Minister blo Gud Nius

JEHOVAH givim perfect example for iumi followim, wea hem nao Son blo hem Jesus Christ. (1 Pet. 2:21) Taem eniwan kamap follower blo Jesus, hem bae preachim gud nius olsem wanfala minister blo God. Jesus showim hao diswan bae strongim olketa taem hem sei: “Kam long mi, iufala wea waka hard and wea karem hevi samting, mekem mi savve strongim iufala. Iufala waka witim mi and lane from mi, bikos mi no savve raf and mi hambol. Wei for duim olsem bae strongim iufala.” (Matt. 11:28, 29) Hem fulfillim promis blo hem for olketa wea acceptim datfala invitation!

² From hem Chief Minister blo God, hem askem samfala for follower blo hem. (Matt. 9:9; John 1:43) Hem trainim olketa lo ministry and sendem olketa for go duim sem waka wea hem duim. (Matt. 10:1–11:1; 20:28; Luke 4:43) Bihaen, hem sendem 70-fala man moa for talemaot gud nius abaotem Kingdom blo God. (Luke 10:1, 8-11) Taem Jesus sendem olketa disaepol hia hem talem olketa: “Man wea herem toktok bilong iufala hem herem toktok bilong mi tu. Man wea no laek herem toktok bilong iufala hem no laek herem toktok bilong mi tu. Man wea no laek herem toktok bilong mi hem no laek herem tu toktok bilong man wea sendem mi kam.” (Luke 10:16) Toktok wea Jesus talem showim waka wea hem givim lo olketa disaepol hem barava important. Olketa bae representim Jesus and datfala Most Hae God! Hem semsem tu distaem for evriwan wea acceptim disfala invitation blo Jesus: “Kam followim mi.” (Luke 18:22; 2 Cor. 2:17) Evriwan wea acceptim invitation hia kasem komand for preachim gud nius abaotem Kingdom and mek disaepol.​—Matt. 24:14; 28:19, 20.

³ Taem iumi acceptim invitation blo Jesus for followim hem, iumi garem privilege for “lane abaotem” Jehovah God and Jesus Christ. (John 17:3) Iumi lane abaotem olketa wei blo Jehovah. Witim help blo hem, iumi fit for changem tingting blo iumi, garem niufala wei, and duim samting followim olketa raeteous standard blo Jehovah. (Rome 12:1, 2; Eph. 4:22-24; Col. 3:9, 10) From iumi barava tinghae, datwan mekem iumi for dedicate lo Jehovah and showim datwan taem iumi baptaes lo wata. Taem iumi baptaes, iumi kamap minister blo hem.

⁴ Iumi mas evritaem tingim dat for duim waka blo God, heart blo iumi mas klin and no duim eni nogud samting. (Ps. 24:3, 4; Isa. 52:11; 2 Cor. 6:14–7:1) From iumi garem faith lo Jesus Christ, iumi garem klin konsens. (Heb. 10:19-23, 35, 36; Rev. 7:9, 10, 14) Aposol Paul talem hao evri samting wea olketa Christian duim mas givim glory lo God and for no mekem narawan stambol. Aposol Peter storyim olketa gudfala wei blo iumi savve mekem olketa wea no biliv for kam lo truth. (1 Cor. 10:31, 33; 1 Pet. 3:1) Hao nao iu savve helpem samwan for qualify for joinim iumi olsem minister blo gud nius?

NIU PABLISA

⁵ Taem iu start for conductim Bible study witim samwan wea interest, encouragem hem for storyim wat hem lanem lo olketa narawan. Hem savve story lo olketa relative, frens, workmate, and olketa narawan wea hem meetim. Diswan hem wanfala important samting for duim for teachim olketa niu wan for kamap follower blo Jesus Christ olsem minister blo gud nius. (Matt. 9:9; Luke 6:40) Taem datfala niu wan grow lo spiritual wei and savve hao for duim enitaem witnessing, iumi sure hem bae laek for joinim field ministry.

