Kwestin Box
◼ Wanem nao anbaptaes pablisa mas duim saed long olketa meeting and preaching bifor hem savve baptaes?
Taem samwan laek for baptaes datwan hem barava important disison. So hem mas savve wanem nao God laekem hem for duim bifor hem fit for baptaes. And tu, hem mas duim samting for showimaot hem disaed finis for followim wanem God laekem.
Bible sei olketa Christian mas no misstim wei for hipap tugeta. So samwan wea laek for baptaes mas evritaem kam long olketa meeting. (Heb. 10:24, 25) Bae hem koment long olketa meeting tu, and bae hem gud sapos hem joinim finis Theocratic Ministry Skul.
Bible sei tu olketa Christian mas talemaot datfala gud nius and teachim pipol for kamap disaepol. So bifor wanfala anbaptaes pablisa savve baptaes hem mas duim preaching waka evritaem. (Matt. 24:14; 28:19, 20) Haomas month nao hem mas duim preaching waka bifor hem savve baptaes? Bae hem gud for hem anbaptaes pablisa for samfala month for showimaot hem barava laek for duim preaching waka and hem bae gohed for duim datwan evri month. (Ps. 78:37) Bat hem no need for pablisa for longfala taem bifor hem fit for baptaes. Haomas hour nao hem shud reportim evri month? No eni rul hem stap for diswan. Olketa elder shud no comparem wanem wanfala pablisa duim witim wanem nara pablisa duim, bat olketa shud luksavve sapos hem duim best bilong hem.—Luke 21:1-4.
Olketa elder (or ministerial servant long kongregeson wea no garem staka elder) bae luksavve evri pablisa wea laek for baptaes no semsem. So olketa elder need for iusim gudfala tingting taem olketa disaedem sapos man hem fit for baptaes. Datfala man mas showimaot hem barava laek for kamap wanfala Jehovah’s Witness and hem tinghae long privilege for joinim organization bilong Jehovah and for duim preaching waka. Bat olketa elder bae luksavve tu hem no wanfala mature Christian yet and hem gohed for lane for duim gud ministry. Sapos olketa elder disaed wanfala pablisa no fit for baptaes, olketa bae explainim from Bible why nao hem olsem and olketa bae mek sure hem kasem help.