Waswe, Iu Tekpart Long Olketa Meeting for Strongim Narawan?
“Taem iufala hipap tugeta, . . . evri samting wea iufala duim, iufala mas duim for strongim narawan.”—1 COR. 14:26.
1. Olsem 1 Corinthians chapter 14 showimaot, wanem nao goal bilong olketa Christian meeting?
‘DATFALA meeting barava strongim mi!’ Waswe, iu tu feel olsem taem iu attendim wanfala meeting long Kingdom Hall? Ia! Olketa kongregeson meeting strongim iumi. Olsem long taem bilong olketa Christian bifor, olketa meeting distaem tu hem for helpem iumi evriwan for fren gud witim Jehovah. Aposol Paul mekhae long diswan long firstfala leta wea hem raetem for olketa long Corinth. Long chapter 14, hem talem hao evri part long meeting hem for “strongim kongregeson.”—Readim 1 Corinthians 14:3, 12, 26.a
2. (a) Wanem nao mekem iumi kasem gud samting from olketa meeting? (b) Wanem kwestin nao bae iumi storyim?
2 Iumi luksavve holy spirit bilong God nao mekem iumi kasem gud samting from olketa meeting. Dastawe long start bilong evri meeting, brata wea prea askem Jehovah for givim holy spirit for blessim meeting. Nomata olsem, iumi evriwan long kongregeson savve duim samting long taem bilong meeting for strongim narawan. So wanem nao iumi wanwan savve duim for mekem meeting hem strongim and encouragem narawan?
3. Why nao olketa meeting hem important?
3 For ansarem datfala kwestin, bae iumi storyim samfala samting abaotem olketa meeting wea olketa brata wea conductim mas tingim. Bae iumi storyim tu wanem nao evriwan insaed long kongregeson savve duim for mekem olketa meeting strongim evriwan. Iumi interest tumas long diswan bikos wei for go long olketa meeting and tekpart hem important part long worship bilong iumi for Jehovah.—Ps. 26:12; 111:1; Isa. 66:22, 23.
Meeting wea Helpem Iumi Studyim Bible
4, 5. Wanem nao goal bilong Wastaoa Study?
4 Iumi evriwan laek kasem gud samting from Wastaoa Study wea iumi duim evri week. So for helpem iumi minim main goal bilong datfala meeting, bae iumi storyim samfala change wea olketa mekem long Wastaoa magasin and olketa study article.
5 Start long Wastaoa study magasin bilong January 15, 2008, olketa putim wanfala important samting long front kava. Waswe, iu lukim datwan? Lukluk gud long magasin wea iu holem. Long botom long datfala taoa, iu bae lukim Bible wea open. Disfala piksa barava showimaot why nao iumi garem Wastaoa Study. Disfala magasin hem for helpem iumi studyim Bible. Tru tumas, long Wastaoa Study evri week, olketa “explainim and minim” Bible long iumi olsem olketa duim long taem bilong Nehemiah.—Neh. 8:8; Isa. 54:13.
6. (a) Wanem change nao olketa mekem long Wastaoa Study? (b) Wanem nao iumi mas tingim abaotem scripture wea olketa markem for “readim”?
6 Olketa mekem samfala change long Wastaoa Study bikos Bible nao main buk wea iumi iusim. Olketa markem samfala scripture for iumi “readim.” Hem gud for openem Bible and luk followim taem olketa readim olketa scripture hia long meeting. (Acts 17:11) Why nao olsem? Taem iumi lukim kaonsel bilong God long Bible bilong iumiseleva, datwan savve barava helpem iumi. (Heb. 4:12) So brata wea conductim meeting shud givim inaf taem for evriwan faendem datfala scripture bifor olketa readim. Datwan bae helpem evriwan for luk followim long Bible bilong olketa seleva.
