Daniel Insaed Hol blo Olketa Lion

Nara king blo Babylon hem Darius blo Media. Darius luksavve Daniel savve tumas hao for duim waka blo hem. So hem appointim Daniel nao for boss blo olketa important man lo datfala land. Olketa man hia jealous lo Daniel and laek for killim hem dae. Olketa savve Daniel prea lo Jehovah thrifala taem evriday, so olketa sei lo Darius: ‘O king, iu shud pasim wanfala law for evriwan mas prea lo iu nomoa. Eniwan wea disobeyim datfala law, olketa mas torowem insaed hol blo olketa lion.’ Darius laekem idea hia, and hem saenem datfala law.

Semtaem wea Daniel savve abaotem datfala niu law, hem go lo haos blo hem. Hem kneel daon front lo window wea open and prea lo Jehovah. Olketa jealous man hia ran go insaed haos blo Daniel and lukim hem gohed prea. Olketa ran go bak lo Darius and sei lo hem: ‘Daniel hem disobeyim iu. Hem prea lo God blo hem thrifala taem evriday.’ Darius lovem Daniel and no laekem hem for dae. Full day hem trae for tingim eni wei for sevem Daniel. Bat hem no savve changem datfala law wea hem saenem finis nomata hem wanfala king. Hem mas givim order for olketa man blo hem torowem Daniel insaed hol blo olketa lion wea raf tumas.

Lo datfala naet, Darius wari tumas abaotem Daniel and hem no savve sleep. So lo morning, hem ran go lo datfala hol and singaot go lo Daniel: ‘Hao, God blo iu hem sevem iu?’

Darius herem wanfala voice. Datwan hem Daniel! Hem singaot kam lo Darius: ‘Angel blo Jehovah satem mouth blo olketa lion. Olketa nating duim eniting lo mi.’ Darius hem hapi tumas! Hem givim order for olketa pullimaot Daniel from datfala hol. No eniting kasem Daniel. Then king givim order olsem: ‘Torowem olketa man wea accusim Daniel insaed lo datfala hol.’ Taem olketa torowem olketa man hia insaed datfala hol, olketa lion kaikaim olketa.

Darius givim disfala order lo pipol blo hem: ‘Evriwan mas fraet lo God blo Daniel bikos hem rescuem Daniel from lion.’

Hao, iu prea lo Jehovah evriday olsem Daniel?