Christianity Spred lo Staka Nation

Olketa aposol obeyim komand blo Jesus for storyim gud nius lo evri ples lo earth. Lo 47 C.E., olketa brata lo Antioch sendem Paul and Barnabas for go preach lo olketa difren ples, datwan hem first preaching trip. Tufala hia wea strong for preach go lo olketa ples lo Asia Minor olsem Derbe, Lystra, and Iconium.

Paul and Barnabas preach lo evriwan, nomata olketa wea rich or poor, young or olo. Staka pipol acceptim truth abaotem Christ. Taem Paul and Barnabas preach lo Sergius Paulus wea hem governor blo Cyprus, wanfala man for duim magic trae for stopem tufala. Paul talem datfala man: ‘Jehovah bae panisim iu.’ Semtaem nomoa, man for duim magic hem blind nao. Taem Governor Paulus lukim datwan hem biliv nao.

Paul and Barnabas preach evriwea, from haos tu haos, lo olketa market, followim road, and lo olketa sinagog. Taem tufala healim wanfala man lo Lystra wea kripol, olketa wea lukim datfala mirakol tingse tufala hia olketa god so olketa laek worshipim tufala. Bat Paul and Barnabas stopem olketa and sei: ‘Worshipim God nomoa! Mitufala man nomoa ia.’ Then samfala Jew kam and mekem datfala crowd for againstim Paul. Crowd hia stonem hem, tekem hem go aotsaed lo taon, and leavim hem for dae lo there. Nomata olsem Paul hem laef nomoa! So olketa brata kam and helpem hem and tekem hem go bak lo taon. Bihaen, Paul go bak lo Antioch.

Lo 49 C.E., Paul go lo olketa nara ples moa. Bihaen hem go bak for lukim olketa brata lo Asia Minor, hem go lo olketa farawe ples lo Europe for preachim gud nius. Hem go lo Athens, Ephesus, Philippi, Thessalonica, and lo olketa nara ples. Silas, Luke, and wanfala young man wea nem blo hem Timothy go witim Paul lo evri ples wea hem go. And olketa waka tugeta for startim olketa kongregeson and strongim olketa. Paul stap lo Corinth for wan and haf year, for strongim olketa brata lo there. Hem preach, teach, and raetem olketa leta for staka kongregeson. Hem wakem olketa tent tu. Gogo, Paul go bak moa lo Antioch.

Then lo 52 C.E., Paul go moa lo mek-thri preaching trip blo hem start lo Asia Minor. Hem travel farawe go lo north kasem Philippi and go daon for Corinth. Paul stap for staka year lo Ephesus, hem teach, healim pipol, and helpem datfala kongregeson. Evriday hem givim tu olketa pablik tok lo skul hall. Staka pipol nao lisin and changem wei blo olketa. Afta Paul preachim gud nius lo staka ples, hem go nao lo Jerusalem.