Twelvfala Spae

Olketa Israelite lusim Maunt Sinai and go thru lo desert lo Paran for kasem ples wea olketa kolem Kadesh. Lo there Jehovah talem Moses: ‘Sendem 12-fala man, wanfala from each tribe for go spaem land lo Canaan, datfala land wea mi bae givim lo olketa Israelite.’ So Moses chusim 12-fala man and sei lo olketa: ‘Go lo Canaan, and faendaot sapos kaikai savve grow gud lo datfala land or nomoa. Faendaot sapos pipol lo there strong or wik and sapos olketa stap lo olketa tent or lo olketa taon.’ Twelvfala spae hia, includim Joshua and Caleb, olketa go nao lo Canaan.

Bihaen 40 days, olketa spae hia kam bak, olketa tekem kam olketa fig, olketa pomegranate and olketa grape. Olketa spae hia report olsem: ‘Datfala land hem gud, bat pipol wea stap lo there olketa strong and olketa taon lo there garem olketa hae wall.’ Then Caleb sei: ‘Iumi savve winim olketa. Iumi go distaem!’ Iu savve why nao Caleb tok olsem? Bikos hem and Joshua trustim Jehovah. Bat nara tenfala spae sei: ‘Nomoa! Olketa big maeti pipol nao lo there, olsem olketa giant! Taem mifala lukim olketa, mifala feel smol olsem olketa grashopa nomoa.’

Olketa Israelite feel nogud. Olketa start for komplen and sei lo each other: ‘Iumi chusim eni difren leader and go bak lo Egypt. Why nao iumi shud go lo datfala ples and for olketa killim iumi dae lo there?’ Joshua and Caleb sei: ‘No disobeyim Jehovah, and iufala no fraet. Jehovah bae protectim iumi.’ Bat olketa Israelite no laek lisin and laek for killim dae Joshua and Caleb tu!

Wat nao Jehovah duim? Hem sei lo Moses: ‘Bihaen evri samting wea mi duim for olketa Israelite, olketa still no obeyim mi. So bae olketa stap lo wilderness for 40 years and bae olketa dae lo hia. Pikinini blo olketa witim Joshua and Caleb nomoa bae stap lo datfala land wea mi promis for givim lo olketa’