Hu Nao Job?

Wanfala man wea worshipim Jehovah hem stap lo land lo Uz. Nem blo hem Job. Hem wanfala rich man and garem big famili. Hem man wea kaen, helpem pipol wea poor, helpem olketa woman wea hasband blo olketa dae, and olketa pikinini wea no garem dadi and mami. From Job duim gud samting, hao, datwan minim hem no garem eni problem nao?

Job no savve dat Satan datfala Devil hem lukluk lo hem. Jehovah sei lo Satan: ‘Hao, iu lukluk lo servant blo mi Job? No eni man lo earth hem olsem Job. Hem obeyim mi and duim stret samting.’ Satan sei: ‘Hem tru, Job obeyim iu. Iu protectim and blessim hem. Iu givim staka animal and land for hem. Tekem evri samting wea hem garem and bae hem stop for worshipim iu.’ Jehovah sei: ‘Iu savve testim Job. Bat iu mas no killim hem dae.’ Why nao Jehovah letem Satan for testim Job? Jehovah sure dat Job bae gohed faithful.

Satan start for testim Job lo olketa difren hard taem. First samting, hem sendem olketa Sabean for stealim olketa buluka and donkey blo Job. Then fire bonem evri sheepsheep blo hem. Nara grup wea hem nao olketa Chaldean, kam stealim olketa camel blo hem. Olketa killim dae olketa servant wea lukaftarem olketa animal hia. Next samting wea happen hem worse go moa. Evri pikinini blo Job dae taem haos wea olketa party insaed foldaon ontop olketa. Job sorre tumas, nomata olsem hem no stop for worshipim Jehovah.

Satan laekem Job for safa go moa, so hem mekem Job for garem olketa soa lo full body blo hem. Job safa tumas. Hem no savve why nao olketa samting hia kasem hem. Nomata olsem, Job gohed worshipim Jehovah. God lukim evri samting hia and hem hapi tumas lo Job.

Then, Satan sendem thrifala man for testim Job. Olketa sei lo Job: ‘Ating iu duim sin and trae for haedem. God nao panisim iu.’ Job sei: ‘Mi no duim eni rong samting.’ Bat gogo hem start for tingse God nao kosim olketa problem hia, and sei God nating showim justice lo hem.

Wanfala young man wea nem blo hem Elihu gohed lisin lo story blo olketa. Then hem standap and sei: ‘Wat iufala evriwan talem hem no stret. Jehovah hem paoaful winim eni samting wea iumi savve minim. Hard for hem duim eni nogud samting. Hem lukim evri samting and hem helpem pipol taem olketa kasem problem.’

Then Jehovah story lo Job. Hem sei: ‘Wea nao iu taem mi wakem skae and earth? Why nao iu sei mi no followim justice? Iu story, bat iu nating savve why olketa samting hia happen.’ Job luksavve wat hem talem hem no stret so hem sei: ‘Mi rong nao. Mi herem story abaotem iu, bat distaem nao mi savve gud lo iu. No eniting wea iu ting for duim hem hard lo iu. Mi sorre lo wat mi talem.’

Taem evri hard taem hia finis, Jehovah mekem Job for healthy bak moa and givim hem staka samting winim wat hem garem firstaem. Job hem laef for longtaem and hem garem gud laef. Jehovah blessim Job from hem obeyim hem nomata datwan no isi. Iu laek for olsem Job and gohed worshipim Jehovah, nomata wat nao happen?