Information for Olketa wea Attendim Convention

OLKETA SPESOL MEETING

SKUL FOR KINGDOM EVANGELIZER Olketa pioneer wea age bilong olketa hem 23 go kasem 65 year, wea interest for duim moa samting long ministry savve attendim meeting for Skul for Olketa Kingdom Evangelizer wea bae kamap long Sunday aftanun. Bae olketa announcem ples and taem wea disfala meeting bae kamap.

INFORMATION FOR OLKETA WEA ATTENDIM CONVENTION

OLKETA ATTENDANT Waka bilong olketa attendant hem for helpem iumi. Plis followim direction bilong olketa saed long wea for park, wea for kam insaed and for go aot long Convention, ples for sidaon, and olketa nara samting.

BAPTISM Olketa markem samfala chair long front for olketa wea bae baptaes for sidaon long hem. Olketa shud sidaon long there bifor tok for baptism hem start long Saturday morning. Olketa wea bae baptaes mas tekem kam towel and kaleko for baptaes wea fitim.

CONTRIBUTION Olketa spendem staka selen long saond system, video equipment, olketa chair, and long staka nara samting wea mekem iumi enjoyim convention wea savve helpem iumi for fren gud witim Jehovah. Contribution wea iu givim savve help for peim olketa kost hia and for sapotim waka wea iumi duim evriwea long world. Olketa contribution box stap long olketa difren ples long convention. Mifala tinghae tumas long contribution bilong iu and Governing Body tu tinghae long wei wea iu sapotim Kingdom waka.

FIRST AID Disfala department hem for EMERGENCY NOMOA.

LOST AND FOUND Sapos iu faendem eni samting, tekem datwan go long disfala department. Sapos iu lusim eni samting, go askem olketa wea waka long disfala department. Sapos iu lukim eni pikinini wea lus, tekem hem go long disfala department. Bat tingim, diswan hem no ples for narawan lukaftarem pikinini. Plis lukaftarem gud pikinini bilong iu, and olketa shud stap witim iu.

PLES FOR SIDAON Plis tingim nara pipol. Iu savve keepim samfala chair for famili bilong iu and eniwan wea iu studyim Bible witim hem. Plis no putim basket or eni samting long olketa chair wea iufala bae no sidaon long hem.

VOLUNTEER SERVICE Sapos iu laek for volunteer for duim samfala waka long convention, plis go long Information and Volunteer Service Department.