Arrangement for Olketa Ples for Worship

OLKETA wea worshipim Jehovah kasem komand for hipap tugeta for kasem instruction and for encouragem each other. (Heb. 10:23-25) First ples wea pipol wea God chusim, olketa Israelite, savve worship hem “datfala tabernacle, wea hem tent for meeting.” (Ex. 39:32, 40) Bihaen, Solomon son blo David buildim wanfala haos, or temple for givim glory lo God. (1 Ki. 9:3) Afta datfala temple hem distroe lo 607 B.C.E., olketa Jew arrange for meeting lo olketa building wea olketa kolem lo synagogue for worshipim God. Gogo, olketa wakem bak moa temple, and hem kamap main ples for tru worship. Jesus teach lo olketa synagogue and lo temple. (Luke 4:16; John 18:20) Hem teach tu lo wanfala maunten.​—Matthew 5:1–7:29.

² Afta Jesus dae, olketa Christian hipap lo olketa pablik ples and lo haos blo olketa narawan for storyim olketa Scripture and for enjoyim wei for associate witim olketa nara brata and sista. (Acts 19:8, 9; Rome 16:3, 5; Col. 4:15; Philem. 2) Samfala taem olketa Christian lo first Century need for meet lo olketa ples wea no eniwan savve, mekem olketa sev from olketa wea laek persecutim olketa. Tru nao, olketa faithful servant blo God lo bifor barava laek for hipap lo olketa ples for worship mekem “Jehovah nao bae teachim olketa.”​—Isa. 54:13.

³ Distaem tu, olketa savve iusim olketa pablik ples and haos blo olketa narawan for olketa Christian meeting. Olketa savve duim meeting for field service lo haos blo olketa nara Christian. Olketa wea letem haos blo olketa for kaen hipap olsem, ting lo diswan olsem wanfala privilege. Staka feel dat taem olketa duim olsem, datwan strongim olketa lo spiritual wei.

KINGDOM HALL

⁴ Main ples wea Olketa Jehovah’s Witness savve meet hem lo Kingdom Hall. Olketa savve peim wanfala property and buildim niu Kingdom Hall or renovatim wanfala building wea stap finis. For katem daon kost and iusim gud olketa facility blo iumi, samfala kongregeson savve iusim wanfala Kingdom Hall nomoa sapos fitim. Lo samfala ples olketa mas rentim wanfala building. For olketa niu Kingdom Hall and for olketa Kingdom Hall wea garem big renovation, hem fit for olketa duim wanfala dedication program. Bat, if smol renovation nomoa olketa duim lo wanfala Kingdom Hall, olketa no need for duim dedication program.

⁵ Kingdom Hall hem shud no wanfala building wea luk spesol tumas wea mekem pipol sapraes. Design blo olketa Kingdom Hall lo olketa difren ples hem no semsem, bat hem mas fitim ples for worship. (Acts 17:24) For fitim each ples, Kingdom Hall shud comfortable and gud ples for conductim olketa Christian meeting.

⁶ Evri kongregeson blo Olketa Jehovah’s Witness savve duim samting for lukaftarem, and duim maintenance lo Kingdom Hall wea olketa iusim. Olketa no kolektem or askem selen. Wanfala contribution box stap mekem olketa wea attendim meeting savve givim donation for eni expense wea Kingdom Hall iusim. Olketa willing for duim datwan and from heart blo olketa.​—2 Cor. 9:7.

⁷ Evriwan lo kongregeson mas tingim hao hem wanfala privilege for sapotim Kingdom Hall saed lo selen and volunteer tu for klinim, lukaftarem, and fixim eni samting. Staka taem wanfala elder or ministerial servant nao kasem assignment for schedulem disfala waka. Olketa field service grup wea grup overseer or assistant blo hem lukaftarem nao savve klinim Kingdom Hall. Insaed and aotsaed blo Kingdom Hall shud luk fitim standard blo Jehovah and organization blo hem.

⁸ Lo ples wea tu-thri kongregeson iusim wanfala Kingdom Hall, olketa elder lo olketa kongregeson hia bae mekem wanfala Kingdom Hall Operating Komiti, for lukaftarem Kingdom Hall and property blo hem. Body of elders bae chusim wanfala brata for waka olsem operating komiti coordinator. Operating komiti waka anda lo direction blo body of elders for mek sure Kingdom hall mas klin, fixim eni samting wea nogud and olketa samting wea Kingdom Hall needim hem stap. So diswan needim olketa kongregeson wea iusim datfala Kingdom Hall for waka tugeta.

⁹ Taem tu-thri kongregeson iusim wanfala Kingdom Hall, schedule for taem blo meeting savve change. Taem olketa elder wakem schedule for meeting, olketa mas showim olketa tingim and lovem olketa brata and sista. (Phil. 2:2-4; 1 Pet. 3:8) No wanfala kongregeson nao bae mekem disison on behalf lo olketa nara kongregeson. Taem circuit overseer visitim wanfala kongregeson wea iusim datfala Kingdom Hall, olketa nara kongregeson bae adjustim taem wea olketa bae meeting lo datfala week.

¹⁰ Olketa savve iusim Kingdom Hall for wedding and funeral, and Kongregeson Service Komiti nao bae appruvim. Olketa elder hia bae ting raonem gud datfala request and mekem disison blo olketa followim direction wea branch office provaedem.

¹¹ Olketa wea askem permission for iusim Kingdom Hall for olketa samting olsem, mas garem olketa wei blo tru Christian. Olketa mas no duim eni samting wea bae mekem olketa brata and sista for stambol or spoelem nem blo Jehovah or kongregeson. (Phil. 2:14, 15) Anda lo direction blo branch office, olketa savve iusim Kingdom Hall for olketa nara spiritual program, olsem Kingdom Ministry Skul and Pioneer Service Skul.

