Wanfala Temple for Jehovah

Afta Solomon hem king lo Israel, Jehovah askem hem olsem: ‘Wat nao iu laekem for mi givim lo iu?’ Solomon sei: ‘Mi young nomoa, and mi no savve wat nao for mi duim. Plis givim mi wisdom for mi lukaftarem pipol blo iu.’ Jehovah sei: ‘Bikos iu ask for wisdom, bae mi mekem iu for wise winim eni man lo earth. And tu, bae mi mekem iu for barava rich. And if iu obeyim mi, bae mi mekem iu for laef longtaem.’

Solomon start nao for buildim datfala temple. Hem iusim best gold, silver, wood, and ston. Staka thousand man and woman wea garem skill waka lo datfala temple. Afta seven years, datfala temple redi nao for olketa dedicatem lo Jehovah. Hem garem wanfala altar and olketa offering stap ontop. Solomon kneel daon front lo datfala altar and prea olsem: ‘O Jehovah, disfala temple hem smol nomoa and hem no luk naes tumas fitim iu, bat plis acceptim worship blo mifala and lisin lo prea blo mifala.’ Wat nao tingting blo Jehovah abaotem datfala temple and prea blo Solomon? Semtaem afta Solomon prea finis, fire kam daon from skae and bonem olketa offering wea stap ontop lo datfala altar. Datwan showim Jehovah hapi lo datfala temple. Taem olketa Israelite lukim diswan, olketa hapi tumas.

Evriwan lo Israel and lo olketa farawe ples savve abaotem wisdom wea King Solomon garem. Pipol wea garem olketa problem kam lo Solomon for hem helpem olketa. Nomata queen blo Sheba tu kam for testim Solomon witim olketa hard kwestin. Taem hem herem hao Solomon ansarem olketa kwestin blo hem, hem sei: ‘Mi no bilivim wat pipol talem abaotem iu, bat distaem mi lukim wisdom blo iu hem winim nao wat mi herem. God blo iu Jehovah, hem blessim iu.’ Nation blo Israel garem gud laef and pipol hapi tumas. Bat evriting hem klosap for change.