Wat Iumi Lanem From Mirakol blo Jesus for Provaedem Bred

1. Lo taem blo Bible, hao important nao bred?

LO TAEM blo Bible, bred hem wanfala main kaikai blo pipol. (Gen. 14:18; Luke 4:4) Samfala taem Bible even iusim toktok “bred” for minim evri kaikai, bikos bred hem wanfala important samting lo laef blo olketa. (Matt. 6:11; Acts 20:​7, English study note) Jesus iusim tu bred insaed tufala famous mirakol blo hem. (Matt. 16:​9, 10) John chapter 6 storyim wanfala lo olketa mirakol hia. Taem iumi studyim diswan, luk for olketa leson wea iumi savve lanem and followim.

2. Wat nao situation wea kamap wea mekem pipol for needim kaikai?

² Afta olketa aposol blo Jesus finis preaching lo wanfala ples, Jesus go witim olketa akros lo narasaed lo Sea blo Galilee lo boat, mekem olketa rest lelebet. (Mark 6:​7, 30-32; Luke 9:10) Olketa go lo wanfala kwaet ples lo Bethsaida. Bat no longtaem nomoa staka thousand pipol arrive and hipap raonem olketa. Jesus no ignorem pipol hia. Hem kaen and iusim taem blo hem for teachim olketa abaotem Kingdom and healim olketa wea sik. Taem hem gogo for evening, olketa disaepol wari abaotem hao olketa pipol hia bae kasem kaikai. Luk olsem, samfala pipol maet holem kam lelebet kaikai, bat staka maet need for go lo olketa vilij and peim kaikai. (Matt. 14:15; John 6:​4, 5) Wat nao Jesus duim?

WANFALA MIRAKOL FOR PROVAEDEM BRED

3. Wat nao Jesus talem olketa aposol for duim? (Lukim tu piksa.)

³ Jesus talem olketa aposol: “Olketa no need for go, iufala nao givim kaikai long olketa.” (Matt. 14:16) Datwan hem no isi bikos samting olsem 5,000 man nao lo there. And if iumi includim olketa woman and pikinini, maet hem samting olsem 15,000 pipol. (Matt. 14:21) Andrew sei: “Wanfala smol boy long hia hem garem faevfala bred and tufala smol fish. Bat hard for diswan fitim staka pipol olsem!” (John 6:9) Barley bred hem wanfala main kaikai wea staka pipol kaikaim, and maet olketa smol fish hia olketa soltem and draem. Bat nomata olsem, datfala amount lo kaikai wea boy hia garem, bae hem inaf for feedim evriwan or hao?

4. Wat nao iumi savve lanem from John 6:​11-13? (Lukim tu olketa piksa.)

⁴ Jesus showimaot wei for kaen and welkamim pipol, taem hem talem olketa for sidaon lo olketa difren grup lo grass. (Mark 6:​39, 40; readim John 6:​11-13.) And iumi lanem tu dat Jesus sei thankiu lo Dadi blo hem for datfala bred and fish. Datwan barava fitim, bikos really Jehovah nao givim kam datfala kaikai. Hem gud reminder for iumi followim example blo Jesus for prea bifor iumi kaikai, nomata iumi stap seleva or witim olketa narawan. Jesus givim kaikai hia lo olketa aposol for sharem lo datfala crowd, and evriwan kaikai and olketa satisfae. Staka kaikai leftova tu, and Jesus no laek for weistim. So hem talem olketa for kolektem leftova kaikai hia mekem olketa iusim bihaen. Jesus showim nambawan example for iumi iusim wise olketa material tings wea iumi garem. If iu parents, hao if iu storyim datwan witim olketa pikinini blo iu and discussim olketa leson wea iumi savve lanem abaotem wei for prea, showimaot welkam, and no hol bak for givim samting.

