Josiah Chus for Duim Stret Samting

WASWE, iu tingse hem hard for duim stret samting?a​—⁠ Sapos iu ting datwan hem tru, tingting wea iu garem hem semsem olsem olketa narawan. Nomata olketa bigman tu faendem hem hard for duim stret samting. Josiah hem chus for duim stret samting. Bae iumi storyim why hem no isi taem hem duim datwan. Waswe, iu savve hu nao Josiah?​—⁠

Josiah hem pikinini bilong Amon. Amon hem wanfala king long Judah wea hem 16 year nomoa taem Josiah hem born. Amon hem rabis man olsem dadi bilong hem King Manasseh tu. Iu savve, for staka year nao Manasseh hem rulim pipol long nogud wei. Bat gogo, olketa long Assyria holem hem and tekem hem long Babylon for stap long prison. Taem Manasseh stap long prison, hem barava askem Jehovah for forgivim hem, and Jehovah forgivim hem.

Taem Manasseh kamaot from prison, hem go bak long Jerusalem and start for rul moa olsem king. Hem kwiktaem stretem olketa nogud samting wea hem duim and helpem pipol for worshipim Jehovah. Hem mas sorre tumas taem son bilong hem Amon no lusim olketa nogud wei bilong hem and followim hem. Long disfala taem nao Josiah hem born. Bible no storyim sapos Manasseh hem stap evritaem or samfala taem nomoa witim grani bilong hem Josiah. Bat waswe, iu tingse Manasseh hem trae for helpem Josiah for worshipim Jehovah?​—⁠

Manasseh hem dae taem Josiah hem six year nomoa. So dadi bilong Josiah, Amon, hem kamap king. Hem king for tufala year nomoa then olketa wakaman bilong hem killim hem dae. So Josiah kamap king long Judah taem hem eit year nomoa. (2 Chronicles, chapter 33) Iu tingse wanem nao happen bihaen? Waswe, Josiah chus for followim nogud wei bilong dadi bilong hem Amon, or gudfala wei bilong grandadi bilong hem, Manasseh wea repent?​—⁠

Nomata Josiah hem young, hem chus for worshipim Jehovah. So hem followim olketa wea lovem Jehovah and no olketa fren bilong dadi bilong hem bifor. Nomata Josiah hem eit year nomoa, hem savve hao stret samting for duim nao hem for followim pipol wea lovem God. (2 Chronicles 34:​1, 2) Waswe, iu laek for savve long olketa wea helpem Josiah and wea hem followim wei bilong olketa?​—⁠

Wanfala wea Josiah followim nao hem profet Zephaniah. Maet hem wanfala relative bilong Josiah wea born from laen bilong gudfala King Hezekiah, wea hem dadi bilong Manasseh. Long olketa firstfala year wea Josiah start for rul olsem king, Zephaniah raetem wanfala buk wea nem bilong hem Zephaniah. Zephaniah storyim olketa nogud samting wea bae kasem pipol wea no laek for duim stret samting, and Josiah barava duim olketa samting wea hem herem.

Jeremiah hem narawan wea maet iu herem story abaotem hem bifor. Jeremiah and Josiah big kam tugeta and ples bilong tufala stap klosap nomoa. Jehovah iusim Jeremiah for raetem datfala buk long Bible wea nem bilong hem Jeremiah. Taem Josiah dae long bigfala faet, Jeremiah raetem wanfala spesol singsing for showimaot hem barava sorre. (2 Chronicles 35:25) Iumi tingim wei wea tufala strongim tufala for gohed faithful long Jehovah!

Wanem nao iu lanem taem iu savve abaotem Josiah?​—⁠ Sapos dadi bilong iu tu no worshipim Jehovah, waswe, eniwan stap wea savve helpem iu for savve long God? Maet hem mami bilong iu, grani or nara relative. Maet hem nara difren man wea worshipim Jehovah, wea mami bilong iu bae letem hem for studyim Bible witim iu.

Nomata Josiah hem pikinini nomoa bat hem big fitim for luksavve hao hem mas fren witim pipol wea worshipim Jehovah. Hem bae gud tumas sapos iu tu duim olsem and chus for duim stret samting!