Wanfala Raeting lo Wall

Gogo, Belshazzar nao king lo Babylon. Lo wanfala naet, hem invaetem wan thousand important pipol lo datfala land for kam lo wanfala feast. Hem givim order for olketa wakaman blo hem tekem kam olketa gold kap wea Nebuchadnezzar tekem from temple blo Jehovah. Belshazzar and olketa guest blo hem iusim olketa kap hia for drink lo hem and praisem god blo olketa. Seknomoa, hand blo wanfala man appear and start for raetem olketa toktok lo wall blo datfala dining hall wea olketa no minim.

Belshazzar fraet fogud. Hem kolem kam olketa man blo hem for duim magic and promis olsem lo olketa: ‘If eniwan savve explainim mining blo olketa toktok hia, mi bae mekem hem for mek-thri ruler lo Babylon.’ Olketa traem, bat no eniwan savve explainim mining blo olketa toktok hia. Then queen kam insaed and sei: ‘Wanfala man wea nem blo hem Daniel, hem savve explainim mining blo olketa dream lo Nebuchadnezzar. Hem savve explainim mining blo olketa toktok hia lo iu.’

Daniel kam lo datfala king. Belshazzar sei lo hem: ‘If iu savve readim and explainim olketa toktok hia, bae mi givim iu wanfala gold nekles and mekem iu mek-thri ruler lo Babylon.’ Daniel sei: ‘Mi no laek tekem olketa present blo iu, bat bae mi talem mining blo olketa toktok hia lo iu. Dadi blo iu Nebuchadnezzar hem praod and Jehovah mekem hem for hambol. Iu savve finis lo evri samting wea happen lo hem, bat iu no respectim Jehovah taem iu drinkim wine lo olketa gold kap from temple blo Hem. So God raetem olketa toktok hia: Mene, Mene, Tekel, and Parsin. Olketa toktok hia minim dat olketa blo Media and Persia bae tekovarem Babylon, and bae iu no king nao.’

Luk olsem hem hard for eniwan tekovarem Babylon. Bikos disfala taon garem olketa strong wall raonem and wanfala big river wea deep hem protectim. Bat lo datfala naet olketa lo Media and Persia attakim taon hia. King Cyrus blo Persia mekem datfala river for ran go difren for olketa soldia blo hem savve akros and go insaed olketa gate blo datfala taon. Taem olketa kasem lo there, olketa gate hia hem open! Olketa soldia go insaed, tekovarem datfala taon, and killim dae king. Then Cyrus nao hem ruler blo Babylon.

Insaed first year lo rul blo Cyrus, hem talem disfala announcement: ‘Jehovah hem talem mi for buildim bak temple blo hem lo Jerusalem. Eniwan lo olketa pipol blo hem wea laek for help savve go.’ So olsem Jehovah bin promisim, staka lo olketa Jew go bak lo Jerusalem bihaen 70 year wea hem distroe. Cyrus givim bak olketa gold and silver kap and olketa utensil wea Nebuchadnezzar tekem from datfala temple. Iu lukim hao Jehovah iusim Cyrus for helpem pipol blo Hem?