5. Hao nao pipol react lo wat Jesus duim lo datfala day, and wat nao Jesus duim?

⁵ Olketa pipol hia barava sapraes lo hao Jesus teach and lo olketa mirakol wea hem duim. Olketa savve Moses sei God bae sendem kam wanfala spesol profet, and maet olketa start for garem tingting olsem, ‘Hao, Jesus nao datfala profet?’ (Deut. 18:​15-18) If olketa ting olsem, datwan maet mekem olketa for tingse Jesus nao bae best ruler, from hem fit for supplyim bred for full nation. Dastawe, datfala crowd laek for kasholem Jesus “for mekem hem [kamap] king.” (John 6:​14, 15) If Jesus duim wat olketa laekem, hem bae involve lo politik blo olketa Jew wea stap anda lo rul blo Rome. Hao, hem duim datwan? Nomoa. Bible sei Jesus kwiktaem for lusim olketa and ‘go ap lo datfala maunten.’ So nomata pipol putim pressure lo hem, hem disaed for no involve lo politik. Datwan hem important leson for iumi!

6. Hao nao iumi savve showim dat iumi laek for followim example blo Jesus? (Lukim tu piksa.)

⁶ Hem tru, distaem pipol no askem iumi for duim mirakol for provaedem bred or kiurim sik pipol, and olketa no trae for mekem iumi kamap king or national ruler. Bat olketa maet encouragem iumi for involve lo politik lo wei for vote or sapotim samwan wea olketa tingse hem bae impruvim laef blo olketa. Bat example wea Jesus showim hem barava klia. Hem no laek for involve lo eni samting wea join witim politik, and bihaen, hem sei tu: “Kingdom bilong mi hem no bilong disfala world.” (John 17:14; 18:36) Hem gud for iumi olketa Christian distaem for garem sem tingting olsem Jesus and followim example blo hem lo wat hem duim. Iumi sapotim, witness abaotem hem, and prea for datfala Kingdom. (Matt. 6:10) Distaem bae iumi gohed storyim datfala mirakol wea Jesus duim for provaedem bred and olketa leson wea iumi savve lanem.

LUKSAVVE LO WAT DATFALA MIRAKOL BLO BRED HEM MINIM

7. Wat nao Jesus and olketa aposol duim? (John 6:​16-20)

⁷ Afta Jesus feedim datfala crowd, hem go ap lo maunten bikos hem laek for avoidim datfala crowd wea trae for mekem hem kamap king, and olketa aposol go insaed boat for go bak lo Capernaum. (Readim John 6:​16-20.) Taem olketa aposol sail go, wanfala storm kamap and sea start for raf tumas. Then Jesus wakabaot kam lo olketa antap lo sea. And hem invaetem aposol Peter tu for wakabaot kam antap lo sea. (Matt. 14:​22-31) Taem Jesus go insaed boat, wind hem stop. Olketa aposol sei: “Iu barava Son bilong God.”a (Matt. 14:33) Interesting samting, olketa aposol no luksavve lo connection between disfala mirakol and mirakol wea Jesus duim for feedim datfala crowd. Lukim wat Mark talem, hem sei: “Olketa [aposol] no luksavve long samting wea olketa shud lanem from datfala mirakol wea hem duim witim faevfala bred. Olketa no minim gud yet olketa samting hia.” (Mark 6:​50-52) Tru nao, olketa fail for luksavve dat Jehovah givim bigfala paoa lo Jesus for duim olketa mirakol hia. Bat bihaen, Jesus seleva storyim moa datfala mirakol abaotem bred, and teachim wanfala leson for iumi.

8-9. Why nao datfala crowd lukaotem Jesus? (John 6:​26, 27)

⁸ Datfala crowd wea Jesus provaedem kaikai for olketa, focus nomoa lo wat olketa laekem and physical need blo olketa. Hao nao iumi savve lo datwan? Bikos lo next day, olketa lukim dat Jesus and olketa aposol lusim datfala ples. So taem samfala boat from Tiberias arrive, olketa go insaed and go lo Capernaum for faendem Jesus. (John 6:​22-24) Hao, olketa duim datwan bikos olketa barava laek for herem samfala samting moa abaotem Kingdom message? Nomoa. Main samting wea olketa ting abaotem hem physical samting, for Jesus givim bred lo olketa. Hao nao iumi savve lo datwan?