Garem Moa Taem for Koment
7. Iumi garem chance for duim wanem long Wastaoa Study?
7 Nara samting wea olketa changem hem nao for mekem olketa Wastaoa study article no long tumas. So taem iumi duim Wastaoa Study, iumi no iusim staka taem for readim olketa paragraf bat iumi garem moa taem for givim olketa koment. Distaem staka long kongregeson garem chance for ansarem kwestin long Wastaoa Study, storyim wanfala scripture, or talem shortfala experience wea showimaot hem wise for followim olketa Bible principle. Brata wea conductim study shud markem taem tu for storyim olketa piksa.—Readim Psalm 22:22; 35:18; 40:9.
8, 9. Wanem nao waka bilong brata wea conductim Wastaoa Study?
8 Iumi bae garem moa taem for givim koment sapos olketa wea ansa talem shortfala koment nomoa and brata wea conductim Wastaoa Study no givim staka koment. So wanem nao savve helpem brata wea conductim study for savve haomas koment nao hem fit for givim mekem datfala meeting hem strongim evriwan?
9 Tingim wanfala tokpiksa. Taem brata wea conductim Wastaoa Study hem duim gud datwan, datwan hem olsem naes flaoa arrangement. Datfala flaoa arrangement garem olketa difren flaoa insaed, so Wastaoa Study tu garem staka difren koment. And olsem datfala arrangement garem olketa difren size and difren kala flaoa, olketa koment wea evriwan givim long meeting hem no semsem. Maet samfala talem short koment and hao olketa givim koment hem difren. Waswe long brata wea conductim study? Tu-thri koment wea hem givim hem olsem tu-thri leaf wea stap long datfala flaoa arrangement. Olketa leaf hia no main samting bat hem for mekem flaoa arrangement hia luk naes. Long sem wei tu, brata wea conductim study mas tingim waka bilong hem, hem no for story tumas bat for talem tu-thri koment for sapotim koment bilong olketa narawan. Tru tumas, olketa difren koment bilong olketa brata and sista, and tu-thri koment wea brata wea conductim study givim hem olsem flaoa arrangement wea luk naes tumas.
“Evritaem Givim Sakrifaes Bilong Praise”
10. Wanem nao tingting bilong olketa Christian bifor abaotem olketa kongregeson meeting?
10 Wanem Paul storyim long 1 Corinthians 14:26-33 helpem iumi for luksavve hao olketa conductim olketa meeting long first century. Wanfala savveman wea studyim Bible sei olsem abaotem olketa verse hia: “Interesting samting abaotem meeting bilong olketa Christian bifor hem hao klosap evriwan wea kam long meeting tingim datwan hem privilege for tekpart and samting wea olketa mas duim. Man wea kam long meeting no kam for herehere nomoa bat hem tekpart long meeting mekem narawan tu kasem gud samting.” Tru tumas, olketa Christian bifor ting long olketa kongregeson meeting olsem chance for talemaot faith bilong olketa.—Rom. 10:10.
11. (a) Wanem nao savve strongim kongregeson, and why nao olsem? (b) Wanem nao savve helpem iumi for givim olketa gudfala koment long meeting? (Lukim footnote.)
11 Taem iumi givim olketa koment long meeting, datwan barava “strongim kongregeson.” Nomata iumi go long olketa meeting for staka year finis, iumi hapi for herem olketa koment wea olketa brata and sista givim. Taem wanfala faithful olo brata or sista givim koment, datwan savve strongim iumi. Iumi feel hapi tu taem wanfala elder talem koment wea barava fitim iumi long datfala taem. And iumi smile taem wanfala pikinini talem koment wea showimaot hem lovem Jehovah. Tru tumas, taem evriwan givim koment datwan barava strongim kongregeson.b
12. (a) Wanem nao iu savve lanem from Moses and Jeremiah? (b) Why nao hem important for prea bifor iu givim koment?
12 Bat hem no isi for olketa wea savve shame for givim koment. Sapos iu olsem, hem gud for tingim olketa narawan tu feel olsem. Olketa faithful man olsem Moses and Jeremiah tu feel shame and tingse olketa no savve toktok gud front long staka pipol. (Ex. 4:10; Jer. 1:6) Bat Jehovah helpem olketa for praisem hem front long staka pipol, and God bae helpem iu tu for givim olketa koment for praisem hem. (Readim Hebrews 13:15.) Sapos iu fraet for koment, wanem nao iu savve duim? First samting, prepare gud for olketa meeting. Then bifor iu go long Kingdom Hall, prea long Jehovah and askem hem for helpem iu no fraet for koment. (Phil. 4:6) From iu askem samting followim “tingting bilong hem,” Jehovah bae herem prea bilong iu.—1 John 5:14; Prov. 15:29.
