Taem Jesus Hem Young

Joseph and Mary stap lo Nazareth witim Jesus and olketa nara son and dota blo tufala. Joseph waka olsem carpenter for provaed for famili blo hem, and teachim famili blo hem abaotem Jehovah and olketa Law blo hem. Famili blo hem savve go evritaem lo sinagog for worship and evri year olketa savve go lo Jerusalem for celebratem Pasova.

Taem Jesus 12 years old, hem go witim famili blo hem lo Jerusalem olsem olketa savve duim evritaem. Datfala taon hem full lo pipol wea kam for celebratem Pasova. Bihaen pasova, Joseph and Mary start for gogo bak lo hom blo olketa, tufala tingse Jesus hem insaed lo grup wea olketa go tugeta. Bat taem tufala askem Jesus lo olketa relative, olketa no lukim hem.

So tufala go bak moa lo Jerusalem, and for thrifala day tufala lukaotem Jesus. Gogo, tufala go lo temple. Lo there, tufala lukim Jesus hem sidaon midol lo olketa man wea teachim law, hem lisin gud and gohed for askem kwestin lo olketa. Olketa man hia wea teachim law sapraes fogud lo Jesus and start for askem olketa kwestin lo hem. And olketa sapraes tumas for herem olketa ansa blo hem. Olketa luksavve Jesus savve gud lo Law blo Jehovah.

Joseph and Mary wari tumas. Mary sei: ‘Pikinini blo mi, iu gogo lo wea? Mitufala lukaotem iu lo evri ples!’ Jesus sei: ‘Hao, iutufala no savve dat mi mas stap lo haos blo Dadi blo mi?’

Then Jesus go bak lo Nazareth witim parents blo hem. Joseph teachim Jesus hao for duim waka blo carpenter. Iu ting, wat kaen man nao Jesus taem hem young? Taem Jesus growap, hem gohed for garem wisdom and God barava hapi lo hem and olketa man tu hapi lo hem.