⁹ Tingim wat happen taem datfala crowd lukim Jesus klosap lo Capernaum. Jesus tok stret lo olketa abaotem wei wea olketa laekem nomoa for satisfaem physical need blo olketa wea hem for lelebet taem nomoa. Hem talem dat olketa “kaikaim bred and . . . fulap” lo “kaikai wea savve rotten.” Hem talem olketa tu for “mas waka for kaikai wea no savve rotten and wea mekem man laef olowe.” (Readim John 6:​26, 27.) Jesus sei Dadi blo hem savve provaedem datkaen kaikai. Maet olketa pipol hia seke for herem dat wanfala kaikai savve mekem man kasem laef olowe! Wat kaen kaikai nao datwan, and hao nao olketa savve kasem?

10. Wat nao olketa pipol hia “mas duim” for kasem laef olowe?

¹⁰ Luk olsem, olketa Jew hia tingse olketa need for duim samfala samting for kasem kaen kaikai olsem. Maet olketa tingse for “duim samting wea God hapi long hem” hem minim for olketa mas followim Law blo Moses. Bat, Jesus sei: “Samting wea God hapi long hem nao hem for iufala showimaot faith long man wea God sendem kam.” (John 6:​28, 29) So for samwan “kasem laef olowe” hem mas showimaot faith lo man wea God sendem kam. And datwan hem samting wea Jesus bin story abaotem bifor. (John 3:​16-18, 36) And bihaen, Jesus storyim staka samting moa abaotem hao iumi savve kasem laef olowe.—John 17:3.

11. Wat nao showim dat olketa Jew hia gohed for tingim nomoa kaikai? (Psalm 78:​24, 25)

¹¹ Olketa Jew hia no acceptim niu samting wea Jesus teachim abaotem “samting wea God hapi long hem” wea hem nao for showimaot faith lo Jesus. Olketa askem Jesus: “Wanem mirakol nao bae iu duim mekem mifala lukim datwan and biliv long iu?” (John 6:30) Olketa talem hao olketa grani blo olketa lo taem blo Moses kasem manna, wea hem olsem bred blo olketa. (Neh. 9:15; readim Psalm 78:​24, 25.) So hem klia, mind blo olketa focus nomoa lo real kaikai wea bae mekem olketa fulap. And taem Jesus storyim “trufala bred from heven” wea savve givim laef olowe wea hem winim manna wea kam from heven bifor, olketa no even askem Jesus for explainim klia wat nao hem minim. (John 6:32) Olketa barava focus lo physical need and datwan mekem olketa ignorem olketa spiritual truth wea Jesus trae for teachim lo olketa. Wat nao iumi lanem from disfala story?

MAIN FOCUS BLO IUMI

12. Hao nao Jesus showimaot wat nao barava important?

¹² Diswan hem wanfala important leson wea iumi lanem from John chapter 6. Olketa spiritual samting nao shud main focus blo iumi. Tingim hao Jesus strongim datfala point taem Satan temptim hem. (Matt. 4:​3, 4) And lo Sermon lo Maunten, hem teachim hao samting wea important nao hem wei for luksavve lo olketa spiritual need blo iumi. (Matt. 5:3) So, hem gud for iumi askem iumiseleva: ‘Hao, samting wea mi duim lo laef blo mi showim olketa spiritual samting nao hem important winim wei for satisfaem nomoa wat miseleva laekem?’

