David and Saul

Afta David killim dae Goliath, King Saul markem David for komanda lo army blo hem. Hem winim staka faet, and staka pipol savve lo hem. Evritaem David kam bak from faet, olketa woman savve dance and singsing olsem: “Saul killim dae wan thousand, and David killim dae ten thousand!” Saul start for jealous lo David and laek killim hem dae.

David savve tumas hao for pleim harp. Wanday taem David pleim harp for Saul, datfala king sutim hem lo spia. David kwiktaem misstim and datfala spia pas lo wall. Bihaen datwan, staka taem nao Saul trae for killim dae David. Gogo, David ranawe and haed lo wilderness.

Saul tekem 3,000 soldia and go for lukaotem David. Gogo, olketa go insaed cave wea David and olketa man blo hem haed insaed. Olketa man blo David whisper lo David olsem: ‘Chance blo iu for killim dae Saul nao ia.’ David wakabaot isisi go and katem aot end lo coat blo King Saul. Saul nating savve. Bihaen, David feel nogud tumas bikos hem no respectim king wea Jehovah anointim. Hem no letem olketa man blo hem for killim dae Saul. And hem singaot go lo Saul and talem dat hem garem chance for killim dae Saul. Hao, bae Saul changem tingting blo hem abaotem David?

Nating. Saul gohed lukaotem David. Wanfala naet David and nephew blo hem Abishai go lo camp blo Saul and no eniwan lukim olketa. And Abner, bodyguard blo Saul hem sleep tu. Abishai sei: ‘Chance blo iumi nao ia! Letem mi killim hem dae.’ David sei: ‘Jehovah nao bae duim samting lo Saul. Iumi tufala tekem nomoa spia and wata jug blo hem and go.’

David klae go ap lo wanfala maunten klosap lo camp blo Saul. Hem shout olsem: ‘Abner, why nao iu no protectim king blo iu? Wea nao wata jug and spia blo Saul?’ Saul here savve lo voice blo David and sei: ‘Iu fit for killim mi dae, bat iu no duim. Mi savve bae iu nao next king blo Israel.’ Saul go bak lo hom blo hem. Bat no evriwan lo famili blo Saul nao heitim David.