¹² Evriwan lo kongregeson mas evritaem respectim ples wea olketa iusim for meeting. Hao iumi dressap and evri samting iumi duim mas showim iumi respectim wei wea iumi worshipim Jehovah. (Eccl. 5:1; 1 Tim. 2:9, 10) Taem iumi followim kaonsel abaotem diswan, hem showim iumi tinghae lo olketa Christian meeting.

¹³ Hem important for organize lo olketa meeting. Hem gud for olketa pikinini sidaon witim parents blo olketa. Parents wea garem olketa smol pikinini kasem encouragement for sidaon lo ples wea bae no disturbim olketa narawan if olketa need for tekem pikinini aotsaed for disciplinem olketa or for olketa nara samting.

¹⁴ Olketa brata wea qualify kasem assignment for waka olsem attendant lo olketa meeting lo Kingdom Hall. Olketa mas alert, friendly and iusim gudfala tingting. Responsibility blo olketa hem for welkamim olketa niu wan, helpem olketa wea kam leit for faendem ples for sidaon, recordim namba blo olketa wea attend, and mek sure evriwan feel comfortable taem olketa sidaon lo Kingdom Hall. Lo taem wea fitim, olketa attendant bae remindim olketa parents for lukaftarem pikinini mekem olketa no ran olobaot lo Kingdom Hall bifor and afta meeting or plei lo platform. If pikinini mek noes or krae, attendant savve askem mami or dadi for tekem pikinini hia aotsaed mekem hem no disturbim olketa narawan. Waka blo olketa attendant savve barava helpem evriwan for enjoyim meeting. Hem gud for olketa elder and ministerial servant nao attendant.

KINGDOM HALL CONSTRUCTION

¹⁵ Lo first century, samfala Christian garem staka material samting winim olketa narawan, so aposol Paul raet olsem: “Taem iufala garem plande samting, iufala savve helpem olketa wea needim samting. Then taem iufala needim samting bat olketa garem plande samting, olketa savve helpem iufala tu, mekem iufala evriwan garem samting wea iufala needim.” (2 Cor. 8:14) Hem semsem tu lo taem blo iumi. Contribution blo evri kongregeson raonem world nao olketa putim tugeta for help for buildim and renovatim olketa Kingdom Hall. Organization and olketa kongregeson wea kasem gud samting from olketa contribution hia, barava tinghae lo kaenfala sapot blo olketa brata and sista evriwea lo world.

¹⁶ Branch office assignim olketa kongregeson for garem Kingdom Hall followim wanfala region-wide plan. Branch office disaedem tu taem and wea for buildim and renovatim wanfala niu Kingdom Hall wea stap finis lo branch territory. Taem disaster happen, olketa mekem arrangement for repairim Kingdom Hall wea damage and samfala taem haos blo olketa brata and sista.

¹⁷ Branch office bae organizem olketa volunteer for lukaotem property for baem, for help saed lo Kingdom Hall design, building permit, construction, and maintenance. From staka ples barava needim olketa Kingdom Hall, iumi needim staka volunteer tu. Evri pablisa wea baptaes finis wea qualify and laek for help, kasem encouragement for fillimap wanfala application and givim lo Kongregeson Service Komiti blo olketa. Olketa anbaptaes pablisa tu savve help for buildim or renovatim Kingdom Hall blo olketa.

OLKETA ASSEMBLY HALL

¹⁸ Staka taem olketa Christian lo first century savve meet lo olketa smol grup. Bat samfala taem “staka pipol” nao hipap tugeta. (Acts 11:26) Lo sem wei, pipol blo Jehovah distaem garem olketa big hipap for olketa circuit assembly and regional convention. Olketa savve rentim samfala ples for duim diswan, bat for samfala wea no garem ples wea fitim or no eni ples available, olketa savve iusim wanfala ples for worship wea olketa kolem Assembly Hall.

¹⁹ Samfala taem, olketa baem wanfala building, renovatim, and iusim olsem Assembly Hall. Staka taem olketa baem land and wakem wanfala niu building. Size blo olketa Assembly Hall hem no semsem, depend lo need blo each ples. Branch office savve mekem disison for baem or wakem wanfala building olsem, only afta olketa lukluk gud lo kost and haomas taem bae olketa iusim datfala building.

²⁰ Branch office appointim olketa brata for lukaftarem and duim maintenance lo Assembly Hall. Olketa mekem arrangement for olketa circuit duim klining afta each assembly program, duim klining tufala taem lo year, and duim maintenance. Hem gud for olketa brata and sista volunteer for duim disfala waka. So olketa kongregeson kasem encouragement for sapotim olketa arrangement hia witim full heart.​—Ps. 110:3; Mal. 1:10.

²¹ Samfala taem, olketa savve iusim Assembly Hall for olketa nara theocratic program, olsem olketa Bible skul and spesol meeting for olketa circuit overseer. Olsem Kingdom Hall, Assembly Hall hem ples wea olketa dedicatem for worship. Taem iumi meeting lo Assembly Hall, wei blo iumi and hao iumi dressap shud showim respect, semsem olsem taem iumi go meeting lo Kingdom Hall for worship.

²² Staka niu wan olketa kwiktaem for kam insaed organization blo God lo last part lo olketa last day hia. Diswan pruvim blessing blo Jehovah. (Isa. 60:8, 10, 11, 22) So iumi laek for sapotim olketa arrangement for garem, and keepim gud olketa ples for worship. Taem iumi duim olsem, datwan showim iumi tinghae lo olketa ples hia wea mekem iumi gohed for encouragem olketa narawan taem iumi lukim day blo Jehovah hem kakam klosap.