Word Bilong Jehovah Hem Laef
Olketa Main Point From Buk Bilong Nehemiah
TWELVFALA year hem go pas finis from taem wea olketa last samting wea buk bilong Ezra storyim hem happen. Hem klosap nao for “komand hem go aot for buildim moa Jerusalem,” wea datwan hem markem start bilong 70 week bilong olketa year wea lead go for taem wea Messiah bae kam. (Daniel 9:24-27) Buk bilong Nehemiah hem history abaotem pipol bilong God wea duim waka for buildim bak wall bilong Jerusalem. Hem storyim samting wea happen insaed 12-fala important year wea start long 456 B.C.E. go kasem samting olsem 443 B.C.E.
Governor Nehemiah raetem interesting story hia abaotem hao tru worship hem kamap hae taem pipol bilong Jehovah God strong for duim samting and depend evribit long hem. Hem showimaot klia hao Jehovah nao directim olketa samting for fulfillim will bilong hem. Hem story tu abaotem wanfala leader wea strong and no fraet. “From word bilong God hem laef and garem paoa for duim samting,” message long buk bilong Nehemiah garem olketa nambawan leson for evri trufala worshiper distaem.—Hebrews 4:12.
“GOGO, OLKETA FINIS FOR BUILDIM DATFALA WALL”
Nehemiah stap long castle bilong Shushan and hem garem position wea showimaot King Artaxerxes Longimanus barava trustim hem. Nehemiah hem barava sorre tumas taem hem herem pipol bilong hem “kasem barava hard taem and kasem shame; and wall bilong Jerusalem hem brek finis, and olketa gate bilong hem bone long fire.” Hem prea strong long God for helpem hem long wanem bae hem duim. (Nehemiah 1:3, 4) Gogo, king lukim Nehemiah nating hapi, and king letem hem for go long Jerusalem.
Bihaen Nehemiah kasem Jerusalem, hem go chekim wall long naet, and hem storyim long olketa Jew plan bilong hem for buildim bak datfala wall. Waka for build hem start and long semtaem wei for againstim waka hem start tu. Bat, anda long lead bilong Nehemiah wea no fraet, “gogo, olketa finis for buildim datfala wall.”—Nehemiah 6:15.
Ansa for Olketa Bible Kwestin:
1:1; 2:1—Waswe, olketa start for kaontem from semtaem datfala “mek-twenti year” wea tufala verse hia storyim? Ia, datfala mek-20 year hem minim mek-20 year long rul bilong King Artaxerxes. Bat, wei wea olketa kaontem nao hem difren long tufala verse hia. History showimaot Artaxerxes start for rul long year 475 B.C.E. From hem wei bilong olketa scribe long Babylon for kaontem olketa year wea olketa king long Persia rul from Nisan (March/April) go kasem nara Nisan, firstfala year long rul bilong Artaxerxes hem start long Nisan 474 B.C.E. So, mek-20 year long rul bilong hem wea Nehemiah 2:1 story abaotem hem start long Nisan 455 B.C.E. Month bilong Chislev (November/December) long Nehemiah 1:1, hem Chislev bilong 456 B.C.E. Nehemiah storyim hao datfala month tu hem insaed long mek-20 year long rul bilong Artaxerxes. Maet long wei olsem, hem kaontem olketa year from date wea Artaxerxes kamap king. Or maet Nehemiah kaontem taem followim wanem olketa Jew distaem kolem civil year, wea start long month bilong Tishri, wea semsem olsem September/October. Nomata wanem, 455 B.C.E hem year wea komand hem go aot for buildim bak Jerusalem.
4:17, 18—Hao nao man savve iusim wanfala hand nomoa for duim datfala waka for buildim bak wall? Hem isi nomoa for olketa wea karem hevi samting. Sapos olketa karem hevi samting antap long hed or shoulder, olketa savve balancem witim wanfala hand “taem nara hand holem missile.” Olketa wea build wea mas iusim tufala hand evriwan, each wan “garem sword long hip bilong hem taem hem build.” Long wei olsem, olketa redi for faet sapos enemy hem attak.
5:7—Wanem nao hem minim taem Bible sei Nehemiah “tok stret long olketa bigman and olketa deputy ruler”? Olketa man hia askem pipol for peim bak interest witim selen wea olketa kaonem, bat diswan hem samting wea Law bilong Moses tambuim. (Leviticus 25:36; Deuteronomy 23:19) And tu, interest long selen wea olketa hia askem hem hae tumas. Sapos olketa wea kaon peim 1 percent evri month diswan bae semsem witim 12 percent for wanfala year. (Nehemiah 5:11) Diswan nating showimaot kaenfala fasin long pipol wea kasem hevi finis for peim tax and wea no garem inaf kaikai. Nehemiah tok stret long olketa wea rich long wei wea hem iusim Law bilong God for repruvim olketa and long wei olsem hem showimaot rong samting wea olketa duim.
