“Kam Long Mi, . . . and Mi Bae Strongim Iufala”
Barava Bigfala Increase Mekem Need Kamap for Grow Kwiktaem
“KAM long mi, . . . and mi bae strongim iufala,” Jesus Christ sei. (Matthew 11:28) Hem wanfala nambawan invitation from Hed bilong Christian kongregeson! (Ephesians 5:23) Taem iumi ting raonem toktok hia, iumi bae barava tinghae long wanfala important wei for kasem strong—wei for kaban witim olketa spiritual brata and sista bilong iumi long olketa Christian meeting. Iumi barava agree witim man wea raetem psalm wea sing olsem: “Hem gud and naes tumas for olketa brata for stap tugeta long wan mind!”—Psalm 133:1.
Tru nao, olketa wea iumi meetim long taem for hipap for worship nao olketa best wan for kaban witim, and spiritual feeling long there hem sef and naes. Dastawe nao wanfala young Christian hem sei: “Mi go long skul for full day, and hem mekem mi wikdaon. Bat olketa meeting olsem wata midolwan long desert, wea mi savve kasem strong for deal witim next day long skul.” Wanfala young wan from Nigeria sei: “Mi lukim hao wei for kaban long klos wei witim olketa narawan wea lovem Jehovah helpem mi for stap klos long hem.”
Olketa Kingdom Hall bilong Olketa Jehovah’s Witness hem main ples for tru worship insaed long community. Long planti ples, olketa garem olketa meeting long Kingdom Hall samting olsem tufala taem evri week, and olketa kwiktaem for encouragem olketa Bible student for attend mekem olketa kasem strong from wei for kaban long there.—Hebrews 10:24, 25.
Wanfala Big Need
Bat, no evri Jehovah’s Witness garem gudfala Kingdom Hall. Barava bigfala increase bilong olketa wea talemaot Kingdom evriwea long world hem mekem bigfala need kamap. Need hem for planti thousand Kingdom Hall, especially long olketa poor kantri.—Isaiah 54:2; 60:22.
Olsem example: Bifor long kapitol bilong Democratic Republic of Congo, 290 kongregeson stap bat olketa garem tenfala Kingdom Hall nomoa. Datfala kantri garem bigfala need for planti Kingdom Hall. Long Angola klosap evri kongregeson savve meeting aotsaed nomoa from no inaf Kingdom Hall. Planti nara kantri tu garem olketa semkaen need.
Dastawe, start kam long 1999, olketa organizem waka for helpem Kingdom Hall construction long olketa kantri wea no garem planti samting. For helpem olketa building project long olketa kantri olsem, samfala Witness wea garem savve volunteer for disfala waka. Taem olketa waka witim olketa willing volunteer bilong olketa ples hia, olketa samting wea kamaot from datwan barava gud tumas. And tu, olketa Witness long datfala ples kasem gud samting from training wea olketa kasem. Evri samting hia help for buildim olketa Kingdom Hall long each kantri wea garem need.
Olketa kasem gudfala help for Kingdom Hall construction taem olketa changem plan for fitim ples and for iusim olketa bush material. Goal hem no just for fulfillim disfala bigfala need for olketa Kingdom Hall bat hem for mekem tu wanfala program for lukaftarem olketa hall long wei wea fitim datfala ples.—2 Corinthians 8:14, 15.
Samting wea Kamap wea Givim Encouragement
Wanem nao kamap from hard waka hia for provaedem olketa ples for worship? Long start bilong 2001, wanfala report from Malawi sei: “Samting wea olketa duim long disfala kantri hem barava nambawan. Long next tufala month mifala bae finis for buildim samfala nara Kingdom Hall.” (Piksa 1 and 2) Long Togo olketa volunteer buildim samfala simpol Kingdom Hall insaed olketa month wea just go pas. (Piksa 3) Olketa willing volunteer duim nambawan waka tu for help provaedem olketa Kingdom Hall long Mexico, Brazil, and olketa nara kantri.
Olketa kongregeson lukim hao taem olketa buildim wanfala Kingdom Hall, pipol long datfala ples luksavve hao Olketa Jehovah’s Witness bae stap long there nao. Luk olsem planti pipol bin hol bak for kaban witim olketa Witness from olketa no garem gudfala ples for worship. Nafisi Kongregeson long Malawi hem report olsem: “From mifala garem gudfala Kingdom Hall distaem, hem wanfala gud witness. And from diswan, hem isi for startim olketa Bible study.”
