LESON 10
Hao Nao Olketa Meeting blo Olketa Jehovah’s Witness Savve Helpem Iu?
Iu go finis lo eni meeting blo Olketa Jehovah’s Witness? Sapos nomoa, maet bae iu fraet for go lo meeting blo olketa. Maet iu laek savve: ‘Wat nao olketa duim lo olketa meeting hia? Why nao olketa meeting important? Why nao mi mas go?’ Lo disfala leson, bae iu lanem taem iu meet tugeta witim olketa narawan, datwan bae helpem iu for fren witim God, and iu bae kasem gud samting.
1. Why nao Olketa Jehovah’s Witness meet tugeta?
Wanfala man wea raetem Bible storyim why hem important for meet witim olketa narawan. Hem sei: “Lo big kongregeson, bae mi praisem Jehovah.” (Psalm 26:12, NW) Olketa Jehovah’s Witness distaem tu hapi for meet tugeta. Evriwea lo world, olketa meet evri week for praisem God, singsing, and prea. Tu-thri taem evri year, olketa savve attendim tu olketa big gathering blo olketa for worship.
2. Wat nao bae iu lanem lo olketa meeting blo mifala?
Lo olketa meeting, main samting wea mifala teachim hem Bible and mifala “explainim gud.” (Readim Nehemiah 8:8, NW.) Lo olketa meeting hia, bae iu lane abaotem Jehovah and olketa naesfala wei blo hem. Taem iu savve hem lovem iu, datwan bae mekem iu for laek fren witim hem. Bae iu lanem tu hao hem savve helpem iu for garem gud laef.—Aesaea 48:17, 18.
3. Hao nao pipol wea iu meetim olketa lo meeting savve helpem iu?
Jehovah talem iumi for “tingim narawan mekem iumi savve encouragem olketa for showimaot love and duim olketa gudfala samting. [And] no misstim wei for hipap tugeta.” (Hebrew 10:24, 25) Lo olketa meeting blo mifala, bae iu meetim pipol wea lovem each other, and wea laek for lane abaotem God olsem iu. Bae iu herem olketa storyim olketa samting from Bible wea savve helpem iu. (Readim Rome 1:11, 12.) Iu bae meetim tu olketa singol and marit pipol wea gohed hapi nomata olketa garem problem. Diswan hem samfala nomoa lo olketa reason why Jehovah laekem iumi for meet tugeta evritaem!
DIG GO MOA
Bae iumi lanem wat nao Olketa Jehovah’s Witness duim lo olketa meeting blo olketa, and why hem gud for traem best for go lo olketa meeting hia.
4. Olketa meeting blo Olketa Jehovah’s Witness
Olketa Christian lo first century meet tugeta evritaem for worshipim Jehovah. (Rome 16:3-5) Readim Colossae 3:16, then discussim tugeta kwestin hia:
Wat nao olketa Christian hia duim for worshipim Jehovah?
Distaem, Olketa Jehovah’s Witness tu meet tugeta evritaem for worship. For lukim wat nao olketa duim lo olketa meeting blo olketa, pleim datfala VIDEO. Then, lukluk lo piksa antap blo wanfala kongregeson meeting and discussim olketa kwestin hia.
Wat nao samfala samting wea iu lukim olketa duim lo Kingdom Hall wea semsem witim wat iu readim lo Colossae 3:16?
Lo video or lo piksa, iu lukim eni nara samting lo olketa meeting wea iu interest lo hem?
Readim 2 Corinth 9:7, then discussim tugeta disfala kwestin:
Why nao Olketa Jehovah’s Witness no askem offering lo taem blo olketa meeting?
Storyim tugeta witim teacher blo iu wat bae olketa discussim lo next meeting lo datfala week.
Which part lo meeting hia nao iu interest lo hem?
Maet iu laek savve
Iu savve lukim lo jw.org, ples and taem wea meeting savve kamap evriwea lo world.
Lo meeting, mifala savve herem olketa tok, lukim video, and kasem training for preach and teach. Olketa meeting start and finis witim song and prea
Lo samfala part lo program, audience savve koment
Olketa famili, singol wan, olketa olo and pikinini savve kam
Olketa meeting hem free. Mifala no askem offering or pasim raon pleit for kolektem selen
5. Man mas traem best for go lo meeting
Tingim famili blo Jesus. Evri year, olketa mas wakabaot for tu-thri day followim olketa maunten from Nazareth kasem Jerusalem for go lo temple. Readim Luke 2:39-42, then discussim tugeta olketa kwestin hia:
Iu tingse for olketa go lo Jerusalem hem isi?
Iu tingse why nao maet iu mas traem best for go lo meeting?
Iu tingse hem gud for go lo meeting nomata hem no isi? Why nao olsem?
Bible sei hem important for meet tugeta for worshipim Jehovah. Readim Hebrew 10:24, 25, then discussim tugeta kwestin hia:
Why nao iumi shud go lo olketa meeting evritaem?
SAMFALA SAVVE TALEM: “Iu no need for meet witim olketa narawan. Iu savve stap lo haos and readim Bible nomoa.”
Wat kaen scripture or example lo Bible nao showim samting wea Jehovah laekem iumi for duim?
MAIN POINT
For attendim meeting datwan bae helpem iu for lane abaotem Jehovah, strongim frenship blo iu witim hem, and for worship witim olketa narawan.
Review
Why nao Jehovah encouragem iumi for meet tugeta?
Wat nao bae iu lanem lo meeting blo Olketa Jehovah’s Witness?
Iu tingse olketa meeting savve helpem iu lo eni nara wei tu?
FAENDAOT MOA
Hao sapos iu fraet for go lo meeting? Lukim wanfala man wea garem sem feeling wea gogo hem laekem tumas olketa meeting.
Mifala No Savve Forgetim Wei wea Olketa Welkamim Mifala (4:16)
Lukim wanfala young man wea enjoyim olketa meeting and wat hem duim for gohed attendim olketa meeting.
Read abaotem tingting blo samfala abaotem meeting.
“Why Nao Hem Gud for Go lo Olketa Meeting lo Kingdom Hall?” (Article lo jw.org)
Read abaotem hao wanfala raf man changem laef blo hem bihaen hem go lo meeting blo Olketa Jehovah’s Witness.
“Evriwea Mi Go Mi Tekem Gun Bilong Mi” (Wastaoa, September 1, 2014)