Job Praisem Nem Bilong Jehovah
“Mi bae gohed for praisem nem bilong Jehovah.”—JOB 1:21.
1. Luk olsem hu nao raetem buk bilong Job, and long wanem taem?
TAEM Moses hem samting olsem 40 year, hem lusim Egypt and ranawe go long Midian bikos Pharaoh laek killim hem dae. (Acts 7:23, 29) Maet taem hem stap long Midian nao hem herem story abaotem hard taem wea kasem Job. Job hem stap long Uz, wea hem klosap long Midian. Plande year bihaen, taem Moses and olketa Israelite kakam klosap long Uz, maet Moses herem story abaotem olketa samting wea kasem Job bifor hem dae. Olketa Jew talem hao samfala year bihaen Job hem dae nao, luk olsem Moses raetem buk bilong Job.
2. Wanem nao buk bilong Job storyim wea savve strongim pipol bilong Jehovah distaem?
2 Buk bilong Job strongim faith bilong pipol bilong God distaem. Hao nao olsem? Hem helpem iumi for savve long olketa important samting wea happen bifor long heven wea showimaot God nomoa fit for rulim olketa man. Story bilong Job helpem iumi minim gud moa wanem nao savve mekem man gohed faithful long God. And iumi bae minim tu why nao samfala taem Jehovah letem pipol bilong hem for kasem hard taem. Nara samting tu, buk bilong Job storyim Satan nao main enemy bilong Jehovah and hem enemy bilong olketa man tu. Hem showim tu hao olketa man wea no perfect savve gohed faithful long Jehovah nomata olketa kasem bigfala test. Distaem iumi bae storyim samfala samting long buk bilong Job.
Satan Testim Job
3. Job hem wanem kaen man? Why nao Satan attakim hem?
3 Job hem rich man and bigman tu. Hem dadi wea showimaot olketa gudfala wei evritaem. Luk olsem staka man tinghae long kaonsel wea hem talem and hem helpem poor pipol tu. Bat important samting nao, Job laek duim samting wea mekem God hapi. Bible sei Job hem “gudfala man, hem duim stret samting, fraet long God, and hem no duim eni rabis samting.” Satan attakim Job, no bikos hem bigman and hem rich, bat bikos hem lovem God.—Job 1:1; 29:7-16; 31:1.
4. Wanem nao disfala word “faithful” hem minim?
4 Job chapter 1 storyim taem wea olketa angel long heven hipap front long Jehovah. Long datfala taem Satan stap tu and hem tok againstim Job. (Readim Job 1:6-11.) Nomata Satan storyim olketa samting wea Job garem, wanem hem laek duim nao, hem laek testim sapos Job bae faithful long God or nomoa. Disfala word “faithful” hem minim gudfala man, stretfala man, and no eni man fit for talem nogud samting abaotem hem. Taem Bible storyim man wea faithful, hem minim hem duim nomoa wanem Jehovah laekem witim full heart bilong hem.
5. Wanem nao Satan talem abaotem Job?
5 Satan hem sei Job worshipim God nomoa from hem laek kasem samting for hemseleva bat no from hem laek faithful long God. Satan talem tu hao Job bae faithful long Jehovah nomoa sapos God gohed for givim gud samting long hem and protectim hem. So Jehovah letem Satan for attakim faithful man hia, mekem Satan savve pruvim sapos toktok wea hem talem hem tru or nomoa. Insaed wanfala day nomoa, Job kasem nius hao samfala man kam stealim and killim dae evri animal bilong hem, olketa killim dae klosap evri wakaman bilong hem, and tenfala pikinini bilong hem dae tu. (Job 1:13-19) Waswe, evri samting hia wea Satan duim mekem Job no faithful long God nao? Bible showimaot taem Job kasem nogud samting, hem tok olsem: “Jehovah nao givim olketa samting long mi and Jehovah tekem olketa from mi. Mi bae gohed for praisem nem bilong Jehovah.”—Job 1:21.
6. (a) Taem olketa angel hipap moa long heven, wanem nao happen? (b) Taem Satan testim Job, hu moa hem tingim?
