Wanfala Kingdom wea Divaed

Taem Solomon worshipim Jehovah, Israel garem peace. Bat Solomon maritim staka woman from olketa difren ples, and olketa waef hia worshipim olketa idol. Isisi, wei blo Solomon hem change and hem tu start for worshipim olketa idol. Jehovah kros tumas. So hem sei lo Solomon: ‘Bae mi aotem Israel from famili blo iu and divaedem lo tufala. Bae mi givim big haf lo Israel lo wanfala lo olketa servant blo iu, and famili blo iu bae rulim nomoa smol haf.’

Jehovah mekem klia disison blo hem lo nara wei tu. Taem Jeroboam, wanfala lo olketa servant blo Solomon wakabaot followim road, hem meetim profet Ahijah. Ahijah tearem kaleko blo hem lo 12-fala pis and sei lo Jeroboam: ‘Jehovah bae tekem aot kingdom blo Israel from famili blo Solomon and divaedem lo tufala haf. Tekem tenfala pis hia bikos iu bae king ovarem tenfala tribe.’ King Solomon herem diswan and laek for killim dae Jeroboam! So Jeroboam ranawe go lo Egypt. Then gogo, Solomon hem dae and son blo hem Rehoboam nao king. Then Jeroboam savve hem sef nao for go bak lo Israel.

Olketa elder lo Israel talem Rehoboam: ‘Sapos iu treatim gud olketa pipol hia, bae olketa faithful lo iu.’ Bat olketa fren blo Rehoboam wea olketa growap tugeta sei: ‘Iu mekem laef blo pipol hia hard! Mekem olketa waka hard go moa!’ Rehoboam followim advaes blo olketa fren blo hem. Hem raf lo olketa pipol hia, and olketa bighed againstim hem. Olketa mekem Jeroboam for king blo datfala ten tribe, wea hem nao kingdom blo Israel. Nara tufala tribe, wea hem nao kingdom blo Judah, olketa gohed faithful lo Rehoboam. Twelvfala tribe blo Israel hem divaed nao.

Jeroboam no laekem pipol blo hem for go worship lo Jerusalem wea hem ples wea Rehoboam rulim. Iu savve why? Bikos Jeroboam fraet nogud olketa againstim hem and sapotim Rehoboam. So hem wakem tufala young gold buluka and sei lo pipol blo hem: ‘Jerusalem hem farawe tumas. Iufala worship lo hia nomoa.’ So pipol hia start for worshipim young gold buluka and olketa lusim Jehovah moa.