John Redyim Wei

John, wea hem son blo Zechariah and Elizabeth, hem wanfala profet taem hem growap. Jehovah iusim John for teachim pipol dat Messiah bae kam. Bat instead for hem go preach lo olketa sinagog and lo olketa taon, hem go preach lo wilderness. Pipol from Jerusalem and evriwea lo Judea kam lo John for hem teachim olketa. Hem teachim olketa dat for mekem God hapi, olketa mas stop for duim nogud samting. Bihaen olketa herem wat John talem, staka pipol repent and John baptaesim olketa lo Jordan River.

Laef blo John hem simpol nomoa. Hem werem kaleko wea olketa wakem from skin blo camel and kaikaim olketa grashopa and wild honey. And pipol laek savve hu nao John. Nomata olketa Pharisee and Sadducee wea praod tu kam lo hem. John talem olketa: ‘Iufala mas changem wei blo iufala and repent. No tingse iufala spesol just bikos iufala sei iufala pikinini blo Abraham. Hem no minim iufala nao olketa pikinini blo God.’

Staka kam lo John and ask olsem: ‘Wat nao mifala mas duim for mekem God hapi?’ John sei lo olketa Jew: ‘If iu garem tufala kaleko, givim wanfala lo man wea no garem.’ Iu savve why nao hem sei olsem? Hem laekem olketa disaepol blo hem for savve, for mekem God hapi olketa mas lovem pipol.

John sei lo olketa man for kolektem tax: ‘Iufala mas honest and no ravem eniwan.’ Then hem sei lo olketa soldia: ‘Iufala mas no acceptim bribe or laea.’

Olketa Priest and olketa Levite tu kam lo John and ask olsem: ‘Iu hu ia? Evriwan laek for savve.’ John sei: ‘Olsem Isaiah talem, mi nao wanfala voice wea singaot kam from wilderness wea leadim pipol go lo Jehovah.’

Pipol laekem tumas teaching blo John. Staka laek for savve if John nao datfala Messiah. Bat hem sei: ‘Samwan wea winim mi bae kam. Mi no fit for aotem rope lo sandol blo hem. Mi baptaesim pipol lo wata, bat hem bae baptaesim pipol lo holy spirit.’