KASEM OLKETA REQUIREMENT

⁶ Bifor iu invaetem samwan wea firstaem blo hem for go lo preaching, iu shud mek sure hem kasem samfala qualification. Eniwan wea joinim iumi lo field ministry, hem showim lo pablik dat hem joinim Olketa Jehovah’s Witness. Datwan showim hem changem finis laef blo hem for fitim olketa raeteous standard blo Jehovah and hem wanfala anbaptaes pablisa.

⁷ From iu study witim samwan and storyim olketa Bible principle witim hem, maet iu savve lo situation blo hem, iu maet lukim hem followim wat hem lanem. Bat olketa elder bae laek for story witim iutufala abaotem samfala samting lo laef blo hem.

⁸ Coordinator blo body of elders bae arrange for tufala elder (wanfala hem member blo service komiti) for storyim olketa samting hia witim iu and Bible student. Lo olketa kongregeson wea no garem staka elder, wanfala elder and wanfala ministerial servant wea fit savve duim diswan. Olketa brata wea olketa markem shud no delay for duim datwan. If olketa savve abaotem datwan lo meeting, olketa bae story witim iu and Bible study blo iu afta meeting. Bible student shud feel free for story. Bifor olketa appruvim datfala student for anbaptaes pablisa, hem mas kasem olketa requirement hia:

1. (1) Hem bilivim Bible hem toktok blo God. ​—2 Tim. 3:16.

2. (2) Hem savve and bilivim olketa main teaching lo Bible mekem taem olketa askem hem samfala kwestin, hem bae ansarem followim Bible, and no followim teaching blo false religion or tingting blo hemseleva.​—Matt. 7:21-23; 2 Tim. 2:15.

3. (3) Hem followim komand lo Bible for associate witim pipol blo Jehovah lo olketa kongregeson meeting if hem fit for duim datwan.​—Ps. 122:1; Heb. 10:24, 25.

4. (4) Hem savve wat Bible teachim abaotem wei for durong, includim adultery, polygamy, and homosexual, and hem followim wat Bible teachim abaotem olketa samting hia. If hem stap witim samwan lo opposite sex, tufala mas stretem marit blo tufala.​—Matt. 19:9; 1 Cor. 6:9, 10; 1 Tim. 3:2, 12; Heb. 13:4.

5. (5) Hem obeyim law blo God for no ova tumas for drink and no tekem drug.​—2 Cor. 7:1; Eph. 5:18; 1 Pet. 4:3, 4.

6. (6) Hem luksavve why hem important for no associate witim olketa wea garem nogud wei.​—1 Cor. 15:33.

7. (7) Hem no member lo eni organization blo false religion wea hem maet joinim bifor. Hem stop for attendim eni meeting blo olketa and no sapotim eni program blo olketa.​—2 Cor. 6:14-18; Rev. 18:4.

8. (8) Hem no involve insaed eni samting wea join witim politik.​—John 6:15; 15:19; Jas. 1:27.

9. (9) Hem bilivim and followim wat Isaiah 2:4 talem abaotem war.

10. (10) Hem barava laek for kamap wanfala Jehovah’s Witness.​—Ps. 110:3.

⁹ If olketa elder no sure lo wat nao tingting blo student abaotem eniwan lo olketa samting hia, olketa shud askem hem and maet iusim olketa scripture wea stap for story raonem. Hem important for hem luksavve olketa wea joinim Olketa Jehovah’s Witness lo preaching waka mas followim olketa requirement hia wea stap lo Bible. Wat hem talem bae helpem olketa elder for luksavve if hem savve wat hem mas duim and if hem qualify for joinim preaching waka.

