SEKSON 5
Hao for Stap Gud Witim Olketa Relative Bilong Iu
“Kaen long olketa, hambol, no raf, and patient.”—Colossae 3:12
Taem iu marit, iutufala startim wanfala niu famili. Iu bae gohed lovem and respectim parents bilong iu, bat distaem marit partner bilong iu hem important winim eni narawan long disfala earth. Maet hem no isi for samfala relative bilong iu for acceptim diswan. Bat taem iu followim olketa Bible principle, iu savve stap gud witim olketa relative and long semtaem waka hard for iutufala gohed hapi long marit bilong iutufala.
1 GAREM STRETFALA TINGTING ABAOTEM OLKETA RELATIVE BILONG IU
BIBLE HEM SEI: “Respectim dadi and mami bilong iufala.” (Ephesus 6:2) Nomata iu big finis, iu mas gohed for respectim parents bilong iu. Hem stret tu for marit partner bilong iu tingim parents bilong hem. Bible sei “love . . . hem no savve jealous,” so no feel nogud taem marit partner bilong iu duim samting for olketa.—1 Corinth 13:4; Galatia 5:26.
SAMTING IU SAVVE DUIM:
No talem olketa toktok olsem, “Famili bilong iu ting daonem mi olowe nomoa” or “Mami bilong iu evritaem bossim mi”
Tingim feeling wea marit partner bilong iu garem for famili bilong hem
2 SAMFALA TAEM HEM GUD FOR TOK STRET
BIBLE HEM SEI: “Man bae lusim dadi and mami bilong hem and hem bae stap olowe witim waef bilong hem. Tufala bae kamap wanfala body nomoa.” (Genesis 2:24) Taem iu marit, maet mami and dadi bilong iu tingse iu needim tufala for gohed lukaftarem iu and maet tufala tingse hem olraet for talem iufala wanem for duim long marit bilong iutufala.
Iutufala shud agree long wanem olketa parents bilong iutufala savve duim or no savve duim, and then long kaenfala wei talem olketa wanem iutufala laekem. Iu savve tok stret long olketa, bat duim long kaenfala wei. (Proverbs 15:1) Iu bae stap gud witim olketa relative and bae gohed for ‘lovem and no kros’ long olketa taem iu hambol, no raf, and patient.—Ephesus 4:2.
SAMTING IU SAVVE DUIM:
Sapos iu tingse olketa relative ova tumas for talem iufala wanem for duim, storyim datwan witim hasband or waef bilong iu long taem wea iu no kros
Iutufala evriwan mas disaedem hao for deal witim datwan