Joshua and Olketa Gibeonite

Olketa nara nation lo Canaan herem nius abaotem samting wea happen lo Jericho. Evri king lo olketa nation hia join tugeta for faetem olketa Israelite. Bat olketa Gibeonite garem difren plan. Olketa werem olketa kaleko wea brek and go lo Joshua and sei: ‘Mifala kam from wanfala farawe ples. Mifala herem story abaotem Jehovah and samting wea hem duim for iufala lo Egypt and lo Moab. Promisim mifala dat bae iufala no attakim mifala, and mifala bae kamap olketa wakaman blo iufala.’

Joshua bilivim olketa and agree for no attakim olketa. Thrifala day bihaen, Joshua faendaot olketa hia no stap farawe nomoa. Olketa stap nomoa lo land lo Canaan. Joshua askem olketa Gibeonite hia olsem: ‘Why nao iufala laea lo mifala?’ Olketa sei: ‘Mifala fraetem iufala! Mifala savve Jehovah, God blo iufala hem faet for iufala. Plis no attakim mifala.’ Joshua keepim promis blo hem and no killim olketa dae.

No longtaem bihaen, faevfala king lo Canaan and army blo olketa sei bae olketa faetem olketa Gibeonite. Joshua and army blo hem march full naet for go rescuem olketa. Lo morning nomoa olketa start for faet nao. Olketa Canaanite hia start for ranawe olobaot. Eni ples wea olketa ran go for hem, Jehovah mekem bigfala hail ston foldaon from skae ontop lo olketa. Then Joshua askem Jehovah for mekem sun no muv. Why nao hem askem Jehovah for duim datwan, wea hem samting wea no enitaem hem happen bifor? Hem bikos Joshua trustim Jehovah. For full day sun hem stap lo midol lo skae go kasem taem olketa Israelite winim olketa king lo Canaan and army blo olketa.