6:5—From olketa savve putim olketa private leta insaed bag wea olketa taemap, why nao Sanballat sendem go “wanfala open leta” long Nehemiah? Maet Sanballat ting for showimaot laea toktok insaed datfala open leta long pablik. Maet hem hope diswan bae mekem Nehemiah kros tumas and bae hem lusim datfala waka for build, for kam defendim hemseleva. Or maet Sanballat tingse toktok insaed datfala leta bae mekem olketa Jew barava fraet and stop nao for duim datfala waka. Nehemiah nating letem datwan for mekem hem fraet, bat hem gohed nomoa for duim assignment wea God givim long hem.
Olketa Leson for Iumi:
1:4; 2:4; 4:4, 5. Taem iumi kasem olketa hard taem or iumi mas disaedem olketa important samting, iumi shud “gohed for prea” and followim direction insaed Bible or wea kam from organization bilong Jehovah.—Romans 12:12.
1:11–2:8; 4:4, 5, 15, 16; 6:16. Jehovah ansarem olketa prea bilong olketa servant bilong hem wea olketa talem from heart.—Psalm 86:6, 7.
1:4; 4:19, 20; 6:3, 15. Nomata Nehemiah hem man for kea for pipol, hem showimaot gudfala example long wei wea hem strong for followim raeteous samting.
1:11–2:3. Hapi bilong Nehemiah no kam from wei wea hem garem hae position olsem man for servem wine. Hem kam from wei for mekhae long trufala worship. Worship bilong iumi for Jehovah and evri samting wea join witim datwan nao shud kamap main samting long laef bilong iumi and main samting wea mekem iumi hapi.
2:4-8. Jehovah nao mekem Artaxerxes for letem Nehemiah go for buildim bak wall bilong Jerusalem. Proverbs 21:1 hem sei: “Heart bilong wanfala king hem olsem plande smol wata long hand bilong Jehovah. Hem savve tanem datwan followim eni wei wea hem laekem.”
3:5, 27. Iumi shud no olsem “olketa hae class wan” bilong Tekoite wea ting long olketa smol waka for saed bilong tru worship olsem hem no fitim olketa for duim. Bat, iumi savve followim example bilong olketa nara Tekoite wea willing for duim eni waka nomoa.
3:10, 23, 28-30. Nomata samfala fit for muv long nara ples wea garem bigfala need for olketa wea talemaot Kingdom, staka long iumi sapotim tru worship long hom bilong iumi. Iumi duim olsem long wei for help for buildim olketa Kingdom Hall and help long disaster relief waka, bat main wei hem for preach abaotem Kingdom.
4:14. Taem pipol againstim iumi, iumi savve winim wei for fraet sapos iumi tingim datwan “wea nambawan and Wan wea iumi fraet long hem.”
5:14-19. Governor Nehemiah hem nambawan example for olketa Christian overseer long wei wea hem showimaot hambol fasin, no tingim hemseleva, and garem gudfala tingting. Nomata hem strong for mek sure pipol followim Law bilong God, hem nating kontrolem olketa narawan for mekem hemseleva kasem gud samting. Hem duim samting for olketa wea poor and olketa wea kasem hevi. Nehemiah hem nambawan example for evri servant bilong God long wei for showimaot kaenfala fasin.
“REMEMBERIM MI, GOD BILONG MI, FOR GUDFALA SAMTING”
Stretawe bihaen olketa finis for buildim wall bilong Jerusalem, Nehemiah wakem olketa gate and duim samfala samting for mekem datfala taon stap sef. Hem start recordim famili laen bilong pipol. Taem evriwan hipap “long pablik ples wea stap front long Wata Gate,” datfala priest Ezra hem readim buk bilong Law bilong Moses long olketa, and Nehemiah and olketa Levite explainim datfala Law. (Nehemiah 8:1) From olketa savve abaotem Festival bilong Olketa Smol Leaf Haos, olketa hapi tumas for celebratem datwan.
Bihaen datwan, nara hipap moa hem kamap, and long datfala taem “seed bilong Israel” talemaot olketa sin bilong nation hia, olketa Levite lukluk moa long wei wea God deal witim Israel, and pipol promis “for wakabaot followim law bilong tru God.” (Nehemiah 9:1, 2; 10:29) From no staka pipol stap yet long Jerusalem, olketa chusim wanfala man from evri tenfala man for go stap long there. Then, from olketa barava hapi tumas taem olketa dedicatem datfala wall, nomata “olketa farawe ples savve herem noise bilong hapi long Jerusalem.” (Nehemiah 12:43) Bihaen Nehemiah stap long Jerusalem for twelvfala year, hem go bak waka moa for Artaxerxes. No longtaem bihaen, olketa Jew start for duim olketa samting wea no klin. Taem Nehemiah kam bak moa long Jerusalem, hem duim samting for stretem datwan. For saed bilong hemseleva, hem talem disfala hambol toktok: “Rememberim mi, O God bilong mi, for gudfala samting.”—Nehemiah 13:31.
