Josiah Lovem Law blo God

Josiah hem eit years old taem hem king lo Judah. Dat taem, pipol lo there olketa duim magic and worshipim olketa idol. Taem hem 16 years old, hem lane for worshipim Jehovah lo stretfala wei. Taem hem 20 years old, hem start for distroem olketa idol and olketa altar lo datfala land. And taem hem 26 years old, hem arrange for repairim temple blo Jehovah.

Lo datfala temple, hae priest Hilkiah faendem wanfala scroll blo Law blo Jehovah. Maet datfala scroll Moses nao raetem. Shaphan wea hem secretary blo king tekem kam datfala scroll lo Josiah and start for readim big datfala Law. Taem Josiah gohed lisin, hem luksavve pipol hia bin disobeyim Jehovah for staka year. King Josiah sei lo Hilkiah: ‘Jehovah hem kros tumas lo iumi. Go faendemaot tingting blo hem mekem hem talem iumi wat for duim.’ Thru lo woman profet Huldah, Jehovah sei olsem: ‘Olketa pipol lo Judah bin lusim mi. Olketa bae kasem panis bat no lo taem wea Josiah hem king yet, bikos hem hambol.’

Taem King Josiah herem datfala message, hem go lo temple and kolem kam olketa pipol lo Judah. Then hem readim big datfala Law blo Jehovah front lo evri pipol hia. Josiah and olketa pipol hia promis for obeyim Jehovah witim full heart blo olketa.

Nation blo Judah no celebratem Pasova for staka year. Bat taem Josiah readim datfala Law dat olketa shud celebratem Pasova evri year, hem talem olketa pipol hia: ‘Iumi bae mekem wanfala Pasova for Jehovah.’ Then Josiah redyim staka sakrifaes and hem assignim olketa man for singim olketa chorus lo temple. Then datfala nation celebratem Pasova and Festival blo Bred wea No Garem Yeast, wea gohed for sevenfala day. No enitaem olketa bin celebratem kaen Pasova olsem start kam from taem blo Samuel. Josiah lovem tumas Law blo God. Hao, iu laek tumas for lane abaotem Jehovah?