Olketa Meeting Hem for ‘Strongim, Encouragem, and Comfortim’ Iumi
13. (a) Wanem nao evriwan wea kam long meeting shud kasem? (b) Wanem kwestin nao hem important for olketa elder tingim?
13 Paul sei wanfala main goal bilong olketa kongregeson meeting hem for ‘strongim, encouragem, and comfortim’ olketa wea kam.c (1 Cor. 14:3.) Wanem nao olketa elder savve duim mekem olketa tok wea olketa givim hem strongim and comfortim olketa brata and sista? For ansarem datwan, bae iumi storyim wanfala meeting wea Jesus conductim no longtaem bihaen hem laef bak.
14. (a) Wanem nao olketa samting wea happen bifor Jesus arrangem meeting witim olketa aposol? (b) Why nao olketa aposol hapi tumas taem ‘Jesus kam and story long olketa’?
14 Tingim olketa samting wea happen bifor Jesus conductim datfala meeting. Taem Jesus klosap dae, olketa aposol “lusim hem and ranawe,” and olsem Jesus talem, olketa “ranawe go bak long haos bilong [olketa].” (Mark 14:50; John 16:32) Then taem Jesus laef bak, hem talem olketa aposol for kam long wanfala spesol meeting.d So “elevenfala disaepol go long Galilee long datfala maunten wea Jesus talem olketa for go meetim hem.” Taem olketa arrive, ‘Jesus kam and story long olketa.’ (Matt. 28:10, 16, 18) Olketa mas hapi tumas Jesus talem olketa for go meetim hem! Wanem nao Jesus storyim?
15. (a) Wanem nao Jesus storyim long datfala meeting, and wanem nao hem no storyim? (b) Datfala meeting mekem olketa aposol feel hao?
15 Jesus startim meeting olsem: “God givim paoa long mi ovarem evri samting.” Then hem givim disfala assignment long olketa: “Iufala go and teachim pipol long evri kantri for kamap disaepol bilong mi.” Long end bilong tok hem sei: “Bae mi stap witim iufala.” (Matt. 28:18-20) Waswe, iu luksavve wanem nao Jesus no duim? Hem no tok strong long olketa aposol and hem no kwestinim olketa long datfala meeting or mekem olketa feel guilty abaotem samting wea olketa duim wea showimaot olketa no garem strongfala faith. Bat Jesus givim important assignment long olketa wea showimaot hem and Dadi bilong hem lovem olketa. Diswan mekem olketa aposol feel hao? Hem barava strongim olketa, encouragem, and comfortim olketa bikos no longtaem bihaen datfala meeting, olketa start moa for “teachim pipol and talemaot gud nius.”—Acts 5:42.
16. Wanem nao olketa elder savve duim for followim example bilong Jesus for mekem meeting strongim kongregeson?
16 Olketa elder distaem tu followim example bilong Jesus and ting long meeting olsem chance for helpem olketa brata and sista luksavve Jehovah lovem olketa. (Rom. 8:38, 39) So taem olketa elder givim tok, olketa mekhae long gud samting wea olketa brata and sista duim and no wik point bilong olketa. Olketa elder no kwestinim wei wea olketa brata and sista trae for duim stret samting. Bat wanem olketa talem showimaot olketa luksavve olketa brata and sista lovem Jehovah and laek for duim stret samting. (1 Thess. 4:1, 9-12) Hem tru, samfala taem olketa elder need for kaonselem kongregeson, bat sapos tu-thri long kongregeson nomoa needim kaonsel, hem gud for olketa elder story seleva witim olketa. (Gal. 6:1; 2 Tim. 2:24-26) Taem olketa elder story long kongregeson, olketa traem best for praisem kongregeson. (Isa. 32:2) Olketa trae hard for story long gudfala wei mekem taem meeting hem finis, datwan strongim evriwan and mekem olketa feel hapi.—Matt. 11:28; Acts 15:32.