Ansa for Olketa Bible Kwestin:
7:6-67—Why nao list bilong Nehemiah for olketa Jew wea go bak witim Zerubbabel long Jerusalem, hem difren from list bilong Ezra saed long haomas man nao long each famili? (Ezra 2:1-65) Maet reason for diswan nao hem bikos Ezra and Nehemiah iusim difren information. Olsem example, namba bilong olketa wea raetem nem for go bak maet difren from namba bilong olketa wea really go bak. Maet tufala list hia difren bikos samfala Jew wea no savve pruvim laen bilong olketa long datfala taem duim diswan bihaen. Bat, wanfala samting hem semsem long tufala list hia: Namba bilong olketa wea go bak hem 42,360, wea namba bilong olketa slave and olketa man for singsing no insaed diswan.
10:34—Why nao pipol mas provaedem firewood? Law bilong Moses no komandim pipol for provaedem firewood. Diswan hem olsem from need hem kamap. For bonem olketa sakrifaes long altar needim barava staka firewood. Luk olsem, no staka Nethinim stap wea serve long temple olsem olketa slave wea no Israelite. So, for mekem firewood no finis olketa chusim samfala for tekem kam datwan.
13:6—Hao long nao Nehemiah no stap long Jerusalem? Bible sei “bihaen,” Nehemiah askem king for no waka for lelebet taem mekem hem go bak long Jerusalem. So hem hard for savve hao long nao hem no stap long Jerusalem. Bat taem Nehemiah go bak long Jerusalem, hem lukim pipol no sapotim olketa priest and no keepim tu Sabbath law. Plande maritim olketa woman wea no Israelite, and olketa pikinini bilong olketa nating savve long Jew languis. From olketa samting kamap nogud tumas, masbi Nehemiah no stap long Jerusalem for longfala taem.
13:25, 28—Witim wei for ‘tok stret’ long olketa Jew wea bakslaed, wanem moa Nehemiah duim for stretem olketa? Nehemiah ‘talem hao trabol bae kasem olketa,’ wea minim hem talem hao olketa bae kasem olketa judgment wea stap insaed Law bilong God. Hem ‘hitim samfala’ long tokpiksa wei wea maet datwan minim hem duim judicial samting againstim olketa. For showimaot hem barava feel nogud long samting olketa duim wea no stret, hem ‘pullimaot samfala hair bilong olketa.’ Hem raosem tu granson bilong Hae Priest Eliashib wea maritim wanfala dota bilong Sanballat, datfala Horonite.
Olketa Leson for Iumi:
8:8. Iumi wea teachim Word bilong God “givim mining” long datwan long wei for talem klia, mekhae long stretfala word, explainim olketa scripture long stretfala wei, and storyim hao for followim olketa.
8:10. Man kasem “hapi bilong Jehovah” from wei for luksavve and satisfaem spiritual need bilong hem and for followim direction wea kam from God. Hem important tumas for iumi waka hard for studyim Bible, attendim olketa Christian meeting evritaem, and strong for share long waka for preachim Kingdom and mek disaepol!
11:2. For lusim olketa samting wea man kasem from laen dadi bilong hem and for muv go long Jerusalem, hem minim man mas lusim samfala samting and kasem samfala hard samting. Olketa wea willing for duim diswan showimaot fasin for sakrifaesim seleva. Iumi tu savve duim sem samting taem chance kamap for duim samting for helpem olketa narawan long taem bilong olketa convention and long olketa narataem.
12:31, 38, 40-42. For singsing hem nambawan wei for praisem Jehovah and hem showimaot feeling bilong iumi for thankiu long hem. Iumi shud singsing witim full heart long enitaem wea iumi olketa Christian hipap.
13:4-31. Iumi mas careful for no letem wei for lovem tumas material samting, raverave fasin, and wei for apostate isisi affectim iumi.
13:22. Nehemiah luksavve hem bae givim ansa long God. Iumi tu need for luksavve iumi bae givim ansa long Jehovah.
Hem Barava Important Tumas for Jehovah Sapotim Iumi!
Man wea raetem psalm singsing olsem: “Sapos Jehovah no buildim haos, then hem iusles nomoa for olketa man waka hard for buildim.” (Psalm 127:1) Buk bilong Nehemiah barava showimaot hao datfala toktok hem tru!
Leson for iumi hem klia. Sapos iumi laek win long olketa samting wea iumi duim, Jehovah mas appruvim iumi. Iumi mas no tingse Jehovah bae rewardim iumi sapos iumi no mekem tru worship kamap first samting long laef bilong iumi. So, olsem Nehemiah, iumi laek for mekem worship bilong Jehovah and wei wea diswan muv ahed kamap main samting long laef bilong iumi.
[Piksa long page 28]
“Heart bilong wanfala king hem olsem plande smol wata long hand bilong Jehovah”
[Piksa long page 29]
Nehemiah wea hem man for duim samting and garem fasin for kea hem go long Jerusalem
[Piksa long page 30]
Waswe, iu savve hao for “givim mining” long Word bilong God?