Samting wea Joshua Rememberim
JEHOVAH hem sei: “Servant bilong mi Moses hem dae nao, so getap distaem, akrosim disfala Jordan, iu and evri pipol, go insaed long datfala land wea mi givim long olketa.” (Joshua 1:2) Joshua hem feisim wanfala hardfala assignment! Hem waka olsem attendant bilong Moses for samting olsem 40 year finis. Distaem hem kasem instruction for duim waka bilong masta bilong hem and leadim olketa son bilong Israel, wea planti taem olketa bighed, for go insaed long Promis Land.
Taem Joshua ting raonem samting wea maet kamap long future, maet olketa test wea hem bin winim finis kam long mind bilong hem. For sure samting wea Joshua rememberim mas barava helpem hem long datfala taem, and hem savve helpem olketa Christian distaem tu.
Firstaem Slave Then Kamap Komanda
Joshua masbi rememberim wei wea hem olsem slave for planti year. (Exodus 1:13, 14; 2:23) Iumi no really savve wanem nao Joshua experiencem insaed datfala taem, from Bible no talem planti information abaotem diswan. Joshua maet lanem wei for organize gud taem hem stap long Egypt, and hem maet help for organizem wei wea olketa Hebrew and tu “big sekson bilong difren pipol” ranawe from datfala land.—Exodus 12:38.
Joshua hem kam from wanfala famili long tribe bilong Ephraim. Grandadi bilong hem Elishama hem chief bilong datfala tribe and luk olsem hem leader bilong 108,100 man for faet wea kam from wanfala long thrifala tribe bilong Israel. (Numbers 1:4, 10, 16; 2:18-24; 1 Chronicles 7:20, 26, 27) Bat, taem olketa Amalekite attakim Israel no longtaem bihaen Israel lusim Egypt, Moses askem Joshua for organizem army for faet. (Exodus 17:8, 9a) Why nao hem askem Joshua and no grandadi or dadi bilong Joshua? Wanfala idea hem: “From hem wanfala chief long important tribe bilong Ephraim, and from olketa savve finis long wei wea hem savve hao for organize, and from pipol barava trustim hem, Moses hem chusim [Joshua] for kamap leader wea barava fit for duim datfala waka for chusim and arrangem olketa soldia.”
Nomata iumi no really savve why Moses chusim hem, iumi savve hao Joshua barava followim samting wea Moses komandim. Nomata Israel barava no savve hao for faet long war, Joshua trust long God for helpem olketa. So taem Moses talem hem, “tumoro mi bae standap antap long hill, witim stik bilong tru God long hand bilong mi,” datwan mekem Joshua for garem trust. Joshua mas rememberim hao no longtaem go nomoa Jehovah finisim evribit bigfala army wea winim evri nara army long datfala taem. Long next day, taem Moses liftim hand bilong hem and holemap hae go kasem taem sun go daon, no eni enemy fit for againstim Israel, and olketa winim olketa Amalekite. Then Jehovah komandim Moses for raet insaed wanfala buk and ‘talem long ear bilong Joshua’ datfala judgment bilong Jehovah: “Mi bae aotem evribit from anda long heven wei for rememberim Amalek.” (Exodus 17:9b-14) Tru nao, Jehovah bae no fail for givim datfala judgment.
Taem Hem Attendant Bilong Moses
Datfala samting wea happen long Amalek mas barava mekem wei wea Joshua and Moses fren hem kamap moa strong. Joshua garem privilege for kamap attendant, or “minister,” bilong Moses “start from taem hem young man” go kasem taem Moses hem dae, samting olsem 40-fala year.—Numbers 11:28.
Datfala waka minim hem bae garem olketa privilege and responsibility. Olsem example, taem Moses, Aaron, olketa son bilong Aaron, and 70 older man bilong Israel go ap long Maunt Sinai and lukim vision bilong glory bilong Jehovah, maet Joshua hem go witim olketa tu. Taem hem duim waka olsem attendant, hem go witim Moses hae ap long maunten and luk olsem hem stap long there taem Moses go insaed cloud wea piksarem wei wea Jehovah stap long there. Luk olsem Joshua hem stap long maunten for 40-fala day and 40-fala naet. Hem faithful for weitim masta bilong hem for kam bak, from taem Moses start for kam daon witim tufala ston wea garem ten komandment, Joshua stap for meetim hem.—Exodus 24:1, 2, 9-18; 32:15-17.
Bihaen taem wea Israel worshipim datfala gold buluka, Joshua hem go ahed for waka witim Moses long tent bilong meeting aotsaed long camp. Long there Jehovah story long Moses feis tu feis. Bat taem Moses go bak long camp, Joshua “no go aot from midolwan long tent.” Maet hem mas stap long there for stopem olketa Israelite for go insaed datfala tent from olketa no klin. Joshua barava tinghae long datfala responsibility!—Exodus 33:7, 11.