¹⁰ Olketa elder shud kwiktaem for letem student savve if hem qualify. Staka taem, olketa bae letem hem for savve lo datwan lo end blo datfala story. If hem qualify, olketa elder bae welkamim hem olsem wanfala pablisa. (Rome 15:7) Olketa shud talem hem for joinim field ministry and givim field service report lo end blo datfala month. Olketa elder savve explainim hao taem Bible student qualify for anbaptaes pablisa and givim first field service report, olketa bae raetem nem blo hem lo Kongregeson Pablisa Record card and putim lo kongregeson record file. Olketa elder tekem information abaotem datfala pablisa mekem organization savve gohed for lukaftarem waka blo Olketa Jehovah’s Witness evriwea lo world and for datfala pablisa savve join insaed olketa spiritual activity and kasem spiritual sapot. And tu, olketa elder bae remindim olketa niu pablisa dat eni information wea iumi kasem abaotem olketa, iumi iusim followim disfala Global Data Protection Policy of Jehovah’s Witnesses wea stap lo jw.org.

¹¹ Taem iumi savve gud lo datfala niu pablisa and showim iumi interest lo wat hem duim, datwan savve barava helpem hem. Datwan savve encouragem hem for givim field service report evritaem and for duim moa samting lo waka blo Jehovah.​—Phil. 2:4; Heb. 13:2.

¹² Taem olketa elder mekem disison hao datfala Bible student qualify for joinim field ministry, hem fit for kasem wanfala copy blo Organize for Duim Will blo Jehovah. Afta hem givim first field service report blo hem, bae olketa announcem lo kongregeson dat hem wanfala niu anbaptaes pablisa.

HELPEM PIKININI

¹³ Olketa pikinini tu savve qualify for preachim gud nius. Jesus story lo olketa pikinini and blessim olketa. (Matt. 19:13-15; 21:15, 16) Nomata parents nao garem responsibility for helpem pikinini blo olketa, maet olketa narawan lo kongregeson laek for helpem olketa young wan wea laek share lo preaching waka. If iu wanfala parents, gud example blo iu lo field ministry bae encouragem pikinini blo iu for strong for duim preaching waka. Taem wanfala pikinini wea garem gudfala wei hem laek for storyim faith blo hem lo olketa narawan, wat help nao hem savve kasem?

¹⁴ Hem gud for parents go lukim wanfala elder lo Kongregeson Service Komiti for storyim if datfala pikinini hem qualify for kamap pablisa. Coordinator blo body of elders bae arrange for tufala elder (wanfala hem member blo service komiti) for story witim datfala pikinini and parents or guardian wea insaed truth. If datfala pikinini savve lo main Bible truth and duim samting wea showim hem laek for share lo ministry, datwan showim hem progress gud. Afta olketa storyim olketa samting hia and olketa nara samting wea apply for olketa adult, tufala elder hia bae disaed if datfala pikinini hem fit for anbaptaes pablisa. (Luke 6:45; Rome 10:10) Taem olketa story witim wanfala pikinini, olketa no need for storyim samfala samting wea olketa savve storyim witim wanfala adult bat wea no apply for wanfala pikinini.

¹⁵ Lo datfala meeting, olketa elder shud praisem datfala pikinini from hem gohed gud and encouragem hem for markem goal for baptaes. Parents tu fit for kasem praise from olketa waka hard for teachim truth lo pikinini. For helpem parents gohed givim help lo pikinini, olketa elder shud talem olketa for readim “Message for Olketa Christian Parents,” wea stap lo page 179-181.

DEDICATION AND BAPTISM

¹⁶ If iu savve and lovem Jehovah taem iu kasem olketa requirement lo Bible and share lo field ministry, iu need for strongim go moa wei wea iu fren witim hem. Hao? Taem iu dedicatem laef blo iu lo Hem and showim datwan taem iu baptaes lo wata.​—Matt. 28:19, 20.

¹⁷ Dedication hem minim iu promis for duim wanfala holy waka. For dedicate lo God hem minim for story lo hem lo prea and promis for iusim laef blo iu for duim waka blo hem and for obeyim hem. Hem minim for worshipim hem nomoa for olowe. (Deut. 5:9) Diswan hem samting wea man seleva nao bae duim. No eniwan bae duim for iu.

