Mek-10 Trabol

Moses promisim Pharaoh dat bae hem trae for no lukim hem moa. Bat bifor Moses go, hem talem Pharaoh: ‘Lo midolnaet, evri firstborn lo Egypt, start lo son blo Pharaoh go kasem son blo olketa slave, bae dae.’

Jehovah talem olketa Israelite for mekem wanfala spesol kaikai. Hem sei: ‘Killim wanfala man sheepsheep or goat wea wan year old, and tekem lelebet blood and putim lo tufala frame lo saed lo door and frame lo antap. Roastim lo fire datfala animal, and kaikaim witim bred wea no garem yeast. Werem sandol blo iufala, and redi for go. Tunaet bae mi mekem iufala free.’ Tingim, olketa Israelite mas hapi tumas, iaman?

Lo midolnaet, angel blo Jehovah hem go lo evri haos lo Egypt. Lo olketa haos wea no garem blood lo door blo olketa, firstborn blo olketa hem dae. Bat datfala angel go pasim olketa haos wea blood lo door blo olketa. Evri famili lo Egypt, nomata olketa wea rich and poor, wanfala pikinini lo famili hem dae. Bat no eni pikinini blo olketa Israelite hem dae.

Son blo Pharaoh tu hem dae. Datwan hem tumas nao for Pharaoh. Semtaem nomoa hem sei lo Moses and Aaron: ‘Go aot! Go aot from here. Go and worshipim God blo iufala. Tekem olketa animal blo iufala and go!’

Olketa Israelite lusim Egypt lo taem wea hem full moon, olketa organizem olketa followim famili and tribe blo olketa. Six handred thousand Israelite man and staka woman and olketa pikinini nao go. And staka nara pipol tu go witim olketa mekem olketa savve worshipim Jehovah tu. Olketa Israelite free nao!

For olketa no forgetim hao Jehovah sevem olketa, olketa bae mekem datfala sem spesol kaikai evri year. Olketa kolem datwan Pasova.