First Thrifala Trabol

From olketa Israelite slave, olketa waka hard tumas. So Jehovah sendem Moses and Aaron for talem disfala message lo Pharaoh: ‘Letem olketa pipol blo mi go mekem olketa savve worshipim mi lo wilderness.’ Pharaoh tok praod and sei: ‘Mi no warim wat Jehovah talem, and hard tumas for mi letem olketa Israelite go.’ Then Pharaoh forcem olketa for waka hard go moa. Jehovah bae teachim Pharaoh wanfala leson. Iu savve wat nao hem duim? Hem mekem Tenfala Trabol for kasem Egypt. Jehovah talem Moses: ‘Pharaoh no laek lisin lo mi. Tumoro morning, bae hem go lo Nile River. Go lo hem and talem hem, from hem no letem pipol blo mi go, datfala Nile River bae change lo blood.’ Moses obey and go lo Pharaoh. Pharaoh lukluk taem Aaron hitim Nile River witim walking stik blo hem, and datfala river change lo blood. Datfala river start for smel nogud, olketa fish dae, and olketa no savve tekem wata from Nile River for drink. Pharaoh still no laek for letem olketa Israelite go.

Sevenfala day bihaen, Jehovah sendem bak Moses for talem disfala message lo Pharaoh: ‘If iu no sendem pipol blo mi go, Egypt bae fulap lo olketa frog.’ Aaron liftimap walking stik blo hem, and frog start for kavarem full land lo Egypt. Pipol lukim olketa frog lo haos blo olketa, lo bed blo olketa, and lo pleit blo olketa. Frog kavarem evri ples! Pharaoh talem Moses for begim Jehovah for finisim disfala trabol. Pharaoh promisim dat hem bae letem olketa Israelite go. So Jehovah stopem datfala trabol, and olketa Egyptian hipimap olketa frog wea dae lo staka hip. Datfala land start for smel nogud. Bat Pharaoh still no letem pipol hia for go.

Then Jehovah talem Moses: ‘Aaron mas hitim graon lo walking stik blo hem, and dust bae change lo olketa gnat, or olketa smol flae wea savve baet.’ Semtaem nomoa evriwea garem olketa gnat. Samfala pipol blo Pharaoh talem hem: ‘Disfala trabol kam from God.’ Bat, Pharaoh still no letem pipol hia for go.