Wei for kaban witim Moses, wea man for raetem history Josephus sei hem 35 year olo winim Joshua, mas barava strongim faith bilong Joshua. Samfala kolem wei wea tufala fren olsem “wei wea olo and young kam tugeta, olsem masta and student,” wea mekem Joshua kamap “man wea savve disaed strong, and fit for trustim.” Iumi no garem olketa profet olsem Moses midolwan iumi distaem, bat kongregeson bilong pipol bilong Jehovah garem olketa olo wea, bikos long experience and spiritual fasin bilong olketa, olketa savve givim strong and encouragement. Waswe, iu tinghae long olketa? And waswe, iu kasem gud samting from wei for kaban witim olketa?
Spae Long Canaan
Wanfala important samting long laef bilong Joshua hem happen no longtaem bihaen Israel kasem Law. Olketa chusim hem for stand for tribe bilong hem for go spae long Promis Land. Planti pipol savve long datfala story. Evriwan long 12-fala spae hia agree hao datfala land “fulap witim milk and honey,” hem barava olsem Jehovah promisim. Bat, tenfala long olketa no garem faith, olketa tingse Israel bae no savve aotem olketa pipol wea stap long datfala land. Joshua and Caleb nomoa encouragem pipol for no bighed from olketa fraet, from Jehovah bae stap witim olketa. Taem olketa herem, evriwan wea hipap long datfala taem rejectim datwan and laek sutim tufala witim ston. Sapos Jehovah no showimaot glory bilong hem long datfala taem for stopem pipol hia maet olketa sutim olketa. From olketa no garem faith, God talemaot hao no eniwan wea register long Israel wea age bilong olketa 20 year and go ap bae laef for go insaed Canaan. Long evriwan hia, Joshua, Caleb, and olketa Levite nomoa stap laef.—Numbers 13:1–16, 25-29; 14:6-10, 26-30.
Evri pipol hia lukim olketa bigfala samting wea Jehovah duim long Egypt. Sapos olsem, wanem nao mekem Joshua garem faith dat God bae helpem olketa, nomata klosap evriwan daotem datwan? Joshua masbi barava rememberim klia evri samting wea Jehovah hem promisim and duim, and hem ting raonem olketa. Planti year bihaen hem fit for sei hao ‘no eni toktok long evri gudfala toktok wea Jehovah God talem long Israel hem fail. Evriwan kamap tru.’ (Joshua 23:14) So Joshua garem faith hao evri promis bilong Jehovah abaotem future bae no fail for fulfill tu. (Hebrews 11:6) Diswan shud muvim man for ask olsem: ‘Waswe long mi? Waswe, wei wea mi waka hard for study and ting raonem olketa promis bilong Jehovah hem pruvim long mi hao mi fit for trustim olketa? Waswe, mi biliv God savve protectim mi and pipol bilong hem insaed datfala bigfala trabol wea bae kamap?’
Joshua no garem faith nomoa bat hem showimaot tu hao hem no fraet for duim stretfala samting. Hem and Caleb nomoa saedem Jehovah, and evriwan wea hipap long datfala taem ting for sutim tufala long ston. Sapos iu nao hem, iu bae feel hao? Fraet? Joshua no feel olsem. Hem and Caleb strong for talemaot samting olketa bilivim. From iumi loyal long Jehovah, maet wanday iumi tu bae need for duim semkaen samting.
Datfala story abaotem olketa spae showim iumi tu hao nem bilong Joshua hem change. Long nem bilong hem, Hoshea, wea minim “Salvation,” Moses addim samfala leta wea stand for nem bilong God, mekem nem bilong hem kamap Jehoshua, or Joshua—“Jehovah Hem Salvation.” Datfala Septuagint transleitim nem bilong hem olsem “Jesus.” (Numbers 13:8, 16, footnote.) Barava olsem mining bilong datfala nambawan nem, Joshua no fraet for talemaot hao Jehovah hem salvation. Moses hem tingting gud bifor hem changem nem bilong Joshua. Niu nem hia showimaot hao Moses hem tinghae long fasin bilong Joshua and hem join witim privilege wea Joshua bae kasem for leadim wanfala niu genereson go insaed long Promis Land.
Olketa Israelite wakabaot insaed wilderness for 40-fala year, gogo olketa dadi bilong olketa dae. Iumi no savve eniting abaotem Joshua insaed long datfala taem. Bat, hem mas barava lanem planti samting insaed datfala taem. Hem masbi lukim taem God judgem bighed sekson bilong Korah, Dathan, and Abiram and olketa wea followim olketa and tu olketa wea duim rabis wei for worshipim Baal Bilong Peor. Iumi sure hem barava sorre tumas taem hem savve Moses bae no go insaed long datfala land wea God promisim from hem fail for mekhae long Jehovah long wata bilong Meribah.—Numbers 16:1-50; 20:9-13; 25:1-9.
