Jesus Duim Staka Mirakol

Jesus kam lo earth for preachim gud nius abaotem Kingdom blo God. For showim wat Jesus bae duim taem hem King, Jehovah givim hem holy spirit for duim olketa mirakol. Hem savve kiurim evri difren kaen sik. Lo eni ples wea hem go, pipol wea sik savve kam lo hem for hem helpem olketa, and hem kiurim sik blo evriwan. Olketa wea blind savve lukluk, olketa wea deaf savve herehere, pipol wea paralaes savve wakabaot, and olketa wea demon stap lo olketa, olketa gud bak. Nomata olketa tasim nomoa end lo kaleko blo hem, olketa savve gud bak nao. Pipol followim Jesus lo evri ples wea hem go. Nomata Jesus laek for stap seleva, no enitaem hem raosem pipol.

Wantaem, pipol tekem kam wanfala man wea paralaes lo haos wea Jesus stap. Bat datfala haos hem fulap tumas lo pipol and olketa no savve go insaed. So olketa mekem wanfala hol lo ruf and daonem datfala man go daon lo Jesus. Then Jesus sei lo datfala man: ‘Iu getap and wakabaot.’ Taem pipol lukim datwan, olketa sapraes tumas.

Nara taem, taem Jesus go lo wanfala vilij, tenfala man wea garem leprosy standap farawe and singaot kam: ‘Jesus, helpem mifala!’ Lo datfala taem, olketa wea garem leprosy no savve kam klosap lo olketa nara pipol. Jesus talem olketa man hia for go lo temple, wea hem nao wat Law blo Jehovah talem for olketa wea garem leprosy mas duim bihaen olketa gud bak. Taem olketa wakabaot followim road yet, olketa gud bak nao. Taem wanfala lo olketa man hia luksavve hem gud bak from sik blo hem, hem kam bak for thankiu lo Jesus and praisem God. Lo tenfala man hia, wanfala nomoa talem thankiu lo Jesus.

Wanfala woman wea bin sik for 12 years hem laekem tumas for gud bak. Hem kam bihaen lo Jesus insaed wanfala big crowd and tasim end lo kaleko blo hem. Semtaem nomoa, woman hia gud bak nao. Then Jesus hem sei: “Hu nao tasim mi?” Datfala woman hem fraet fogud, bat hem kam and talem lo Jesus dat hem nao tasim hem. Jesus comfortim hem taem hem sei: ‘Dota, iu go and no wari.’

Wanfala bigman wea nem blo hem Jairus begim Jesus olsem: ‘Kam lo haos blo mi! Smol gele blo mi hem sik tumas.’ Bat bifor Jesus kasem haos blo Jairus, datfala gele hem dae nao. Taem Jesus kasem lo there, hem lukim staka pipol nao kam and sorre witim datfala famili. Jesus sei lo olketa: ‘Iufala no krae. Hem sleep nomoa.’ Then hem holem hand blo datfala gele and sei: “Smol gele, iu getap!” Semtaem nomoa hem getap nao, and Jesus talem mami and dadi blo hem for givim kaikai lo hem. Masbi parents blo datfala gele hapi tumas!