13. (a) Why nao hem stret for iumi enjoyim kaikai? (b) Wat nao iumi need for careful lo hem? (1 Corinth 10:​6, 7, 11)

¹³ Hem no rong for iumi prea for olketa physical need and for enjoyim olketa samting hia. (Luke 11:3) Hard waka savve mekem iumi hapi bikos iumi enjoyim “kaikai and drink” and iumi ‘luksavve diswan hem from hand blo tru God.’ (Eccl. 2:24; 8:15; Jas. 1:17) Nomata olsem, iumi need for garem stretfala tingting abaotem olketa material samting. Aposol Paul strongim datfala point taem hem raet lo olketa Christian wea stap lo taem wea system blo olketa Jew klosap for finis. Hem storyim olketa samting wea happen lo olketa Israelite bifor, includim tu wat hem happen klosap lo Maunt Sinai. Hem warnim olketa Christian for “no laekem olketa nogud samting olsem olketa” Israelite lo bifor duim. (Readim 1 Corinth 10:​6, 7, 11.) Olketa Israelite letem wei for laekem tumas kaikai for affectim tingting blo olketa, gogo olketa ting lo mirakol blo Jehovah for provaedem kaikai olsem “nogud samting.” (Num. 11:​4-6, 31-34) And taem olketa worshipim datfala gold young buluka, olketa showim wei for kaikai, drink, and hapitaem hem important winim wei for obeyim Jehovah. (Ex. 32:​4-6) Paul storyim datwan for warnim olketa Christian wea stap bifor system blo olketa Jew hem end lo 70 C.E. Iumi tu stap lo taem wea disfala system hem klosap for end, so iumi need for tek serious lo disfala kaonsel blo Paul.

14. Wat nao Bible talem abaotem kaikai lo niu world?

¹⁴ Taem Jesus sei “givim mifala kaikai wea mifala needim for tuday,” hem story abaotem hao lo future God bae mekem will blo hem for kamap lo ‘earth, olsem hem duim long heven.’ (Matt. 6:​9-11) Taem iu herem datwan, wat nao iu tingim? Bible showim dat will blo God for earth, hem includim wei for kaikaim naes kaikai. Olsem Isaiah 25:​6-8 storyim, anda lo Kingdom blo Jehovah iumi bae enjoyim staka naes physical kaikai. Psalm 72:16 promis olsem: “Staka grain bae stap lo earth, hem bae fulap antap lo olketa maunten.” Hao, iu luk forward for iusim samfala grain for wakem lo favorite bred blo iu or traem lo niu recipe? And tu, iu savve enjoyim olketa frut from olketa grape planteison blo iu. (Isa. 65:​21, 22) And evriwan lo full earth bae enjoyim tu.

15. Wat kaen education program nao bae kamap lo future resurrection? (John 6:35)

¹⁵ Readim John 6:35. Tingim, wat nao future blo olketa pipol wea kaikaim datfala bred and fish wea Jesus provaedem? Lo future resurrection, maet iu bae meetim samfala lo olketa. Nomata olketa no showimaot faith, maet bae olketa laef bak. (John 5:​28, 29) Olketa mas lane abaotem wat Jesus minim taem hem sei: “Mi nao datfala bred wea mekem pipol laef. Man wea kam long mi bae no hangre moa.” Olketa bae need for showimaot faith lo ransom sakrifaes, and bilivim dat Jesus givim laef blo hem for olketa. Lo datfala taem, bae wanfala spiritual education program hem kamap for teachim olketa wea resurrect and eni pikinini wea born lo datfala taem. Iumi bae barava hapi for join insaed datfala teaching program! Taem iu duim datwan, hapi wea iu kasem bae winim hapi wea iu garem taem iu kaikaim real bred. Tru nao, bae olketa spiritual samting nao hem barava important.

16. Wat nao bae iumi lanem lo next article?

¹⁶ Iumi storyim finis lelebet part lo John chapter 6, bat Jesus garem staka samting moa for teachim iumi abaotem “laef olowe.” Datwan hem important information for olketa Jew bifor and for iumi distaem tu. Bae iumi gohed for storyim John chapter 6 lo next article.