Jesus Kamap Messiah

John bin preachim dat ‘samwan wea winim hem bae kam.’ Taem Jesus samting olsem 30 years old, hem lusim Galilee and go lo Jordan River, ples wea John baptaesim pipol. Jesus laekem John for baptaesim hem, bat John sei: ‘Mi shud no baptaesim iu. Iu nao shud baptaesim mi.’ Jesus sei lo John: ‘Jehovah laekem iu for baptaesim mi.’ So tufala go lo Jordan River, and John baptaesim Jesus and full body blo hem nao go insaed wata.

Afta Jesus kamaot from wata, hem prea. Semtaem nomoa, skae hem open and spirit blo God kam daon ontop lo hem olsem wanfala kurukuru. Then Jehovah tok kam from heven: ‘Iu nao Son blo mi, wea mi lovem tumas, mi hapi lo iu.’

Taem spirit blo Jehovah kam lo Jesus, hem kamap datfala Christ, or Messiah. And hem start nao for duim waka wea Jehovah sendem hem kam lo earth for duim.

Stretawe afta Jesus hem baptaes, hem go lo wilderness and spendem 40 days lo there. Taem hem kam bak, hem go for lukim John. Taem John lukim Jesus kam lo hem, John sei: ‘Diswan nao datfala Lamb blo God wea bae aotem sin blo evri pipol lo world.’ John talem datwan for pipol savve dat Jesus nao datfala Messiah. Iu savve wat happen lo Jesus taem hem lo wilderness? Bae iumi faendaot.