Judas tingim Jesus olsem big brata bilong olketa nomoa. Famili bilong Mary garem difren tingting abaotem religion.

Bat waswe, datwan mekem Mary wikdaon and givap nao? Barava nomoa nao! Long wanfala taem wea Jesus preach long Galilee, hem kaikai long wanfala haos and samfala pipol kam for herem hem. Hu nao kam for lukaotem Jesus? Mary and olketa brata bilong Jesus nao lukaotem hem. So luk olsem taem Jesus stap klosap, Mary tekem olketa pikinini for go lukaotem hem, maet from hem tingse datwan bae helpem olketa for garem stretfala tingting abaotem Jesus.​—⁠Matthew 12:​46, 47.

Maet iu tu stragol for followim Jesus, bat olketa narawan long famili no duim olsem. No wikdaon or givap! Olsem Mary, staka nating givap for helpem samwan insaed famili for staka year bifor olketa start for change. God barava tinghae long wei wea iumi no givap, nomata pipol herem iumi or nomoa.​—⁠1 Peter 3:​1, 2.

Barava Hardfala Taem

Lastfala hard taem wea Bible sei Mary kasem mas mekem hem sorre fogud winim eni nara hard taem. Mary lukim Jesus, pikinini wea hem barava lovem hem safa and dae taem olketa wantok les long hem. Dae bilong wanfala smol pikinini or pikinini wea big finis hem barava big winim eni nara samting. Olsem profesi toktok talem finis, diswan mekem Mary for barava sorre and feel nogud tumas!​—⁠Luke 2:​34, 35.

Waswe, lastfala hard taem wea Bible storyim wea kasem Mary mekem hem for wikdaon and no showimaot faith long Jehovah nao? Nomoa. Nextfala story abaotem Mary long Bible, hem talem hao Mary “gohed for prea” witim olketa disaepol bilong Jesus. And hem no duim diswan seleva. Olketa nara boy bilong hem stap tu, from distaem olketa start for garem faith long big brata bilong olketa, Jesus. Datwan mas barava strongim Mary!e​—⁠Acts 1:​14.

Mary barava hapi from hem wanfala faithful woman, waef, and mami. Hem kasem staka gudfala blessing. Hem winim staka hard taem and nogud samting. Taem iumi kasem olketa hard taem wea iumi no tingim bae happen or taem iumi wari abaotem problem long famili bilong iumi, iumi savve lane from faithful wei bilong Mary.​—⁠Hebrews 10:⁠36.

Bat waswe, hem stret for iumi worshipim image bilong Mary? Waswe, story long Bible abaotem spesol waka wea Mary duim minim iumi fit for worshipim hem?

[Olketa Footnote]

[Box long page 6]

Waswe, Jesus Garem Olketa Brata and Sista?

Ia, hem garem. Samfala savveman trae for tok againstim datfala tru samting nomata olketa Gospel storyim hao diswan hem tru. (Matthew 12:​46, 47; 13:​54-​56; Mark 6:⁠3) Bat olketa savveman long Bible talem tufala samting abaotem disfala idea hao Mary no bornem eni nara pikinini. First wan, disfala story kamap for sapotim teaching bilong olketa religion wea kamap bihaen, wea sei Mary hem wanfala virgin for full laef bilong hem. Mek-tu, olketa idea hia no garem eni pruv wea showaot datwan hem tru.

Tingim diswan, wanfala idea sei “olketa brata” bilong Jesus, hem olketa pikinini bilong Joseph from first marit bilong hem nomoa. Datfala idea barava no fitim bikos hem minim Jesus hem no firstborn wea fit for kamap king long laen bilong David.​—⁠2 Samuel 7:​12, 13.

Narafala idea sei olketa brata hia hem olketa kasin bilong Jesus nomoa nomata olketa Greek scripture iusim difren toktok for “brata,” “kasin,” and “relative.” Dastawe wanfala savveman, Frank E. Gaebelein sei olketa savveman wea garem tingting olsem nating tok tru nomoa. Hem sei olsem: “Stretfala wei for minim ‘olketa brata’ . . . hem minim olketa boy bilong Joseph and Mary wea minim, olketa brata bilong Jesus from olketa garem sem mami.”

[Box long page 7]

Hem No Fraet for Change

Mary hem wanfala Jew, and hem followim nao Jew religion. Hem savve go long sinagog wea datwan hem ples for worship bilong olketa Jew, and hem savve go tu long temple long Jerusalem. Taem Mary gohed for garem moa savve abaotem olketa plan bilong God, hem start for luksavve hao olketa kastom bilong olketa laen dadi bilong hem no fitim nao wanem God laekem. Olketa bigman bilong Jew nao killim dae Son bilong Mary, datfala Messiah. Bifor olketa duim olsem long Jesus, Jesus talem olketa olsem: “Iufala garem temple bilong iufala, bat iu savve, God lusim hem finis.” (Matthew 23:38) God no blessing moa religion wea Mary big kam insaed.​—⁠Galatians 2:​15, 16.

Luk olsem Mary hem samting olsem 50 year taem Christian kongregeson hem start. Wanem nao bae Mary duim? Waswe, hem ting raonem wei wea hem kam from famili wea followim kastom bilong Jew religion? Waswe, hem mas strong for followim nao olketa laen dadi bilong hem? Waswe, hem sei hem olo tumas nao for change? Barava nomoa nao! Mary luksavve hao God blessim Christian kongregeson, and hem no fraet for change.

[Piksa long page 5]

Olketa ranawe go long Egypt from hom ples bilong olketa

[Piksa long page 8]

Barava nogud samting wea savve kasem wanfala mami