Kasem Appointment for Changem Moses
Taem Moses hem klosap for dae, hem askem God for appointim man for changem hem mekem Israel no kamap “olsem sheep wea no garem shepherd.” Wanem nao ansa bilong Jehovah? Joshua, “man wea garem spirit,” kasem appointment front long evriwan wea hipap. Olketa mas lisin long hem. Datwan hem nambawan praise for Joshua! Jehovah hem lukim wei wea Joshua garem faith and savve. Wei for leadim Israel bae stap long hand bilong wanfala man wea barava fit for duim. (Numbers 27:15-20) Nomata olsem, Moses savve hao Joshua feisim olketa bigfala challenge. So Moses encouragem hem for “stand strong and no fraet,” from Jehovah bae go ahed for stap witim hem.—Deuteronomy 31:7, 8.
God seleva tu talem disfala sem encouragement long Joshua taem hem sei moa: “Careful for duim samting followim evri law wea servant bilong mi Moses komandim iu. No tan long raet saed or left saed, mekem iu duim samting long wisefala wei long evri ples iu go. Disfala buk bilong law mas no lusim mouth bilong iu, and iu mas readim smol day and naet, mekem iu careful for duim evri samting wea olketa raetem insaed long hem; then iu savve mekem wei bilong iu for win and then iu bae duim samting long wisefala wei. Waswe, mi no komandim iu? No fraet, and kamap strong. No seke or fraet tumas, from God bilong iu Jehovah hem stap witim iu nomata wea iu go.”—Joshua 1:7-9.
Joshua hem nating daot from hem tingim toktok bilong Jehovah and from evri samting wea hem lanem finis. Hem barava feel sure hao bae olketa winim datfala land. For sure, olketa problem bae kamap. Firstfala challenge hem wei for akrosim Jordan River long taem wea hem flood. Nomata olsem, Jehovah seleva nao givim komand: “Getap distaem, akrosim disfala Jordan.” So nomata wanem problem kamap bae olketa savve winim!—Joshua 1:2.
Olketa samting wea happen long laef bilong Joshua—wei wea olketa winim Jericho, wei wea olketa isisi winim olketa enemy, and wei for divaedem land—showimaot hao hem nating forgetim olketa promis bilong God. Klosap long taem wea hem redy for dae, taem Jehovah stopem olketa enemy for no attakim Israel, Joshua hipimap evri pipol for reviewim olketa samting wea God duim for olketa and for encouragem olketa for servem Hem witim full heart. From diswan, Israel promis moa for keepim datfala covenant bilong olketa witim Jehovah, and for sure example bilong leader bilong olketa muvim ‘Israel for go ahed for servem Jehovah insaed taem wea Joshua hem laef.’—Joshua 24:16, 31.
Joshua showimaot nambawan example for iumi. Olketa Christian distaem feisim planti samting wea testim faith bilong olketa. For Jehovah go ahed for appruvim iumi and tu for kasem olketa samting hem promisim, iumi need for winim olketa test hia. For win, Joshua mas garem strongfala faith. Hem tru, iumi no olsem Joshua wea lukim olketa nambawan samting God duim, bat sapos eniwan garem daot, Bible buk wea garem nem bilong Joshua hem garem story bilong olketa wea lukim olketa samting wea pruvim wei wea man fit for trustim toktok bilong Jehovah. Olsem Joshua, iumi sure iumi bae kasem wisdom and bae win sapos iumi readim Word bilong God evriday and trae hard for followim insaed laef bilong iumi.
Waswe, samfala taem fasin bilong samfala Christian brata mekem iu feel nogud? Tingim wei wea Joshua, nomata hem no duim eni rong, hem stand strong insaed 40 year wea hem mas wakabaot insaed wilderness witim olketa narawan wea no showimaot faith. Waswe, hem hard long iu for defendim samting wea iu bilivim? Ting bak long samting wea Joshua and Caleb duim. Tufala kasem nambawan reward from tufala faithful and obey. Tru nao, Joshua barava garem faith hao Jehovah bae fulfillim olketa promis bilong hem. Iumi tu mas olsem.—Joshua 23:14.
[Piksa long page 10]
Wei for kaban witim Moses strongim faith bilong Joshua
[Piksa long page 10]
Joshua and Caleb garem trust long paoa bilong Jehovah
[Piksa long page 10]
Wei wea Joshua hem lead muvim planti pipol for saed witim Jehovah