¹⁸ Bat iu mas duim nara samting moa. Iu need for showim lo olketa narawan dat iu dedicate finis lo God. Iu duim datwan taem iu baptaes insaed wata, olsem Jesus duim. (1 Pet. 2:21; 3:21) If iu disaed for worshipim Jehovah and laek for baptaes, wat nao iu shud duim? Iu shud talem datwan lo coordinator blo body of elders. Hem bae arrange for samfala elder story witim iu for mek sure iu kasem olketa requirement for baptaes. For samfala information moa, plis reviewim “Message for Anbaptaes Pablisa,” lo page 182-184 lo disfala buk, and “Olketa Kwestin for Olketa wea Laek for Baptaes,” lo page 185-207.

REPORT ABAOTEM MINISTRY

¹⁹ For staka year finis, olketa report abaotem hao tru worship hem gohed evriwea lo world barava encouragem pipol blo Jehovah. From taem wea Jesus talem olketa disaepol dat olketa bae preachim gud nius evriwea lo earth, olketa tru Christian barava laek for savve hao nao datwan bae gohed.​—Matt. 28:19, 20; Mark 13:10; Acts 1:8.

²⁰ Olketa first disaepol blo Jesus hapi tumas for herem hao preaching hem gohed. (Mark 6:30) Bible buk Acts storyim lo Pentecost 33 C.E., samting olsem 120 disaepol nao kasem holy spirit. Then, namba blo olketa disaepol increase for samting olsem 3,000 and then samting olsem 5,000. Report showim “evriday Jehovah gohed for sevem pipol and olketa hia kamap disaepol” and “plande priest tu olketa biliv.” (Acts 1:15; 2:5-11, 41, 47; 4:4; 6:7) Wei wea namba hem gohed for increase mas barava encouragem olketa disaepol! Olketa report hia mas barava encouragem olketa for gohed strong lo waka wea olketa kasem komand for duim, nomata olketa kasem persecution from olketa bigman blo Jew religion!

²¹ Samting olsem 60-61 C.E., Paul raetem lo leta blo hem for olketa lo Colossae dat “gud nius hem gohed for kasem staka ples long world and plande pipol followim datwan” and “evriwan long earth herem finis.” (Col. 1:5, 6, 23) Olketa first Christian obeyim toktok blo God and holy spirit strongim olketa for duim preaching waka bifor system blo olketa Jew hem finis lo 70 C.E. Taem olketa faithful Christian hia herem report abaotem hao waka hem gohed, datwan mas barava encouragem olketa!

²² Olsem tu, organization blo Jehovah distaem traem best for keepim record blo waka wea iumi duim wea fulfillim Matthew 24:14, wea sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.” So iumi wea dedicate lo God garem important waka for duim. Iumi mas traem best for duim disfala preaching waka bifor end hem kam. Jehovah bae mek sure disfala waka hem finis, and if iumi share lo disfala waka, Jehovah bae hapi lo iumi.​—Ezek. 3:18-21.

FIELD SERVICE REPORT BLO IU

²³ Wat nao bae iumi raetem lo report? Field Service Report wea organization provaedem showim information wea iu bae raetem. Bat, olketa information lo daon bae helpem iu.

²⁴ Lo first row wea garem title “Offerim (Printed and Electronic),” raetem total namba blo pablikeson wea iu givim lo olketa wea no baptaes, nomata hem printed or electronic. Lo “Showim Video,” raetem hao many taems iu showim eni video blo iumi.

²⁵ For reportim “Return Visit,” kaontem hao many taems iu go bak for story witim samwan wea interest wea no baptaes yet. Iu savve duim return visit taem iu go lo haos blo man, raetem leta, ringim hem, sendem text message or wanfala e-mail, or go for givim magasin. Each taem wea iu conductim Bible study, iu savve kaontem datwan olsem return visit. Parents savve kaontem wanfala return visit each week taem hem duim famili worship witim pikinini wea no baptaes.