Olketa Meeting Comfortim Iumi
17. (a) Why nao hem important tumas for mekem olketa meeting comfortim evriwan? (b) Wanem nao iuseleva savve duim for strongim narawan long taem bilong meeting? (Lukim box “Tenfala Samting wea Iu Savve Duim for Strongim Iuseleva and Olketa Narawan Long Meeting.”)
17 From world bilong Satan kamap nogud tumas, iumi mas waka hard for mekem olketa meeting comfortim evriwan. (1 Thess. 5:11) Wanfala sista witim hasband bilong hem kasem staka hard taem, and hem sei: “Taem mifala long Kingdom Hall, mifala feel olsem Jehovah barava lukaftarem mifala. Olketa taem wea mifala stap witim olketa brata and sista, hem helpem mifala for torowem hevi bilong mifala long Jehovah, and diswan mekem mifala feel gud lelebet.” (Ps. 55:22) Iumi laekem evriwan wea kam long olketa meeting for feel olsem olketa kasem encouragement and comfort. So iumi evriwan mas gohed tekpart long olketa meeting mekem datwan savve strongim narawan.
[Footnotes]
a Bible sei samfala samting wea kamap long olketa Christian meeting long first century bae finis. Olsem example, distaem God no givim paoa long iumi for “toktok long olketa difren languis” or “talem profesi.” (1 Cor. 13:8; 14:5) Nomata olsem, wanem Paul talem savve helpem iumi for savve hao olketa Christian meeting shud gohed.
b Olketa idea for givim olketa gudfala koment hem stap long Wastaoa bilong September 1, 2003, page 19-22.
c Vine’s Expository Dictionary of Old and New Testament Words sei Greek word wea iumi transleitim “comfortim” hem difren from datfala word “encouragem” bikos “comfortim” savve minim “for barava tingim man winim wei for [encouragem] hem nomoa.”—Markem witim John 11:19.
d Maet disfala meeting nao Paul storyim taem hem sei “winim 500 brata nao lukim [Jesus].”—1 Cor. 15:6.
Wanem Nao Ansa Bilong Iu?
• Why nao olketa meeting hem important?
• Why nao olketa koment wea iumi givim long meeting hem “strongim kongregeson”?
• Wanem nao iumi savve lanem from meeting wea Jesus garem witim olketa disaepol bilong hem?
[Box/Piksa long page 22, 23]
TENFALA SAMTING WEA IU SAVVE DUIM FOR STRONGIM IUSELEVA AND OLKETA NARAWAN LONG MEETING
Prepare firstaem. Taem iu studyim firstaem samting wea iumi bae storyim long Kingdom Hall, datwan bae mekem iu for interest long olketa meeting and no forgetim wanem iu lanem.
Attend evritaem. Taem iu go evritaem long olketa meeting, datwan encouragem narawan.
Kam early. Sapos iu kam early, iu savve singim firstfala song and herem prea for startim meeting, wea tufala samting hia hem part long worship bilong iumi for Jehovah.
Tekem kam olketa buk. Tekem kam Bible and olketa buk wea iumi bae iusim long meeting mekem iu savve luk followim and minim wanem olketa storyim.
No busy long nara samting. Olsem example, no readim olketa text message long taem bilong meeting, bat duim bihaen. Datwan bae helpem iu for tingim nomoa olketa samting wea gohed long meeting.
Tekpart. Taem staka givim koment, datwan encouragem evriwan.
Givim short koment. Diswan mekem staka tu garem chance for koment.
Duim assignment bilong iu. Taem iu garem part long Theocratic Ministry Skul or Service Meeting, prepare gud, practice firstaem, and trae hard for duim olketa assignment bilong iu.
Praisem narawan. Talem olketa wea duim part long meeting or wea givim koment iu tinghae long datwan.
Story witim narawan. Taem iu hello long olketa narawan and story gud witim olketa bifor and bihaen long meeting, datwan savve mekem iu hapi for kam.