6 Job chapter 2 storyim olketa angel hipap moa front long Jehovah. Satan tok againstim Job moa and hem sei: “Man bae givim skin for changem skin, and hem bae givim evri samting wea hem garem for sevem laef bilong hem. Iu trae spoelem body bilong hem and lukluk sapos hem bae tok nogud long iu or nomoa.” Taem Satan talem toktok hia, hem minim tu for evri man. Taem Satan hem sei, ‘Man bae givim evri samting wea hem garem for sevem laef bilong hem,’ hem no testim Job nomoa, bat hem testim tu olketa “man” wea worshipim Jehovah for lukim sapos olketa bae faithful long God or nomoa. So God letem Satan for mekem Job kasem wanfala barava nogud sik. (Job 2:1-8) Bat olketa samting hia hem tu-thri samting nomoa wea kasem Job. Samfala nara samting tu kasem hem.
Wanem Iumi Savve Lanem From Job
7. Wanem nao waef bilong Job and nara thrifala man talem long Job?
7 Hard taem wea kasem Job hem kasem waef bilong hem tu. Taem olketa pikinini bilong tufala dae and tufala lusim evri samting wea olketa garem, waef bilong hem sorre tumas. Hem sorre tumas tu taem hasband bilong hem kasem barava nogud sik. Hem tok strong olsem long Job: “Hao, iu faithful yet long God? Iu tok spoelem God nomoa and dae!” Then thrifala man kam. Olketa nao Eliphaz, Bildad, and Zophar. Olketa sei kakam bilong olketa hem for strongim Job. Batawea olketa laea nomoa, olketa mekem Job “feel nogud” nomoa. Bildad hem sei olketa pikinini bilong Job duim sin nao dastawe olketa dae. Eliphaz hem sei sin wea Job duim bifor nao mekem nogud samting kasem hem. Eliphaz talem tu hao taem pipol faithful long God, God nating tinghae nomoa long datwan! (Job 2:9, 11; 4:8; 8:4; 16:2; 22:2, 3) Nomata Job kasem olketa barava nogud samting hia, hem gohed faithful long God. Hem tru, samting wea Job talem hem no stret taem hem sei: “Hemseleva nao gud winim God.” (Job 32:2) Nomata olsem, Job gohed faithful long God taem hem kasem olketa nogud samting.
8. Wanem nambawan wei nao Elihu showim for olketa wea givim kaonsel distaem?
8 Distaem iumi bae storyim Elihu. Hem kam for lukim Job tu. Elihu herehere taem Job witim thrifala wea kam for lukim hem olketa story story. Nomata Elihu hem young long fofala hia, hem nao garem gudfala tingting winim olketa. Taem hem story long Job, hem showimaot hem respectim Job. Elihu praisem Job bikos hem gohed faithful long God. Bat hem talem tu hao Job tingse hemseleva nao stret. Then Elihu talem Job hao sapos hem gohed faithful long God, hem bae kasem gud samting. (Readim Job 36:1, 11.) Elihu showimaot nambawan wei for followim, for olketa wea givim kaonsel! Elihu no tok kros bat hem herehere gud, hem praisem Job, and hem givim kaonsel wea helpem Job.—Job 32:6; 33:32.
9. Wanem nao Jehovah duim for helpem Job?
9 Then seknomoa Jehovah seleva story kam long Job! Bible hem sei: “Jehovah ansarem Job long bigfala wind.” Jehovah tok kaen long Job and askem hem samfala kwestin mekem hem stretem tingting bilong hem. Job hapi long wanem Jehovah talem long hem and hem sei: “Mi samting nating nomoa . . . Mi sidaon long asis and long dust from mi repent.” Bihaen Jehovah story witim Job, Hem tok kros long thrifala wea kam lukim Job bikos olketa “no talem trufala samting.” Jehovah laekem Job for prea for olketa. Then “bihaen long taem wea Job prea finis for thrifala hia, Jehovah mekem hem kamap rich moa. Hem garem staka samting winim wanem hem garem bifor.”—Job 38:1; 40:4; 42:6-10.