²⁶ Nomata iu conductim Bible study evri week, wanfala Bible study nomoa bae iu reportim each month. Pablisa shud raetem total namba blo olketa difren Bible study wea hem conductim lo datfala month. Bible study hem pipol wea iu study witim olketa wea no baptaes yet. And tu, eni inactive brata or sista wea member blo service komiti askem iu for study witim hem or eniwan wea just baptaes wea no completim yet study lo Enjoyim Laef for Olowe! buk.

²⁷ Hem important for raetem stret “Hour” lo report. Diswan hem taem wea iu spendem lo haos-tu-haos ministry, return visit, conductim Bible study, or eni nara wei for preach lo pipol wea no baptaes. If tufala pablisa waka tugeta, tufala evriwan savve kaontem datfala taem, bat wanfala nomoa bae kaontem eni return visit or eni Bible study wea tufala duim. Dadi and mami wea duim famili worship witim pikinini blo tufala savve kaontem wan hour evri week. Olketa brata savve kaontem taem wea olketa givim pablik tok. Man wea interpret for pablik tok savve kaontem datfala taem tu. Samfala samting wea iumi duim, iumi no need for kaontem taem, olsem for redi for field service or taem iumi duim eni nara samting for iumiseleva.

²⁸ Each pablisa mas followim konsens blo hem wea Bible trainim taem hem disaedem wat taem nao hour blo hem for preach hem start and finis. Samfala pablisa preach lo ples wea pipol staka tumas, bat samfala preach lo territory wea tu-thri pipol nomoa stap and olketa mas wakabaot farawe for kasem. Olketa territory no semsem, and hao olketa pablisa kaontem taem blo olketa lo ministry no semsem. Governing Body no putim eni rul for olketa kongregeson raonem world lo hao for kaontem taem wea olketa spendem lo field service, no eniwan garem waka for judgem iumi abaotem datwan.​—Matt. 6:1; 7:1; 1 Tim. 1:5.

²⁹ Iumi shud raetem full hour lo report blo iumi. Bat samfala pablisa no strong from olketa olo tumas, stap lo wan ples, or no fit for duim staka samting. Olketa hia savve reportim 15 minute nomoa. Nomata hem preach for 15 minute nomoa lo datfala month, hem shud reportim datfala taem. Olketa bae still kaontem hem olsem regular pablisa. Disfala arrangement hem apply tu for eni pablisa wea eni samting happen lo hem wea mekem hem no fit for go aot lo datfala month or bikos hem kasem wanfala big sik. Disfala arrangement hem only for olketa wea no fit for duim staka samting. Service komiti bae disaed sapos pablisa hem qualify for disfala arrangement.

KONGREGESON PABLISA RECORD

³⁰ Olketa raetem field service report blo iu for each month lo Kongregeson Pablisa Record card. Kongregeson nao keepim olketa record hia. If iu plan for muv lo nara kongregeson, letem olketa elder blo iu for savve. Secretary bae mek sure olketa forwardim record blo iu lo niu kongregeson blo iu. Diswan bae helpem olketa elder lo datfala kongregeson for savve lo iu and helpem iu lo spiritual wei. If iu lusim kongregeson blo iu for samting olsem thri month nomoa, plis gohed for sendem bak report blo iu lo hom kongregeson.

WHY IUMI GIVIM FIELD SERVICE REPORT

³¹ Hao, samfala taem iu forget for givim field service report? Hem tru, evritaem iumi needim olketa reminder. Bat if iumi garem stret tingting abaotem wei for givim olketa report and minim why hem important for duim datwan, bae hem isi for iumi tingim field service report.

