Wall blo Jerusalem

Lo taem blo Ezra, wanfala Israelite waka for King Artaxerxes wea nem blo hem Nehemiah, hem stap lo Shushan, wanfala taon lo Persia. Brata blo Nehemiah kam from Judah for storyim wanfala nogud nius. Hem sei: ‘Pipol wea go bak lo Jerusalem olketa no stap sef. Olketa nating buildim bak olketa wall and olketa gate blo datfala taon, wea olketa blo Babylon bin distroem.’ Nehemiah feel nogud. Hem laek for go lo Jerusalem for helpem olketa, so hem prea lo Jehovah mekem king letem hem for go.

King luksavve Nehemiah luk sorre. So hem sei: ‘No enitaem mi lukim iu sorre olsem. Iu warim eniting?’ Nehemiah sei: ‘Mi wari bikos taon blo mi lo Jerusalem hem nogud tumas.’ Then king ask olsem: ‘Wat nao iu laek for mi duim for iu?’ Semtaem nomoa, Nehemiah prea kwaet lo mind blo hem. Then hem sei: ‘Plis, letem mi go for buildim bak olketa wall lo Jerusalem.’ King Artaxerxes talem Nehemiah dat hem savve go, and king mek sure Nehemiah sef taem hem travel go. And tu, hem appointim Nehemiah for governor blo Judah and givim hem olketa timba for olketa gate blo datfala taon.

Taem Nehemiah arrive lo Jerusalem, hem go and inspectim olketa wall blo datfala taon. Then hem kolem kam olketa priest and olketa deputy and hem sei olsem lo olketa: ‘Diswan hem nogud tumas. Iumi mas buildim bak.’ Pipol hia agree and olketa start for buildim bak olketa wall.

Bat samfala lo olketa enemy blo olketa Israelite tok spoelem olketa and sei: ‘Nomata wanfala fox savve foldaonem datfala wall ston wea iufala buildim.’ Olketa wea waka lo datfala wall ignorem toktok blo olketa enemy hia and gohed waka. And datfala wall hem hae and strong tumas.

Olketa enemy blo olketa disaed for kam from evri saed lo Jerusalem for attakim olketa lo taem wea olketa no expectim. Taem olketa Jew herem plan blo olketa, datwan mekem olketa fraet tumas. Bat Nehemiah sei: ‘Iufala no fraet. Jehovah hem stap witim iumi.’ Hem putim olketa man for security for protectim olketa wakaman, and olketa enemy no fit for attakim olketa.

Insaed 52 days nomoa, olketa completim nao datfala wall and olketa gate. Nehemiah tekem kam evri Levite for olketa dedicatem wall blo Jerusalem. Hem organizem olketa lo tufala grup for singsing. Olketa wakabaot go ap lo datfala wall followim olketa step lo Fountain Gate and march go lo opposite direction raonem datfala taon. Olketa blowim olketa trumpet, pleim olketa cymbal, and olketa harp and singsing lo Jehovah. Ezra hem leadim wanfala grup, and Nehemiah leadim nara grup, gogo olketa meet lo temple. And evriwan, olketa man, olketa woman, and olketa pikinini, olketa celebrate and offerim olketa sakrifaes lo Jehovah. Olketa wea stap farawe savve herem olketa.