Wanfala Woman lo Well

Afta Pasova, Jesus and olketa disaepol blo hem go pas lo Samaria taem olketa go bak lo Galilee. Taem olketa klosap lo taon blo Sychar, Jesus rest lo wanfala ples wea olketa kolem lo well blo Jacob. Taem hem rest lo there, olketa disaepol blo hem go lo datfala taon for peim kaikai.

Wanfala woman kam lo datfala well for tek wata. Jesus sei lo hem: ‘Mi laekem wata for drink.’ Woman hia sei: ‘Why nao iu story lo mi? Mi woman blo Samaria. Olketa Jew no savve story witim olketa Samaritan.’ Jesus talem hem: ‘If iu savve lo mi, bae iu askem mi wata for drink and bae mi givim iu wata wea savve mekem man laef.’ Woman hia ask olsem: ‘Wat nao iu minim?’ ‘Iu no even garem eni baket.’ Jesus sei: ‘Eniwan wea drinkim wata wea mi givim bae no thirsty moa.’ Datfala woman sei: ‘Sir, givim kam datfala wata lo mi.’

Then Jesus sei lo hem: ‘Go tekem kam hasband blo iu.’ Woman hia sei: ‘Mi no garem eni hasband.’ Jesus sei: ‘Tru samting nao iu talem. Iu marit faevfala taem finis, and distaem man wea iu stap witim, iu no maritim.’ Datfala woman sei: ‘Distaem nao mi just luksavve iu wanfala profet. Pipol blo mi bilivim dat mifala savve worshipim God lo disfala maunten, bat olketa Jew sei mifala savve worship lo Jerusalem nomoa. Mi bilivim taem Messiah kam, bae hem teachim mifala hao for worship.’ Then Jesus talem samting wea hem no talem yet lo eniwan. Hem sei ‘Mi nao datfala Messiah.’

Datfala woman kwiktaem go bak lo taon blo hem and talem pipol blo hem. Hem sei: ‘Ating mi lukim nao datfala Messiah. Hem savve lo evri samting abaotem mi. Kam, iumi go lukim hem!’ Olketa followim hem go bak lo datfala well and lisin taem Jesus teach.

Olketa blo Samaria invaetem Jesus for stap lo taon blo olketa. Hem teach lo there for tu days and staka pipol garem faith lo hem. Olketa sei lo datfala Samaritan woman: ‘Afta mifala lisin lo disfala man, mifala savve hem nao man wea bae sevem pipol lo world.’