Hannah Askem God for Wanfala Son

Wanfala Israelite man wea nem blo hem Elkanah garem tufala waef, Hannah and Peninnah, bat Hannah nao hem lovem tumas. Peninnah tok spoelem Hannah evritaem bikos Hannah no garem pikinini and Peninnah garem staka pikinini. Evri year, Elkanah tekem famili blo hem for worship lo tabernacle lo Shiloh. Wantaem, taem olketa lo there hem lukim Hannah wea hem lovem tumas hem sorre. Hem sei: ‘Plis Hannah iu no krae. Mi lo hia. Mi lovem iu.’

Bihaen, Hannah go seleva for prea. Hem gohed krae taem hem begim Jehovah for helpem hem. Hem promis olsem: ‘Jehovah, sapos iu givim mi wanfala son, mi bae givim hem lo iu and hem bae servem iu for full laef blo hem.’

Hae Priest Eli lukim Hannah krae, and hem tingse Hannah hem drunk. Hannah sei: ‘Nomoa, lord blo mi, mi no drunk. Mi garem wanfala big problem and mi storyim datwan lo Jehovah.’ Eli luksavve wat hem talem hem no stret so hem sei lo Hannah: ‘Letem God givim iu wanem iu laekem.’ Hannah hem feel gud and hem go nao. No kasem wan year yet, hem garem wanfala son and nemim hem Samuel. Masbi Hannah hem hapi tumas, iaman?

Hannah no forgetim promis wea hem talem lo Jehovah. So stretawe bihaen Samuel lusim susu, hem tekem hem go for waka lo tabernacle. Hannah talem Eli: ‘Disfala boy nao mi askem lo Jehovah. For full laef blo hem, mi givim hem for Jehovah.’ Elkanah and Hannah savve visitim Samuel evri year and tekem go wanfala niu coat for hem. Jehovah blessim Hannah and hem bornem moa thrifala boy and tufala gele.