Waswe, Hem Wei Bilong Iu for Jealous? Olketa Brata Bilong Joseph Jealous

WANEM nao hem minim for jealous. Waswe, iu savve les long samwan bikos samfala sei hem gudfala man, luk naes or kleva?a​— Datwan savve happen taem man hem jealous.

Wei for jealous savve kamap insaed famili sapos mami and dadi lovem wanfala pikinini winim narawan. Bible storyim wanfala famili wea wei for jealous mekem bigfala problem kamap. Iumi bae storyim datfala problem and wanem nao iumi lanem from datwan.

Joseph hem mek-11 boy bilong Jacob, and olketa haf brata bilong Joseph jealous long hem. Iu savve why?​— Bikos dadi bilong olketa Jacob, lovem tumas Joseph. Iu savve, Jacob wakem wanfala naes kaleko for Joseph. Jacob lovem Joseph “bikos hem son wea born long taem wea hem olo” and hem firstfala pikinini bilong waef bilong hem Rachel wea hem barava lovem.

Bible talem hao ‘taem olketa brata bilong Joseph lukim hao dadi bilong olketa lovem tumas Joseph winim olketa, datwan mekem olketa for les long Joseph.’ Gogo, Joseph storyim wanfala dream long famili bilong hem. Hem lukim evriwan witim dadi baodaon long hem. Bible sei olsem: “Olketa brata bilong hem jealous long hem,” and dadi bilong Joseph tu tok raf long hem bikos hem storyim datkaen dream.​—Genesis 37:​1-​11.

Taem Joseph 17 year, Jacob sendem hem go for lukim olketa brata bilong hem wea stap farawe and lukaftarem olketa sheepsheep and goat. Waswe, iu savve wanem nao olketa laek for duim taem olketa lukim Joseph kam?​— Olketa laek for killim hem dae nao! Reuben and Judah nomoa no laek for killim hem dae.

Taem samfala bisnis man kam pas for go long Egypt, Judah hem sei: “Iumi salem hem!” Olketa salem hem nao. Then olketa killim dae wanfala goat and putim kaleko bilong Joseph long blood bilong hem. Bihaen, taem olketa showim kaleko hia long Dadi bilong olketa, hem sorre and krae big olsem: ‘Wanfala wild animal nao mas kaikaim Joseph!’​—Genesis 37:12-​36.

Gogo Pharaoh wea rulim Egypt barava tinghae long Joseph. Diswan hem bikos God helpem Joseph for minim tufala dream bilong Pharaoh. First wan hem abaotem sevenfala strong buluka and sevenfala sik buluka. Mek-tu dream hem abaotem sevenfala gud wheat frut and sevenfala nogud wheat frut. Joseph storyim hao tufala dream minim baebae sevenfala year bilong staka kaikai and bihaen baebae sevenfala year bilong no staka kaikai. Pharaoh mekem Joseph for kamap bigman for hipimap kaikai for redi gudfala for olketa year bilong no staka kaikai.

Taem bigfala hangre kamap, famili bilong Joseph wea olketa stap farawe, needim kaikai. Jacob sendem tenfala big brata bilong Joseph go long Egypt for tekem kam kaikai. Olketa kam long Joseph bat olketa no luksavve long hem. Joseph no talem olketa hu nao hem, bat hem faendemaot olketa change and barava sorre tumas long nogud samting wea olketa duim long hem. Long datfala taem nao Joseph talem hu nao hem. Evriwan barava hapi nao!​—Genesis, chapter 40 go kasem 45.

Wanem nao iu savve lanem abaotem wei for jealous from disfala Bible story?​— Wei for jealous savve mekem bigfala problem kamap, nomata for laek killim brata bilong hemseleva! Iumi readim Acts 5:​17, 18 and Acts 7:​54-​59 and lukim wanem wei for jealous mekem pipol duim long olketa disaepol bilong Jesus.​— Bihaen iu readim diswan, waswe iu lukim nao why iumi mas keakea for no jealous?​—

Joseph laef for 110 year. Hem garem olketa pikinini, granpikinini, and great granpikinini. Tru tumas, iumi savve Joseph mas evritaem talem olketa pikinini hia for lovem narawan and for no jealous.​—Genesis 50:22, 23, 26.