Waswe, Iumi Barava Lovem Jehovah?
10. Taem Satan tok laea abaotem Jehovah, why nao Jehovah no killim dae Satan or leavim go nomoa?
10 Jehovah nao wakem universe and hem fit for rulim evri samting wea hem wakem. Taem Satan tok laea abaotem God, why nao God no leavim go nomoa? God savve hao sapos hem leavim go nomoa or hem killim dae Satan, datwan bae no pruvim sapos toktok wea Satan talem hem tru or nomoa. Satan hem sei Job bae no gohed faithful long God sapos hem lusim evri samting wea hem garem. Nomata Job kasem test, hem gohed faithful nomoa. Then Satan talem tu hao sapos eni man kasem nogud samting long body bilong hem, hem bae no worshipim God nao. Job barava kasem nogud samting, bat hem gohed faithful long God. From Job hem gohed faithful nomata hem no perfect, datwan showimaot toktok wea Satan talem hem nating tru. Waswe, olketa nara man wea worshipim God bae faithful olsem Job tu?
11. Wanem nao Jesus duim wea showimaot toktok wea Satan talem hem nating tru nomoa?
11 Nomata Satan duim eni samting for spoelem eni man wea worshipim God, sapos disfala man gohed faithful long God, datwan bae showimaot toktok wea Satan talem hem nating tru nomoa. Taem Jesus kam long earth, hem showimaot toktok wea Satan talem hem no tru. Jesus no garem sin olsem first dadi bilong iumi Adam. From Jesus faithful long God go kasem taem hem dae, hem showimaot olketa toktok wea Satan talem hem nating tru.—Rev. 12:10.
12. Wanem nao iumi wanwan mas showimaot?
12 Nomata olsem, Satan gohed for testim pipol bilong Jehovah. Iumi wanwan nao mas showimaot iumi faithful long Jehovah from iumi lovem hem, no from iumi laek kasem samting for iumiseleva. Hao nao tingting bilong iumi long diswan? Hem barava spesol samting for iumi faithful long Jehovah. Iumi hapi tu from iumi savve Jehovah hem strongim iumi for gohed faithful. And olsem samting wea kasem Job, Jehovah bae no letem iumi for kasem test wea iumi no fit for winim.—1 Cor. 10:13.
Satan Hem Barava Nogud Enemy and Apostate
13. Wanem nao buk bilong Job talem abaotem Satan?
13 Hebrew Scripture storyim nogud samting wea Satan talem againstim Jehovah and hao Satan mekem pipol for no worshipim God. Christian Greek Scripture storyim plande samting moa abaotem wanem Satan duim for againstim Jehovah. Buk bilong Revelation storyim taem wea Jehovah bae showimaot hem nomoa fit for rulim olketa man and taem Satan bae finis. Buk bilong Job storyim samfala samting moa abaotem wanem Satan duim for againstim Jehovah. Taem Satan kam hipap witim olketa nara angel front long Jehovah long heven, hem no kam for praisem Jehovah bat hem garem nogud tingting and nogud plan. Bihaen Satan tok spoelem Job, Jehovah letem hem for testim Job. Bible hem sei: “Then Satan go from Jehovah nao.”—Job 1:12; 2:7.
14. Hao nao tingting bilong Satan abaotem Job?
14 Buk bilong Job showimaot Satan hem barava nogud enemy bilong olketa man. Job 1:6 witim Job 2:1 storyim tufala taem wea olketa angel and Satan hipap front long Jehovah long heven. Bible no talem hao long nao disfala taem wea Satan testim Job. Bat Job gohed faithful long Jehovah, dastawe Jehovah talem Satan: “Iu nao askem mi for letem iu spoelem hem for nating nomoa. Nomata olsem, [Job] gohed faithful nomoa.” Bat Satan no laek talem hemseleva nao tok laea abaotem Job. Bat hem askem Jehovah moa for letem hem duim nogud samting for testim Job. So Satan testim Job long taem wea hem rich and long taem wea hem poor. Tru tumas, Satan nating sorre taem man hem poor or taem man kasem hard taem. Satan hem heitim pipol wea faithful long God. (Job 2: 3-5) Bat from Job hem faithful long God, hem showimaot toktok wea Satan talem hem nating tru nomoa.
