Jesus Feedim Staka Thousand Pipol

Just bifor Pasova lo year 32 C.E., olketa aposol kam bak from wanfala preaching trip. Olketa taed tumas, so Jesus talem olketa for go insaed boat and hem tekem olketa go lo Bethsaida mekem olketa savve rest. Bat taem olketa klosap kasem shore, Jesus lukim staka thousand pipol nao weit finis lo there. Jesus kaen lo pipol hia nomata hem laek for stap seleva witim olketa aposol blo hem. Hem kiurim olketa wea sik and start for teachim olketa. For full day, Jesus teachim olketa abaotem Kingdom blo God. Lo evening, olketa aposol blo hem kam lo hem and sei: ‘Pipol hia mas hangere nao ia. Sendem olketa go mekem olketa savve faendem kaikai for olketa.’

Jesus sei lo olketa aposol: ‘Olketa no need for go. Iufala nao givim kaikai lo olketa.’ Olketa aposol ask olsem: ‘Hao, iu laek for mifala go baem bred for olketa?’ Philip, wanfala lo olketa aposol blo hem sei: ‘Nomata if iumi garem staka selen, hard for iumi peim bred for fitim evriwan.’

Jesus askem olketa: ‘Iumi garem eni kaikai?’ Andrew sei: ‘Iumi garem nomoa faevfala bred and tufala smol fish. Hard for hem fitim iumi evriwan.’ Jesus sei: ‘Tekem kam datfala bred and fish.’ Then hem talem evri pipol for sidaon lo olketa grup, samfala grup hem 50 pipol and samfala grup hem 100. Jesus tekem bred and fish hia, hem luk go ap lo skae and prea. Then hem givim olketa kaikai hia lo olketa aposol, and olketa aposol sharem lo evriwan. 5,000 man, woman and olketa pikinini olketa kaikai gogo olketa fulap nao. Afta olketa kaikai finis, olketa aposol kolektem evri leftova, mekem olketa no weistim eni samting. Olketa fulimap 12-fala basket! Datwan hem spesol mirakol, iaman?

Pipol hia sapraes tumas and laek for mekem Jesus king blo olketa. Bat Jesus savve hem no taem yet for Jehovah mekem hem king. So hem sendem olketa pipol hia go and hem talem olketa aposol blo hem for olketa go narasaed lo Sea blo Galilee. Olketa aposol go insaed boat blo olketa, and Jesus go stap seleva lo wanfala maunten. Why nao olsem? Bikos hem laek spendem taem seleva for prea lo Dadi blo hem. Nomata Jesus busy tumas, hem markem taem for prea evritaem.