Jesus Hem Lane for Obey Evritaem

WASWE, samfala taem hem hard for iu obey evritaem?​—a Hem no iu nomoa wea feel olsem. Evriwan faendem hem no isi for obey samfala taem. Waswe, iu savve Jesus tu mas lane for obey?​—

Waswe, iu savve hu nao evri young wan shud obeyim?​— Ia, hem dadi and mami bilong iumi. Bible hem sei: ‘Iufala wan mind witim Lord long wei for obeyim mami and dadi bilong iufala.’ (Ephesians 6:1) Hu nao dadi bilong Jesus?​—Hem nao Jehovah God, and hem Dadi bilong iumi tu. (Matthew 6:​9, 10) Bat hem tru tu, sapos iu sei Joseph hem dadi bilong Jesus, and Mary hem mami bilong hem. Waswe, iu savve hao nao olketa kamap mami and dadi bilong hem?​—

Angel Gabriel talem Mary hao hem bae garem wanfala pikinini nomata hem no sleep witim eni man. Jehovah duim wanfala big mirakol for Mary kamap babule. Gabriel talem klia long Mary olsem: “Paoa bilong Barava Haefala God bae protectim iu. Dastawe datfala pikinini wea born bae hem holy and olketa bae kolem hem Son bilong God.”​—Luke 1:​30-​35.

God tekem laef bilong Son bilong hem long heven and putim insaed bele bilong Mary. From disfala mirakol, Jesus grow insaed bele bilong Mary olsem olketa nara baby wea grow insaed bele bilong mami bilong olketa. Samting olsem naen month bihaen, Jesus born nao. Long datfala taem, Joseph maritim Mary nao, and staka pipol tingse Joseph hem really dadi bilong Jesus. So Joseph hem adoptim nomoa Jesus. Diswan minim, Jesus hem garem tufala dadi!

Taem Jesus hem 12 year nomoa, hem duim wanfala samting wea showimaot hem barava lovem Dadi bilong hem Jehovah wea stap long heven. Long datfala taem, famili bilong Jesus go for Pasova long Jerusalem wea stap farawe, olsem olketa savve duim evritaem. Bihaen, taem olketa gogo bak long Nazareth, Joseph and Mary no savve Jesus no go bak witim olketa. Waswe, iu tingim why nao maet olketa forgetim hem?​—

Hem bikos, long datfala taem Joseph and Mary garem samfala nara pikinini tu. (Matthew 13:55, 56) And maet olketa relative bilong olketa gogo witim olketa tu, olsem James and John and dadi bilong tufala, Zebedee, and mami bilong tufala, Salome wea maet hem sista bilong Mary. So maet Mary tingse Jesus hem witim olketa nara relative wea olketa gogo tugeta.​—Matthew 27:56; Mark 15:40; John 19:25.

Taem Joseph and Mary faendaot Jesus no kam witim olketa, olketa kwiktaem go bak long Jerusalem. Tufala lukaotem son bilong tufala evriwea. Long mek-thri day, olketa faendem hem nao long temple. Mary sei olsem long hem: “Why nao iu duim olsem long mitufala? Mi and dadi bilong iu lukaotem iu long evri ples and mitufala barava wari fogud.” Bat Jesus sei long tufala: “Hao nao iufala lukaotem mi? Iufala shud savve finis, mi mas stap long haos bilong Dadi bilong mi ia!”​—Luke 2:​45-​50.

Waswe, iu tingse hem no stret for Jesus tok olsem long mami bilong hem?​— Hem tru, mami and dadi bilong hem savve hem laekem tumas for worship long haos bilong God. (Psalm 122:1) So waswe, hem stret nomoa for Jesus tingse long temple nao first ples wea tufala shud kam for faendem hem?​— Bihaen nao, Mary ting raonem samting wea Jesus talem.

Hao nao Jesus feel abaotem Joseph and Mary?​— Bible hem sei: “[Jesus] go bak long Nazareth witim tufala, and hem gohed for obeyim tufala.” (Luke 2:​51, 52) Wanem nao iumi savve lanem from example bilong Jesus?​— Ia, iumi tu mas obeyim mami and dadi bilong iumi evritaem.

Bat, hem no isi for Jesus obey evritaem, and hem no isi tu for hem obeyim Dadi bilong hem long heven.

Long naet bifor Jesus hem dae, hem askem sapos Jehovah savve changem tingting bilong Hem, abaotem samting wea Jehovah laekem hem for duim. (Luke 22:42) Bat Jesus obeyim God nomata hem no isi. Bible sei, “hem lanem fasin for obey from olketa samting wea mekem hem safa.” (Hebrews 5:8) Waswe, iu tingse iumi tu savve lanem samting from disfala leson?​—