Long bifor olketa member bilong Krake Kongregeson long Benin feisim wei wea planti mekfani long olketa from Kingdom Hall bilong olketa hem nating gud olsem samfala nara church. (Piksa 4) Distaem kongregeson hia garem naes niu Kingdom Hall wea stand for tru worship long wei wea no ova tumas bat wea showimaot respect. (Piksa 5) Disfala Kongregeson hem garem 34 Kingdom pablisa and samting olsem 73 nao savve attend long Sunday, bat 651 nao attendim Kingdom Hall dedication. Planti wea kam olketa pipol bilong datfala taon wea tinghae long olketa Witness taem olketa lukim olketa buildim datfala hall long shortfala taem. Taem olketa ting raonem samting wea bin happen saed long diswan, Zimbabwe branch raet olsem: “Insaed wan month bihaen olketa buildim wanfala niu Kingdom Hall, attendance long kongregeson kamap dabol.”—Piksa 6 and 7.
Tru nao, olketa niu Kingdom Hall help for provaedem ples for kasem spiritual strong for olketa Christian wea dedicate and tu for olketa wea interest. Wanfala Witness long Ukraine sei olsem bihaen kongregeson long there start for iusim niu Kingdom Hall: “Mifala hapi for gud, mifala lukim witim eye bilong mifala seleva hao Jehovah helpem pipol bilong hem.”
[Box/Olketa Piksa long page 10, 11]
Mifala Tinghae Long Willing Wei for Give
Olketa Jehovah’s Witness hapi tumas for lukim hao wei for kasem disfala bigfala need for olketa niu Kingdom Hall hem muv ahed kwiktaem evriwea long world. Wei wea namba bilong olketa worshiper bilong Jehovah kakamap moa big long planti kantri hem mekem need kamap for buildim planti niu Kingdom Hall long future. Insaed 2001 service year, samting olsem 32 niu kongregeson kamap evri week! Olketa kongregeson hia needim ples for hipap and worship.
Kwestin maet kamap, ‘Hao nao bae iumi savve garem selen for construction bilong olketa niu Kingdom Hall, especially long olketa kantri wea no garem planti selen?’ Thru long saport from God and wei wea olketa man willing for give.
For fitim samting hem promisim, Jehovah pourimaot holy spirit long olketa servant bilong hem, wea helpem olketa “for duim gudfala samting, for kamap rich long olketa gudfala waka, for no hol bak, redy for share.” (1 Timothy 6:18) Spirit bilong God muvim Olketa Jehovah’s Witness for saportim Kingdom-preaching waka long evri wei—givim taem, strong, waka, and planti narafala samting for olketa Christian waka.
Feeling for willing for give hem muvim olketa Witness and olketa narawan for help saportim wei for grow and construction waka saed long selen. Witim wei for help peim olketa kost long kongregeson bilong olketa seleva, olketa givim donation tu for construction waka long olketa nara ples long earth.
Long each kongregeson, olketa box stap wea garem nem “Contribution for Waka Raonem World—Matthew 24:14.” Man wanwan savve putim donation insaed sapos hem laek for duim. (2 Kings 12:9) Mifala barava tinghae long evri donation, smol and big. (Mark 12:42-44) Mifala iusim selen hia long planti difren wei for fitim need wea kamap, insaed diswan hem construction bilong olketa Kingdom Hall. Selen hia hem no for peim olketa bigman, from Olketa Jehovah’s Witness no garem olketa bigman.
Waswe, olketa contribution for waka raonem world fulfillim purpose bilong hem? Yes. Branch long Liberia—wanfala kantri wea war spoelem—reportim hao big haf long olketa Witness long there no garem waka and garem big problem saed long selen. Hao nao pipol bilong Jehovah long datfala kantri savve kasem olketa gudfala ples for worship? “Willing wei wea olketa brata long nara kantri givim olketa contribution hem helpem disfala waka saed long selen,” branch office sei. “Hem wanfala wise and loving arrangement!”
Olketa brata from datfala ples tu givim contribution, nomata olketa no garem planti samting. Sierra Leone, wanfala kantri long Africa, givim report olsem: “Olketa brata long hia saportim disfala waka and olketa hapi for waka and givim contribution bilong selen wea olketa fit for givim for saportim construction bilong olketa Kingdom Hall.”
Main samting, disfala waka for build hem givim praise long Jehovah. Olketa brata from Liberia sei olsem: “Olketa construction bilong olketa gudfala ples for worship evriwea long kantri bae showim olketa pipol hao tru worship hem bae stap olowe long Liberia and bae hem showim respect and mekem nambawan nem bilong God luk naes.”