³² Samfala ask: From Jehovah savve lo wat mi duim lo ministry, why nao mi need for givim report lo kongregeson? Hem tru, Jehovah savve lo wat iumi duim, and hem savve if datwan hem best blo iumi or nomoa. Bat remember, Jehovah recordim namba blo olketa day wea Noah stap insaed ark and namba blo olketa year wea olketa Israelite wakabaot lo wilderness. God recordim namba blo olketa wea faithful and olketa wea disobey. Hem recordim tu hao olketa Israelite gohed for winim land blo Canaan and wat olketa judge blo Israel bin duim. Yes, hem recordim staka samting abaotem wat olketa servant blo hem duim. Hem givim kam disfala record blo olketa samting wea happen, wea datwan showim tingting blo hem abaotem wei for keepim stret record.

³³ Staka samting wea olketa raetem insaed Bible showim stret report and record wea pipol blo Jehovah raetem. Staka taem, if olketa no raetem stret namba blo olketa samting wea happen, bae hem hard for iumi minim gud. Tingim olketa example hia: Genesis 46:27; Exodus 12:37; Judges 7:7; 2 Kings 19:35; 2 Chronicles 14:9-13; John 6:10; 21:11; Acts 2:41; 19:19.

³⁴ Nomata report blo iumi hem no showim evri samting wea iumi duim for Jehovah, datwan barava important for organization blo Jehovah. Lo first century, taem olketa aposol kam bak from wanfala preaching campaign, olketa storyim lo Jesus “evri samting wea olketa duim and wea olketa teachim long pipol.” (Mark 6:30) Samfala taem, olketa report maet showim samfala samting lo ministry wea iumi need for impruv lo hem. Olketa report maet showim hao samfala samting gohed gud bat namba blo pablisa or olketa nara samting hem slow daon. Iumi maet needim encouragement or problem maet stap wea iumi need for stretem. Olketa overseer bae lukluk lo olketa report and trae for stretem eni samting wea maet stopem each pablisa or kongregeson for muv ahed.

³⁵ And tu, olketa report savve helpem organization for savve which ples nao garem big need. Which ples nao gohed gud? Which ples nao no gohed gud? Wat kaen pablikeson nao pipol needim for lanem truth? Olketa report helpem organization for savve hao many buk nao olketa need for wakem mekem iumi savve gohed for duim disfala preaching waka lo olketa difren ples lo world.

³⁶ Olketa report encouragem iumi. Hao, iumi barava hapi taem iumi herem report abaotem preaching waka wea olketa brata and sista duim evriwea lo world? Olketa report wea showim hao namba hem increase helpem iumi for lukim hao organization blo Jehovah hem gohed for grow. Olketa experience encouragem and strongim iumi for gohed duim best lo preaching waka. (Acts 15:3) So hem important for iumi waka tugeta witim kongregeson taem iumi givim field service report and datwan showim iumi tingim olketa brata and sista evriwea lo world. Taem iumi duim datwan, hem showim iumi stap anda lo organization blo Jehovah.​—Luke 16:10; Heb. 13:17.

MARKEM GOAL

³⁷ Iumi no garem eni reason for comparem field service report blo iumi witim olketa narawan. (Gal. 5:26; 6:4) Situation blo evriwan hem no semsem. Bat, iumi savve kasem gud samting taem iumi markem olketa goal wea iumi fit for kasem and datwan bae helpem iumi for luksavve hao iumi progress lo ministry. Taem iumi kasem olketa goal hia, datwan bae mekem iumi satisfae.

³⁸ Hem klia hao Jehovah kwiktaem for hipimap olketa wea hem bae protectim lo taem blo “big trabol.” Iumi stap lo taem wea disfala profesi blo Isaiah hem fulfill: “Datfala smol wan bae kamap wan thousand And datwan wea no big tumas, bae kamap wanfala maeti nation. Mi Jehovah nao bae mekem datwan for happen kwiktaem, lo barava taem blo hem.” (Rev. 7:9, 14; Isaiah 60:22) Hem wanfala privilege for kamap olketa minister blo gud nius lo olketa last day!​—Matt. 24:14.