15. Long wanem wei nao olketa apostate distaem semsem witim Satan?
15 Satan nao first wan for kamap apostate. Olketa apostate long distaem tu showimaot semkaen wei bilong Satan. Olketa garem barava rabis tingting and from diswan maet olketa no agree and tok againstim samfala brata long kongregeson, olketa elder, and Governing Body. Samfala apostate no laekem pipol for iusim nem bilong God, Jehovah. Olketa no laek savve gud long Jehovah and no laek worshipim hem. Olketa olsem dadi bilong olketa Satan bikos olketa laek mekem pipol no faithful long Jehovah. (John 8:44) Dastawe pipol bilong Jehovah barava les long olketa!—2 John 10, 11.
Job Praisem Nem Bilong Jehovah
16. Hao nao tingting bilong Job abaotem Jehovah?
16 Job iusim and praisem nem bilong Jehovah. Job nating talem eni nogud samting abaotem God, nomata hem sorre tumas taem olketa pikinini bilong hem dae. Nomata Job tingse God nao mekem olketa nogud samting for kasem hem, hem praisem nem bilong Jehovah. Hem tok olsem: “Taem man fraet long Jehovah, hem showimaot hem garem bigfala savve, and taem man no duim olketa nogud samting, hem showimaot hem minim samting.”—Job 28:28.
17. Wanem nao mekem Job gohed faithful long Jehovah?
17 Wanem nao mekem Job gohed faithful long Jehovah? Taem hem no kasem olketa nogud samting yet, hem fren gud finis witim Jehovah. Nomata Bible no talem sapos Job savve Satan tok spoelem Jehovah, Job disaed finis for gohed faithful long Jehovah. Hem sei olsem: “Go kasem taem mi dae, mi bae no duim eni samting wea bae mekem mi no faithful!” (Job 27:5) Wanem nao mekem Job fren gud witim Jehovah? Hem tinghae long olketa samting wea hem herem wea God duim for Abraham, Isaac, and Jacob. Olketa hia relative bilong hem. And taem Job lukluk long olketa samting wea Jehovah wakem, hem luksavve long staka nambawan wei bilong Jehovah.—Readim Job 12:7-9, 13, 16.
18. (a) Wanem nao Job duim wea showimaot hem lovem Jehovah? (b) Long wanem wei nao iumi savve followim gudfala wei bilong Job?
18 Olketa samting wea Job lanem mekem hem barava laek duim samting wea Jehovah hapi long hem. From Job tingse nogud eniwan long famili bilong hem duim samting wea God no hapi long hem, or from maet olketa “tok spoelem God long heart bilong olketa,” hem givim sakrifaes evritaem. (Job 1:5) Nomata Job kasem hard taem, hem talem gud samting nomoa abaotem Jehovah. (Job 10:12) Job showimaot nambawan wei for iumi followim! Iumi tu mas evritaem lanem stretfala savve abaotem Jehovah and olketa plan bilong hem. Iumi bae fren gud witim Jehovah sapos evritaem iumi study seleva, go long olketa meeting, prea, and preach abaotem Kingdom. Iumi mas barava trae hard for story long pipol abaotem nem bilong Jehovah. Jehovah hem hapi taem Job faithful long hem and hem bae hapi tu long pipol bilong hem distaem wea faithful long hem. Iumi bae storyim diswan long study bihaen.
Waswe, Iu Tingim Yet?
• Why nao Satan testim Job?
• Olketa wanem nogud samting nao kasem Job, and wanem nao hem duim?
• Wanem nao bae mekem iumi gohed faithful long Jehovah olsem Job?
• Wanem nao iumi lanem abaotem Satan long buk bilong Job?
[Piksa long page 4]
Buk bilong Job mekem iumi tingim important samting wea showimaot God nomoa fit for rulim olketa man
[Piksa long page 6]
Long wanem taem nao iu mas faithful long Jehovah?