Wanfala Slave wea Obeyim God

Joseph hem wanfala lo olketa son blo Jacob wea young. Olketa big brata blo Joseph lukim dadi blo olketa fevarem Joseph. Iu ting hao nao feeling blo olketa abaotem datwan? Olketa jealous lo Joseph and heitim hem. Taem Joseph garem samfala interesting dream, hem storyim datwan lo olketa brata blo hem. Olketa tingse olketa dream hia minim wanday bae olketa baodaon lo Joseph. Datwan mekem olketa heitim hem go moa!

Wanday olketa brata blo Joseph lukaftarem olketa sheepsheep klosap lo taon blo Shechem. Jacob sendem Joseph for go chekim olketa brata blo hem. Taem olketa lukim Joseph farawe yet, olketa sei lo each other: ‘Man for dream nao kam ia. Iumi killim hem dae!’ Olketa grabim hem and torowem insaed wanfala deep hol. Bat Judah, wanfala lo olketa brata blo hem sei: ‘No killim hem dae! Iumi salem hem olsem wanfala slave.’ So olketa salem Joseph for 20 silver shekel lo olketa Midianite bisnisman wea go lo Egypt.

Then olketa brata blo Joseph dipim kaleko blo hem insaed blood blo wanfala goat, olketa sendem kaleko hia lo dadi blo olketa and sei: ‘Diswan nao kaleko blo son blo iu?’ Jacob tingse wanfala wild animal nao killim dae Joseph. So hem sorre tumas. No eniwan savve comfortim hem.

Lo Egypt, olketa salem Joseph olsem slave for wanfala hae official wea nem blo hem Potiphar. Bat Jehovah stap witim Joseph. Potiphar lukim Joseph duim gud waka blo hem and hem trustim Joseph. No longtaem, Potiphar appointim Joseph for lukaftarem evriting wea hem onam.

Waef blo Potiphar lukim Joseph hem handsome and strong . Evriday hem askem Joseph for leidaon witim hem. Wat nao Joseph bae duim? Hem rejectim datwan and sei: ‘Nomoa! Diswan hem rong. Masta blo mi trustim mi, and iu waef blo hem. If mi leidaon witim iu, bae mi sin againstim God!’

Wanday waef blo Potiphar trae forcem Joseph for leidaon witim hem. Hem grabim Joseph and pullim kaleko blo hem, bat Joseph ranawe. Taem Potiphar kam bak lo haos, waef blo hem sei Joseph attakim hem. Woman hia nating talem tru samting. Potiphar kros fogud, and hem putim Joseph lo prison. Bat Jehovah gohed for stap witim Joseph.